རྒྱ་གར་གཞུང་གིས་༧གོང་ས་མཆོག་དང་ཀརྨ་རྣམ་གཉིས་ལ་ཆེ་མཐོང་།

བོད་ཀྱི་ཆོས་ཕྱོགས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་ལྷག་དོན་༧དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རྣམ་གཉིས་ལ་རྒྱ་གར་གཞུང་གིས་གཞུང་འབྲེལ་ཐོག་ནས་ཆེ་མཐོང་ཆེན་པོ་ཞུ་བའི་རྣམ་པ་གསར་པ་ཞིག་དེང་སང་ཐོན་བཞིན་ཡོད་པ་རེད།
དེ་ཡང་རྒྱ་གར་གྱི་གསར་ཤོག་Indian Express་ནང་གནས་ཚུལ་སྤེལ་བ་ལྟར་ན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་སྲིད་བློན་ན་རེན་ད་ར་མོ་དྷི་མཆོག་གི་བཞུགས་གནས་སུ་ཕེབས་འགྲོའི་ནང་མཇལ་འཕྲད་གནང་བར་ཕེབས་ནས་ལོ་གཉིས་ཕྱིན་པའི་རྗེས། རིང་མིན་ཕྱི་ཟླ་༣་པའི་ནང་བྷེ་ཧར་མངའ་སྡེའི་Rajgir-Nalanda་ས་གནས་སུ་རྒྱལ་སྤྱིའི་ནང་པའི་ལྷན་ཚོགས་སར་༧གོང་ས་མཆོག་རྒྱ་གར་གཞུང་གིས་སྤོབས་པ་ཆེན་པོའི་སྒོ་ནས་གདན་ཞུ་གནང་ཡོད་པ་རེད།
དེ་དང་ཕྱོགས་མཚུངས་རྒྱ་གར་དབུས་གཞུང་གིས་ལོ་༡༧་རྗེས་སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ཆོས་ཕྱོགས་ཀྱི་དབུ་ཁྲིད་ལྷད་མེད་ཅིག་ཡིན་པ་ལས་རྒྱ་ནག་གི་གསང་མྱུལ་བ་མིན་པར་ངོས་ལེན་ཞུས་ཡོད་པ་རེད།
རྒྱ་གར་ནང་གི་མཐོ་རིམ་གནས་ཚུལ་འབྱུང་ཁུངས་ཀྱིས་གསུངས་ན། ༧གོང་ས་ཏཱ་ལའི་བླ་མ་མཆོག་རྒྱ་གར་གྱི་འགན་འཁྲི་མ་ཡིན་པར་ངོམ་ཆོག་པའི་ཁྱད་ཆོས་ཤིག་ཡིན་པ་རྒྱ་གར་དབུས་གཞུང་གིས་མཁྱེན་རྟོགས་ཡོང་བཞིན་ཡོད་པ་རེད།
ད་དུང་གནས་ཚུལ་ནང་། རྒྱ་ནག་གིས་རྒྱ་གར་ནང་གནས་བཞུགས་གནང་མཁན་ནང་པའི་དབུ་ཁྲིད་༧གོང་ས་མཆོག་དང་རྒྱལ་བ་ཀརྨ་པ་རྣམ་གཉིས་ཀྱི་ཆིབས་བསྒྱུར་ཐོག་སྐྱོན་བརྗོད་འདྲ་མིན་བྱེད་བཞིན་ཡོད་མིན་ལ་མ་ལྟོས་པར། རྒྱ་གར་གཞུང་གིས་༧གོང་ས་མཆོག་དང་ཀརྨ་པ་རྣམ་གཉིས་རྒྱ་གར་ནང་དམ་དྲག་མེད་པར་རང་དབང་གྱི་སྒོ་ནས་ཕེབས་ཆོག་རྒྱུའི་ཐག་གཅོད་གནང་ཡོད་པ་རེད།
༧གོང་ས་མཆོག་རིང་མིན་ཕྱི་ཟླ་གསུམ་པའི་ཚེས་༡༧ནས་༡༩བར་Rajgiri-Nalanda་ཏུ་རྒྱལ་སྤྱིའི་ནང་པའི་ལྷན་ཚོགས་ཐོག་ཞབས་སོར་འཁོད་རྗེས་རྒྱ་གར་བྱང་ཤར་ཨ་རུ་ཎ་ཅལ་ཁུལ་ཆིབས་བསྒྱུར་སྐྱོང་གནང་མཛད་ཀྱི་ཡོད་པ་རེད།
དེ་བཞིན་དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འབྲས་ལྗོངས་ཁུལ་ཏུ་གང་མྱུར་ཕེབས་སྲིད་པ་ཡིན་སྐོར་ཡང་གནས་ཚུལ་སྤེལ་འདུག
རྒྱ་གར་གྱི་Rajgiri-Nalandaཪ་སྐོང་ཚོགས་གནང་རྒྱུའི་རྒྱལ་སྤྱིའི་ནང་པའི་ལྷན་ཚོགས་དེ་རྒྱ་གར་དབུས་གཞུང་གི་རིག་གཞུང་ལྷན་ཁང་གིས་གོ་སྒྲིག་གནང་གི་ཡོད་པ་རེད། རྒྱ་གར་གཞུང་གི་གནས་ཚུལ་འབྱུང་ཁུངས་ཞིག་གིས་གསུངས་ན། ༧གོང་ས་མཆོག་ནས་དུས་རྟག་ཏུ་མགོན་པོ་གང་ཉིད་རྒྱ་གར་གྱི་བུ་ཡིན་ཞེས་གསུངས་གནང་གི་ཡོད་པར་ལེགས་སྐྱེས་ཀྱི་ཚུལ་དུ་རྒྱལ་སྤྱིའི་ནང་པའི་ལྷན་ཚོགས་དེར་གདན་ཞུ་ཕུལ་ཡོད་པ་རེད།

གསར་འགོད་པ་རིག་ལྡན་སྒྲོལ་མ།