རྒྱ་ནག་གི་སོ་པ་ཡིན་པ་དྭོགས་གཞིའི་འོག་ཡོད་པའི་པདྨ་དར་རྒྱས་ངག་དབང་ཟེར་བ་ལ་ཁ་མཆུ་ཕྱིར་འཐེན་བྱས་འདུག

ཨ་མེ་རི་ཀའི་ནང་གི་བོད་མིའི་ཐོག་གསོ་མྱུལ་བྱས་པའི་ཉེས་མིང་འོག་འཛིན་བཟུང་བཙོན་འཇུག་བྱས་པའི་ཨ་རིའི་གྲོང་ཁྱེར་ནེའུ་ཡོག་གི་ཉེན་རྟོགས་པ་པདྨ་དར་རྒྱས་ངག་དབང་ Baimadajie Angwang ལ་ཉེས་འཛུགས་དང་གྱོད་གཏུགས་བྱས་པ་ཁག་ཨ་རིའི་གཞུང་གི་གྱོད་འཛུགས་བྱེད་མཁན་གྱིས་རྒྱུ་མཚན་གསལ་ཁ་མ་བཏོན་པར་ཕྱི་ཟླ་༡་ཚེས་༡༣་ཉིན་ཕྱིར་འཐེན་བྱས་འདུག་ཨ་རིའི་གྲོང་ཁྱེར་ནེའུ་ཡོག་གི་ཉེན་རྟོག་པ་Baimadajie Angwang ཡིས་བོད་མིའི་ཐོག་གསོ་བལྟ་བྱས་པའི་ནག་ཉེས་བཙུགས་པ་དེ་ནི་ནག་ཉེས་ཚབས་ཆེ་ཞིག་ཡིན་སྐོར་ད་བར་འགྲེལ་བརྗོད་བྱས་ན་ཡང་ད་རེས་གྱོད་གཞི་དེ་ཕྱིར་འཐེན་བྱས་ཡོད་པ་དང་ཉེན་རྟོག་པ་དེའི་ཁྲིམས་རྩོད་པས་དོན་དངོས་ཐོག་ཁོ་པར་ཁྲིམས་གཏུགས་བྱེད་དགོས་པའི་ཁ་མཆུ་མེད་ལུགས་བཤད་འདུག

ཨ་རིའི་གྲོང་ཁྱེར་ནེའུ་ཡོག་ནང་གི་Brooklyn གི་གྱོད་འཛུགས་པའི་ཁྲིམས་རྩོད་པ་Breon གྱི་ཡིག་ཚང་ནས་འདི་ཟླའི་ཚེས་༡༣་སྟེ་གཟའ་པ་སངས་ཉིན་གསལ་ཁ་མེད་པའི་ཁྲིམས་ཀྱི་ཡིག་ཆ་ཞིག་གི་ཐོག་ཨ་རིའི་གཞུང་གི་ཁྲིམས་དཔོན་Eric R Komittee ལགས་ལ་ཉེན་རྟོགས་པ་Baimadajie Angwang ལ་ནག་ཉེས་བཙུགས་པ་དེ་དག་ངོས་ལེན་གནང་མི་དགོས་པའི་འབོད་སྐུལ་བྱས་འདུག ཨ་རིའི་གཞུང་གིས་ཁོ་པར་ནག་ཉེས་བཙུགས་པ་དེའི་ཐོག་གནས་ཚུལ་འཕར་མ་ཐོབ་པ་ཁག་ལ་རྟག་དཔྱད་བྱས་པའི་རྗེས་སུ་ཁོང་ལ་གྱོད་གཏུགས་དེ་གནང་བ་ཡིན་ལུགས་བརྗོད་ཀྱང་་ཞིབ་ཕྲའི་གནས་ཚུལ་གང་ཡང་གསལ་ཁ་བཏོན་མེད་སྐོར་ཕྱི་ཚེས་༡༤་ཉིན་nypost.com ཞེས་པས་གནས་ཚུལ་སྤེལ་འདུག

རང་ལོ་༣༦ ཡིན་པའི་ཨ་རིའི་གྲོང་ཁྱེར་ནེའུ་ཡོག་གི་ཉེན་རྟོག་པ་Baimadajie Angwang ཡིས་རང་ཉིད་ཉེན་རྟོག་ཡིན་པའི་གོ་གནས་བེད་སྤྱོད་ལོག་པར་བཏང་བ་དང་རྒྱ་ནག་གཞུང་གི་ཆེད་དུ་གྲོང་ཁྱེར་འདིའི་ནང་ཡོད་པའི་བོད་མིའི་སྤྱི་ཚོགས་ཐོག་གསོ་བལྟ་བྱས་པའི་ནག་ཉེས་འཕོག་ནས་ཕྱི་ལོ་༢༠༢༠་ལོའི་ཕྱི་ཟླ་༩་པའི་ནང་འཛིན་བཟུང་བྱས་པ་རེད་་སྐབས་དེར་ཁོ་པར་ནག་ཉེས་བཙུགས་མཁན་གྱིས་Angwang གྱིས་རྒྱ་ནག་གཞུང་གི་ཆེད་དུ་ནེའུ་ཡོག་གྲོང་ཁྱེར་གྱི་Manhattan ས་གནས་ལ་ཡོད་པའི་རྒྱ་ནག་གི་སྐུ་ཚབ་དོན་གཅོད་ཁང་ནང་རྟེན་གཞི་བྱས་པའི་ལས་བྱེད་པ་ཞིག་གིས་མཉམ་དུ་བོད་མིའི་ཐོག་གསོ་བལྟ་བྱ་རྒྱུ་དེ་བཞིན་ཕྱི་ལོ་༢༠༡༨ལོའི་ཕྱི་ཟླ་༥ནས་འགོ་བཙུགས་སྐོར་ཉེས་འཛུགས་བྱས་ཡོད་པ་རེད། སྐབས་དེར་ཁོ་པར་ནག་ཉེས་བཙུགས་མཁན་ཨ་རིའི་དབུས་གསང་བའི་ལས་ཁུངས་FBI ཡི་ནེའུ་ཡོག་ནང་གི་འགན་འཛིན་གྱི་ཕྱག་རོགས་William Sweeney Jr. ལགས་ཀྱིས་Angwang ནི་ཨ་ཪིའི་ནང་ནས་ཉེན་ཁ་བཟོ་མཁན་ཞིག་ཡིན་པའི་འགྲེལ་བརྗོད་གནང་བ་མ་ཟད་་ཁོ་པས་ཕྱིའི་རྒྱལ་ཁབ་གཅིག་གིས་ཚབ་བྱས་ནས་ཨ་མེ་རི་ཀའི་མི་སེར་ཡིན་པའི་བོད་མིའི་ཐོག་གསོ་བལྟ་བྱས་པ་དང་ཁོ་པར་དག་འཐེར་བཟོ་རྒྱུར་རྫུན་བཤད་པ་ དེ་བཞིན་ཁོ་པས་ཨ་རིའི་གྲོང་ཁྱེར་ནེའུ་ཡོག་གི་ཉེན་རྟོག་པ་ཡིན་པའི་གོ་གནས་བེད་སྤྱོད་བཏང་སྟེ་རྒྱ་ནག་གཞུང་གིས་ཨ་རིའི་ནང་ཁྲིམས་འགལ་གྱི་བྱ་སྤྱོད་སྤེལ་རྒྱུ་རོགས་རམ་བྱས་ལུགས་དང་ཡང་ཁོ་པས་ཉེན་རྟོགས་ལས་ཁུངས་ཀྱིས་ལས་ཀ་བྱེད་སྟངས་ཀྱི་གསང་བ་ཁག་ཀྱང་རྒྱ་ནག་ལ་མཁོ་སྤྲོད་བྱས་པའི་ནག་ཉེས་ཀྱང་བཙུགས་ཡོད་པ་སོགས་ཀྱི་གནས་ཚུལ་འདུག།། ཡང་དེ་སྔོན་ཙམ་པདྨ་དར་རྒྱས་ངག་དབང་ཟེར་བའི་ཉེན་རྟོག་པ་དེའི་བཟའ་ཟླ་དང་བཟའ་ཟླའི་ཨ་མ། དེ་བཞིན་དེ་སྔ་ཁོ་པ་ཨ་རིའི་དམག་མི་བྱེད་སྐབས་ཀྱི་རོགས་པ་བཅས་ཁྱོན་མི་དགུ་ཡིས་ཨ་སྒོར་ས་ཡ་གཅིག་གཏའ་མར་བཞག་ནས་ཁོ་པ་གློད་བཀྲོལ་ཡོང་བའི་སྙན་ཞུར་ས་ཡིག་བརྒྱབ་ཡོད་འདུག 

གསར་འགོད་པ་བསོད་ནམས་ལྷ་མོ།