རང་ལུས་མེ་བསྲེགས་བྱེད་མཁན་ཇེ་མང་ལ་འགྲོ་བཞིན་འདུག

དེ་ཡང་སི་བྷི་སི་ཞེས་པའི་གསར་འགྱུར་ལས་ཁང་གི་པེ་ཅིང་གསར་འགོད་པ་ཀེཐ་རིན་མར་སི་ཡར་ཞེས་པས་ཉེ་ཆར་རྒྱ་ནག་དང་ས་འབྲེལ་དུ་འཁེལ་བའི་བོད་ཀྱི་ས་ཁུལ་ཁག་ཅིག་ལ་གསང་བའི་ཐོག་ནས་ཕེབས་ནས་དངོས་བྱུང་གནས་ཚུལ་བཀོད་པར་གཞིགས་ན། རང་ལུས་མེར་བསྲེགས་བཏང་ཡུལ་གྱི་མིང་འདོན་མ་བྱས་པའི་བོད་པའི་དགོན་པ་ཞིག་གི་ནང་ཁོ་མོ་བསྐྱོད་དེ་དགེ་འདུན་པ་ཚོར་འདྲི་བརྩད་བྱས་པའི་སྐབས་ཁོང་རྣམས་ནས་བརྙན་པར་མ་རྒྱབ་པའི་ཐོག་ནས་བརྗོད་དོན། རྒྱ་ནག་གཞུང་ནས་ངོ་རྒོལ་བྱེད་མཁན་ཚོ་འཛིན་བཟུང་བྱས་པ་ཡིན་ན་ཉེས་པ་ཚབས་ཆེ་གཏོང་གི་ཡོད་ཀྱང་། ང་ཚོས་ངོ་རྒོལ་མུ་མཐུད་བྱེད་རྒྱུ་ཡིན་ཞེས་འགྲེལ་བརྗོད་གནང་འདུག་ལ་དགོན་པའི་ནང་དགེ་འདུན་པ་ཚོར་རྒྱ་ནག་གཞུང་ནས་རྒྱལ་གཅེས་ཆོས་གཅེས་ཀྱི་སློབ་གསོ་བཙན་ཤེད་ཀྱི་ཐོག་ནས་སྤྲོད་ཀྱི་ཡོད་པ་མ་ཟད་། བོད་ཀྱི་སྐད་ཡིག་ལ་བརྩི་མེད་རྡོག་རོལ་བཏང་ནས་རྒྱ་ཡིག་སྦྱོང་དགོས་པའི་བཙན་བཀའ་གཏོང་གི་ཡོད་པ་སོགས་གང་ལྟར་བོད་མིའི་ཆོས་དང་རིག་གཞུང་སྲུང་སྐྱོབ་ཆེད་རང་གི་སྲོག་ཚུན་ཆད་ཀྱང་བློས་གཏོང་བྱེད་ཀྱི་ཡོད་པ་སོགས་བཀོད་འདུག

ཡང་གོང་ཞུས་གསར་འགོད་པའི་སྙན་ཐོའི་ནང་མུ་མཐུད་ནས་བཀོད་པར་ལྟར་ན། འདས་པའི་ཟླ་བ་དེའི་ནང་རང་ལུས་མེར་བསྲེགས་བཏང་བ་མང་ཤོས་ཆགས་ཡོད་པ་མ་ཟད་། དེ་ལས་གྲངས་ཚད་ཇེ་མང་ལ་འགྲོ་བཞིན་འདུག རྒྱ་ནག་གཞུང་ནས་དེའི་རྒྱུ་རྐྱེན་ནི་༧གོང་ས་ཏཱ་ལའི་བླ་མ་དང་། བཙན་བྱོལ་བོད་གཞུང་ནས་བརྒྱུད་སྐུལ་བྱས་པ་རེད་ཟེར་ཉེས་བཙུགས་བྱེད་བཞིན་ཡོད་པ་དང་། བཙན་བྱོལ་བོད་གཞུང་ནས་དེར་ངོས་ལེན་མེད་ཅེས་གསུངས་ཀྱི་ཡོད་པ་རེད། གང་ལྟར་འགྲོ་བ་མིའི་ཐོབ་ཐང་ཚོགས་པ་ཁག་ནས་ཕྱི་ལོ་ ༢༠༠༩ ལོ་ནས་བཟུང་ད་བར་བོད་མི་བརྒྱ་མ་ཟིན་ཙམ་གྱིས་རང་ལུས་མེར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་བྱས་ཡོད་པ་དང་། དེ་བཞིན་རྒྱ་ནག་གཞུང་ནས་དགོན་པའི་ནང་སོ་ཉུལ་བཞག་ནས་དམ་བསྒྲཌ་ཤུགས་ཆེ་བྱེད་ཀྱི་ཡོད་ལུགས་སོགས་གནས་ཚུལ་སྤེལ་འདུག