རྒྱ་ནག་གིས་བོད་ནང་སྤྲད་པའི་རོགས་དངུལ་ས་གནས་རྒྱ་ནག་གི་དཔོན་རིགས་ཚོས་ལྐོག་ཟ་བྱེད་བཞིན་ཡོད་འདུག

རྒྱ་ནག་གཞུང་གིས་བོད་ཀྱི་ས་ཁུལ་ཁག་ནང་དབུལ་སྐྱོར་ཕྱུག་འགྱུར་ཟེར་བའི་ལས་གཞི་སྤེལ་བཞིན་པའི་ཁྲོད། བོད་མི་དབུལ་ཕོངས་རྣམས་ལ་རོགས་དངུལ་སྤྲད་པ་རྣམས་ས་གནས་ཀྱི་འབྲེལ་ཡོད་རྒྱ་ནག་གི་དཔོན་པོ་ཚོས་ལྐོག་ཟ་རུལ་སུངས་བྱས་ནས། བོད་མི་དབུལ་ཕོངས་རྣམས་ལ་རག་གི་མེད་པ་མ་ཟད། རོགས་དངུལ་མ་རག་པའི་དཀའ་ངལ་རྣམས་གོང་རིམ་ལ་ཞུ་ཆོག་གི་མེད་པ་དང་། གལ་སྲིད་ཞུས་ན་གཅར་རྡུང་གཏོང་བ་དང་བཙོན་འཇུག་སོགས་ཀྱི་ཉེས་ཆད་ཕོག་གི་ཡོད་པ་རང་གི་བདེ་འཇགས་ཆེད་ཡོངས་ཁྱབ་མིང་བརྗོད་འདོད་མེད་པའི་བོད་མི་ཁག་ཅིག་གིས་བརྗོད་བྱུང་།
ཉེ་ལམ་ཁམས་ལི་ཐང་ནས་ཡིན་པའི་ས་གནས་བོད་མི་ཞིག་གིས་ཁོང་སྡོད་སའི་ས་གནས་དེ་ལ་རྒྱ་ནག་གཞུང་གིས་བོད་མི་དབུལ་ཕོངས་ཀྱི་འཚོ་བ་ཡར་རྒྱས་གཏོང་གི་ཡིན་ཟེར་ནས་དངུལ་མང་པོ་ཞིག་སྤྲད་ཡོད་ནའང་། དངུལ་སྤྲོད་དགོས་སའི་བོད་མི་དེ་དག་ལ་མ་རག་པར་རྫོང་དཔོན་དང་ཡུལ་ཚོ། གྲོང་ཚོ་སོ་སོའི་འགོ་ཁྲིད་རྣམས་ཁ་མཐུན་བྱས་ནས་ལྐོག་ཟ་བྱེད་ཀྱི་ཡོད་པ་བརྗོད་ཅིང་། སྔ་ལོ་ནས་བཟུང་ཞིང་ཆེན་དང་རང་སྐྱོང་ལྗོངས་རིམ་པའི་འགོ་ཁྲིད་ཚོ་ལི་ཐང་ས་གནས་ལ་ཞིབ་འཇུག་ཆེད་འབྱོར་སྐབས། བོད་མི་ཚོར་སྐད་ཆ་ག་རེ་བཤད་དགོས་མིན་ཟླ་བ་གཅིག་གཉིས་ཀྱི་རིང་ལ་སྦྱོང་བརྡར་སྤྲད་ནས་ང་ཚོར་དངུལ་དེ་དག་རག་ཡོད་པའི་སྐོར་བཤད་བཅུག་ཡོད་པ་དང་། གལ་སྲིད། དེ་ལྟར་མ་བཤད་ན། བཙོན་འཇུག་སོགས་ཀྱི་ཉེས་ཆད་འདྲ་མིན་ཕོག་སྲིད་པའི་སྐོར་མི་མང་ལ་འཇིགས་སྐུལ་ནན་པོ་བྱས་ཡོད་པ་རེད།
ཞིང་ཆེན་དང་རང་སྐྱོང་ལྗོངས་རིམ་པའི་དཔོན་རིགས་ཁག་ས་གནས་ལ་ཞིབ་འཇུག་ཏུ་ཡོང་སྐབས། དྲི་བར་ལན་འདེབས་བྱེད་མཁན་སྔོན་ནས་གྲ་སྒྲིག་དང་སྦྱོང་བརྡར་སྤྲད་པའི་བོད་མི་དེ་ཚོ་ཡིན་པ་ལས་གཞན་གང་བྱུང་གི་སྐད་ཆ་དྲི་བ་འམ་བཤད་ཆོག་གི་མེད་པ་དང་། གལ་སྲིད་མི་མང་དེ་ཚོས་ཕྱི་ནས་ཡོང་བའི་དཔོན་པོ་དེ་ཚོར་དངོས་ཡོད་གནས་ཚུལ་བཤད་པ་ཡིན་ན། ཁ་ཤས་ལ་ཆབ་སྲིད་ཀྱི་ནག་ཉེས་དང་བཙོན་འཇུག ཁག་ཅིག་ལ་དོན་མེད་ཀྱི་གཅར་རྡུང་ཕོག་པ་སོགས་ཀྱི་གནས་ཚུལ་དེ་འདྲ་མང་པོ་ཡོང་གི་ཡོད་པའི་སྐོར་འབྲེལ་ཡོད་མི་སྣས་གསུངས་བྱུང་།
ཡང་བོད་མི་ཞིག་ལྷ་ས་ནས་འཛིན་བཟུང་བྱས་ནས་སྨར་ཁམས་ལ་བཙན་ཁྲིད་བྱས་པ་མ་ཟད། ས་གནས་ཉེན་རྟོག་པས་གཅར་རྡུང་བཏང་བའི་ཁར། བཙོན་འཇུག་བྱེད་རྒྱུའི་འཇིགས་སྐུལ་སྣ་ཚོགས་བྱས་པའི་སྐབས། ཁོང་གིས་རིམ་པ་གོང་མར་གནས་ཚུལ་དེ་ཚོ་གང་ཡང་ཞུས་མེད་ཟེར་ནས་ཁས་ལེན་རྩ་བ་ནས་བྱས་མེད་པ་བརྟེན། མཐར་ཁོང་བཙོན་འཇུག་མ་བྱས་པར་ཉེན་རྟོག་པས་ནང་དུ་གཏང་ཡོད་པ་རེད། འོན་ཀྱང་ཁོང་གི་རོགས་པ་གཉིས་པོས་ས་གནས་དཔོན་པོ་ཚོའི་ལྐོག་ཟ་བྱས་པའི་གནས་ཚུལ་དེ་ཚོ་རིམ་པ་གོང་མའི་དཔོན་རིགས་ཚོར་ཞུས་ཡོད་པའི་ཁས་ལེན་བྱས་པ་བརྟེན། ལྷ་སར་ཞུ་གཏུག་མཁན་བོད་མི་རྡོ་རྗེ་དང་དབང་འདུས་ཟེར་བ་ཁོང་གཉིས་ད་དུང་ཡང་སྨར་ཁམས་རྫོང་དུ་བཀག་ཉར་བྱས་བསྡད་ཡོད་པ་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།།

གསར་འགོད་པ། བློ་བཟང་ཆོས་འཕེལ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།