རྒྱ་ནག་གི་སྲིད་འཛིན་ཞི་ཅིང་ཕིང་བདེ་འཇགས་སྲུང་སྐྱོབ་དམ་པོའི་འོག་ཧོང་ཀོང་ནང་འབྱོར་འདུག

འདི་ཚེས་༣༠ཉིན་གློ་བུར་རྒྱ་ནག་གི་འགོ་ཁྲིད་ཞི་ཅིང་ཕིང་ཧོང་ཀོང་ནང་གི་མེ་འཁོར་འབབ་ཚུགས་སུ་འབྱོར་བའི་སྐབས། ཁོང་གིས་འདས་པའི་དུས་ཡུན་གང་མཚམས་རིང་ཧོང་ཀོང་གཞུང་དམངས་གཉིས་ཀྱིས་དཀའ་ངལ་མང་པོ་ཞིག་ལ་གདོང་ལེན་བྱས་པའི་རྗེས། ཧོང་ཀོང་དེ་བཞིན་སླར་གསོའི་ལམ་བུར་བསྐྱོད་བཞིན་ཡོད་ལུགས་དང་། དོན་དངོས་ཐོག་ནས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལ་སྲོག་སྙིང་ཤུགས་ཆེ་ལྡན་ཡོད་པ་དང་། ལམ་ལུགས་དེས་ཧོང་ཀོང་དེ་བཞིན་རྒྱུན་རིང་ཡར་རྒྱས་གོང་འཕེལ་དང་བརྟན་ལྷིང་ཡོང་རྒྱུ་མ་ཟད། ཧོང་ཀོང་མི་དམངས་ཀྱི་ཕན་བདེར་སྲུང་སྐྱོབ་ཐོབ་རྒྱུ་ཡིན་ཞིང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་དེ་བཞིན་ལམ་ལུགས་ཡག་པོ་ཞིག་ཡིན་རེད་ཅེས་བརྗོད་འདུག
དེའི་ཐད་ཕྱི་རྒྱལ་ནང་བཙན་བྱོལ་དུ་ཡོད་པའི་ཧོང་ཀོང་གི་གྲོས་ཚོགས་འཐུས་མི་ཟུར་པ་ཞུའུ་ཀྲེ་ཕང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་དེ་ནི་ཧོང་ཀོང་དང་རྒྱ་ནག་བར་ལམ་ལུགས་མི་འདྲ་བ་གཉིས་ཡིན་པ་མཚོན་ཆེད་ཡིན་པ་དང་། ཞི་ཅིང་ཕིང་གིས་རྒྱལ་ཁབ་གཅིག་ལ་ལམ་ལུགས་གཉིས་ནི་ལམ་ལུགས་ཡག་པོ་ཞིག་ཡིན་ལུགས་བཤད་ཡོད་ཀྱང་། ཧོང་ཀོང་མི་མང་ཚོར་ཞི་ཅིང་ཕིང་གི་ཚོར་སྣང་དང་གཅིག་འཚུངས་མིན་པའི་ཚོར་བ་ཞིག་ཡོང་བཞིན་ཡོད་པ་དང་། ཧོང་ཀོང་གི་གཞི་རྩའི་ཁྲིམས་ལུགས་ནང་འགྲོ་བ་མིའི་ཐོབ་ཐང་ལ་འགན་ལེན་ཡོད་པ་བཀོད་ཡོད་ཀྱང་། ད་ཆ་ཁྲིམས་ལུགས་ཀྱི་ནང་དོན་དེ་རིགས་རྩ་བ་ནས་བརྩི་མེད་བཏང་ནས་ཧོང་ཀོང་དེ་བཞིན་རྒྱལ་ཁབ་གཅིག་ལ་ལམ་ལུགས་གཉིས་མིན་པར་རྒྱལ་ཁབ་གཅིག་ལ་ལམ་ལུགས་གཅིག་ཏུ་བསྒྱུར་ཟིན་ཡོད་པ་རེད་ཅེས་གསུངས་འདུག
ཧོང་ཀོང་གི་གསརའགྱུར་རྒྱུད་ལམ་ཁག་གིས་གནས་ཚུལ་སྤེལ་བའི་ནང་། ཕྱི་ཚེས་༣༠ཉིན་ཞི་ཅིན་ཕིང་དང་ཁོང་གི་བཟའ་ཟླ་གཉིས་ཧོང་ཀོང་ནང་འབྱོར་ནས་ཉིན་དེའི་དགོང་མོ་ཧོང་ཀོང་གི་སྤྱི་ཁྱབ་ཟུར་པ་ཁཱེ་རོས་ལེམ་གྱིས་དགོང་དྲོའི་གསོལ་སྟོན་ལ་བསྐྱོད་ཀྱི་ཡོད་པ་དང་། དེའི་རྗེས་ཧྲིན་ཀྲན་དུ་ཕྱིར་ལོག་གིས་ཕྱི་ཟླ་བདུན་པའི་ཚེས་༡གི་ཞོགས་པར་ཧྲིན་ཀྲན་ནས་ཕྱིར་ཧོང་ཀོང་ནང་ཡོང་ནས་ཧོང་ཀོང་རྩིས་ལེན་བྱས་ནས་ལོ་ངོ་༢༥འཁོར་བའི་དུས་དྲན་གྱི་མཛད་སྒོ་དང་། དེ་བཞིན་ཧོང་ཀོང་གི་སྤྱི་ཁྱབ་གསར་པའི་དམ་འབུམ་མཛད་སྒོར་ཞུགས་ནས་མཛད་སྒོ་མཇུག་སྒྲིལ་རྗེས་གནམ་གྲུར་བསྡད་ནས་པེ་ཅིན་དུ་ཕྱིར་ལོག་བྱེད་ཀྱི་ཡོད་འདུག

ཞི་ཅིང་ཕིང་ད་རེས་ཧོང་ཀོང་གི་བདག་དབང་རྩིས་ལེན་བྱས་ནས་ལོ་ངོ་ཉི་ཤུ་རྩ་ལྔ་འཁོར་བའི་དུས་དྲན་གྱི་མཛད་སྒོར་མཉམ་ཞུགས་བྱེད་བཞིན་པར་ཧོང་ཀོང་ནང་བདེ་འཇགས་ཀྱི་དམ་དྲག་ཧ་ཅང་ཆེན་པོ་བྱས་ཡོད་པ་དང་། ལྷག་པར་དུ་ཉིན་གཅིག་སྔོན་ཧོང་ཀོང་ནང་ཏོག་དབྱིབས་རིམས་ནད་འགོས་བའི་ནད་པ་མི་གྲངས་གཅིག་སྟོང་ཙམ་ཐོན་ཡོད་པ་སོགས་ཀྱིས་ད་རེས་ཞི་ཅིང་ཕིང་ལ་ནད་ཡམས་དང་། དེ་བཞིན་ཁོང་རང་ཉིད་ཀྱི་བདེ་འཇགས་ལ་གནོད་འཚེ་ཡོང་རྒྱུར་ཞེད་སྣང་ཆེན་པོ་བྱེད་ཀྱི་ཡོད་པའི་སྐོར་ཧོང་ཀོང་གི་གནད་དོན་དབྱེ་ཞིབ་པ་སྐུ་ཞབས་སང་ཕུའུ་ཡིས་འདི་གའི་རྒྱ་སྐད་སྡེ་ཚན་གྱི་གསར་འགོད་པར་འགྲེལ་བརྗོད་གནང་འདུག
ཧྥ་རན་སི་གསར་ལས་ཁང་གིས་གནས་ཚུལ་སྤེལ་བ་ལྟར་ན། ད་རེས་གློ་བུར་དུ་རྒྱ་ནག་གི་འགོ་ཁྲིད་ཞི་ཅིང་ཕིང་ཧོང་ཀོང་ནང་བསྐྱོད་པ་དེ། ཕྱི་ལོ་༢༠༡༩ལོར་རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཁྲིམས་ལུགས་གཏན་འབེབས་ལག་བསྟར་བྱ་རྒྱུ་འགོག་ཐབས་ཆེད་ཧོང་ཀོང་ནང་གཞི་རྒྱ་ཆེ་བའི་ངོ་རྒོལ་ལས་འགུལ་བྱུང་ནས་ཧོང་ཀོང་གཞུང་གིས་ངོ་རྒོལ་གྱི་ལས་འགུལ་དེར་དྲག་གནོན་བྱས་པའི་རྗེས་ཧོང་ཀོང་ནང་བསྐྱོད་པ་ཐོག་མ་དེ་ཡིན་ཞིང་། ཞི་ཅིང་ཕིང་ད་རེས་ཧོང་ཀོང་གི་བདག་དབང་རྩིས་ལེན་བྱས་ནས་ལོ་༢༥འཁོར་བའི་དུས་དྲན་གྱི་མཛད་སྒོར་བསྐྱོད་པ་དེ་ཡང་རྒྱ་ནག་དབུས་གཞུང་གིས་ཧོང་ཀོང་ནང་སྟངས་འཛིན་གྱི་དབང་ཚད་སྲ་བརྟན་གཏོང་ཐབས་ཆེད་ཡིན་པའི་སྐོར་གནས་ཚུལ་ནང་བཀོད་འདུག
ཕྱི་ཟླ་བདུན་པའི་ཚེས་༡ གཟའ་པ་སངས་ཉིན་ཧོང་ཀོང་གི་བདག་དབང་རྒྱ་ནག་གཞུང་གིས་དབྱིན་ཇིའི་དབང་འོག་ནས་རྩིས་ལེན་བྱས་ནས་ལོ་ངོ་༢༥འཁོར་བའི་དུས་དྲན་གྱི་མཛད་སྒོ་སྤེལ་གྱི་ཡོད་པ་དང་། ཧོང་ཀོང་གི་བདག་དབང་རྒྱ་ནག་གཞུང་གིས་དབྱིན་ཇིའི་ལག་ནས་རྩིས་ལེན་བྱས་པའི་སྐབས་ཕྱོགས་གཉིས་ཀྱིས་ཡོངས་ཁྱབ་གསལ་བསྒྲགས་སྤེལ་བའི་ནང་། རྒྱ་ནག་གཞུང་གིས་ཧོང་ཀོང་ནང་མ་འོངས་ལོ་ངོ་ལྔ་ཅུའི་རིང་ཧོང་ཀོང་གི་ད་ཡོད་གནས་སྟངས་ལ་བསྒྱུར་བཅོས་བྱ་རྒྱུ་མིན་པ་ཁས་ལེན་ས་རྟགས་འཁོད་ཡོད། ཡིན་ན་ཡང་ཕྱི་ལོ་༢༠༡༩ལོར་ཧོང་ཀོང་ནང་ཞི་བའི་ངོ་རྒོལ་ལས་འགུལ་བྱུང་རྗེས་རྒྱ་ནག་གཞུང་གིས་རྒྱལ་ཁབ་བདེ་འཇགས་ཀྱི་ཁྲིམས་ལུགས་ཟེར་བ་གཏན་འབེབས་ཀྱིས་ཧོང་ཀོང་ནང་ལག་བསྟར་བྱས་ནས་ཧོང་ཀོང་གི་རང་དབང་མུ་མཐུད་དུ་གནས་རྒྱུའི་ཁས་ལེན་ལ་བརྩི་མེད་རྡོག་རོལ་བཏང་ཡོད་པ་སྐྱོན་བརྗོད་བྱེད་མཁན་ཚོས་བརྗོད་ཀྱི་ཡོད་པ་རེད།
ད་རེས་ཞི་ཅིང་ཕིང་ཧོང་ཀོང་ནང་བསྐྱོད་པ་དེ་ཡང་གསང་བ་དང་བདེ་འཇགས་ཀྱི་སྲུང་སྐྱོབས་ཧ་ཅང་ནན་པོའི་འོག་བསྐྱོད་ཡོད་འདུག
རྒྱ་ནག་གཞུང་གིས་བོད་ནང་དུ་ཡང་དེ་ལྟར་གྱི་སྲིད་བྱུས་ལག་བསྟར་བྱས་ཡོད་པ་ནི། ཐོག་མར་བོད་ནང་རྒྱ་ནག་གི་དམག་དཔུང་སླེབས་པའི་སྐབས་བོད་རྒྱ་ཆེའི་མི་དམངས་བཅིངས་གྲོལ་གཏོང་མཁན་ཡིན་ལུགས་ཀྱི་དྲིལ་བསྒྲགས་ཤུགས་ཆེ་བྱས་ནས། བོད་གཞུང་གི་དེ་སྔོན་གྱི་སྒྲིག་གཞི་དང་གནས་བབས་ལ་འགྱུར་བ་གཏོང་རྒྱུ་མིན་ལུགས་ཁས་ལེན་བྱས་ཡོད་ཀྱང་། རིམ་པས་བཙན་བཟུང་བྱས་རྗེས་བོད་ནང་བོད་ནང་དྲག་གནོན་གྱིས་རྒྱ་ནག་རང་ཉིད་ཀྱི་འདོད་མོས་བཞིན་འགྱུར་བ་བཏང་ཡོད་ལུགས་དེ་སྔ་ནུབ་བྱང་མི་རིགས་སློབ་གྲྭ་ཆེན་མོའི་ནང་དགེ་རྒན་ཆེན་མོ་གནང་མྱོང་མཁན་འབུམ་རམ་པ་རྒྱལ་ལོ་ལགས་ཀྱིས་འདི་ག་རླུང་འཕྲིན་ཁང་དུ་འགྲེལ་བརྗོད་གནང་ཡོད།

གསར་འགོད་པ། འཆི་མེད།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།