ལྷ་སའི་ནང་ཕྱི་རྒྱལ་གསར་འགོད་པ་བསྐྱོད་མི་ཆོག་པ།

༄༅༎རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱིས་རྒྱ་ནག་གི་འཛིན་སྐྱོང་དཔོན་རིགས་ཚོས་བོད་ནང་ཕྱི་རྒྱལ་གྱི་གསར་འགོད་པ་ཅིག་ཀྱང་བསྐྱོད་མ་ཆོག་པའི་དམ་བསྒྲགས་ཧ་ཅང་ཤུགས་ཆེ་བྱེད་བཞིན་ཡོད་པར་ཐུགས་འཚབ་ཆེན་པོ་གནང་བཞག
བདུན་ཕྲག་སྔོན་མའི་ནང་རྒྱལ་མཚམས་མེད་པའི་གསར་འགོད་པའ་མཐུན་ཚོགས་ཀྱིས་སྙན་ཐོ་ཞིག་འགྲེམས་སྤེལ་གནང་ཡོད་པའི་ནང༌། རྒྱ་ནག་གིས་ཕྱི་རྒྱལ་གྱི་གསར་འགོད་པ་བོད་ནང་རྩ་བ་ནས་མ་བཏང་བའི་ཁར། རྒྱ་ནག་གཞུང་འབྲེལ་གསར་ལམ་Global Timesལྟ་བུ་བེད་སྤྱོད་བཏང་ནས་བོད་ནང་གི་དྲང་བདེན་གནས་ཚུལ་ལ་འཁྱོག་བཤད་བྱས་ཏེ། བོད་ནང་གི་ངོ་རྒོལ་ལ་འགྲེལ་བཤད་ལོག་པ་རྒྱབ་པ་དང༌། རྒྱལ་སྤྱིའི་སྤྱི་ཚོགས་ཀྱིས་ཐེ་བྱུས་བྱེད་ཀྱི་ཡོད་པའི་དོན་མེད་སྐྱོན་འཛུགས་བྱས་ཡོད་སྐོར་འགྲེལ་བརྗོད་གནང་འདུག། རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱིས་འཛམ་གླིང་གི་མཐོང་མ་ཐུབ་པའི་དཀའ་ངལ་ཅན་གྱི་གནས་ཚུལ་ཞིག་བོད་ནང་ཡོང་བཞིན་ཡོད་པ་དང༌། ད་ལྟའི་སྐབས་འདིར་བྱང་ཀོ་རི་ཡའི་རྒྱལ་ས་པིཡོང་ཡེང་ནང་རྒྱལ་སྤྱིའི་གསར་འགོད་པ་ཡོད་ནའང༌། ལྷ་སའི་ནང་དེ་ལྟར་མེད་པ་ནི་བྱང་ཀོ་རི་ཡ་ལས་གནས་སྟངས་ཐབས་སྡུག་པ་རེད་ཅེས་གསུངས་བཞག།