འཛམ་གླིང་ཞི་བདེ་འབྱུང་ཐབས་སུ་མཉམ་ལས་གནང་བའི་རེ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་སྲིད་འཛིན་གསར་པ་Donald Trump མཆོག་དང་ཨུ་རུ་སུའི་སྲིད་འཛིན་Vladimir Putin རྣམ་གཉིས་ནས་འཛམ་གླིང་ཞི་བདེ་འབྱུང་ཐབས་སུ་མཉམ་ལས་གནང་བའི་རེ་བ་ཡོད་ཅེས་གསུངས་བཞག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིར་FCCIཞེས་པའི་རྒྱ་གར་གྱི་ཚོང་ལས་དང་བཟོ་ལས་སྡེ་ཚོགས་ཀྱི་བེུད་ཚན་པས་གོ་སྒྲིག་གནང་བའི་ལྷན་ཚོགས་ཐོག་འཛམ་གླིང་ནང་གྲོས་མོལ་ལ་བརྟེན་ནས་ཞི་བདེ་འགྲུབ་དགོས་པའི་བཀའ་སློབ་བསྩལ་བའི་ནང་དེང་འཛམ་གླིང་ནང་ཞི་བདེ་དང་འཚེ་མེད་ཞི་བ་གོང་འཕེལ་འགྲོ་བཞིན་ཡོད་ཅིང་དེ་ཡང་ཕྱོགས་དུ་མ་གྲོས་མོལ་ལམ་ནས་མཉམ་མཐུན་མཉམ་གནས་བྱེད་བཞིན་པའི་དཔེ་མཚོན་དུ་ཡོ་རོབ་མཉམ་སྤྲེལ་སྒྲིག་འཛུགས་ལུང་འདྲེན་གནང་འདུག མགོན་པོ་གང་ཉིད་ཀྱིས་ངོས་རང་ཡོ་རོབ་མཉམ་སྦྲེལ་སྒྲིག་འཛུགས་ལ་ཡིད་སྨོན་སྐྱེས་མཁན་ཞིག་ཡིོན་། འབྱུང་འབྱུར་ཨཕ་རི་ཀའི་ནང་མཉམ་སྦྲེལ་སྒྲིག་འཛུགས་དང་། དེ་བཞིན་ལེ་ཊིན་ཨ་མི་རི་ཀའི་ནང་མཉམ་སྦྲེལ་སྒྲིག་འཛུགས། ཨེ་ཤེ་ཡའི་མཉམ་སྦྲེལ་སྒྲིག་འཛུགས་སོགས་གསར་འཛུགས་ཐུབ་པ་མ་ཟད་གོ་ལ་གཅིག་འགྱུར་གྱི་སྒྲིག་འཛུགས་ཤིག་འབྱུང་བའི་རེ་བ་བྱེད་ཀྱི་ཡོད་ཅེས་༸གོང་ས་མཆོག་གིས་གསུངས་གནང་འདུག།
གསར་འགོད་པ་ཚེ་དབང་དངོས་གྲུབ།