རྒྱ་ནག་གིས་སྐད་ཡིག་སྲིད་ཇུས་ཤིག་གསལ་བསྒྲགས་གནང་འདུག

རྒྱ་ནག་གཞུང་གིས་རྒྱ་སྐད་དེ་བཞིན་གོང་སྤེལ་བཏང་ནས་བོད་དང་ཤིན་ཅིང་ཐེ་བའི་གྲངས་ཉུང་མི་རིགས་ཚང་མས་རྒྱ་སྐད་རྒྱབ་ཐུབ་པ་བཟོ་དགོས་པའི་སྐད་ཡིག་སྲིད་ཇུས་ཤིག་དེ་རིང་གསལ་བསྒྲགས་གནང་འདུག
རྒྱ་ནག་གཞུང་གི་སྐད་ཡིག་སྲིད་ཇུས་དེས་གྲངས་ཉུང་མི་རིགས་ཀྱི་སྐད་ཡིག་རྣམས་རྩ་བརླག་འགྲོ་བའི་ཉེན་ཁ་ཆེ་རུ་འགྲོ་སྲིད་པ་ཞིག་ཡིན་པ་རེད། རྒྱ་ནག་ནང་། སྐད་ཡིག་སྲིད་ཇུས་ནི་རྒྱུན་རིང་ནས་མགོ་རྙོག་ཚ་པོ་ཞིག་ཡིན་པ་དང་། དམིགས་བསལ་བོད་དང་ཤིན་ཅིང་སོགས་རྒྱ་སྐད་མིན་པའི་སྐད་ཡིག་གཞན་ཤུགས་ཆེ་བེད་སྤྱོད་གཏོང་བ་དང་། ས་གནས་ཀྱི་རྒྱབ་སྐྱོར་ཡོད་པའི་ཐོག་སློབ་གྲ་ཁག་ནང་སློབ་ཁྲིད་བྱེད་ཡུལ་ཁག་ཏུ་མགོ་རྙོག་དེ་བས་ཚ་བ་ཡོད་པ་རེད།
ཉེ་བའི་ཆར་བོད་ནང་རྒྱ་ཡིག་དང་བོད་ཡིག་གཉིས་ཀ་སློབ་ཁྲིད་བྱ་རྒྱུར་ཤུགས་སྣོན་རྒྱབ་ཀྱི་ཡོད་ཐོག་ཕ་མ་མང་པོས་རྒྱ་སྐད་སྦྱང་པ་ཡིན་ན། ལས་ཀ་རག་བདེ་བ་སོགས་ཀྱི་ཆ་ནས་ཕྲུ་གུར་རྒྱ་སྐད་སློབ་འདོད་བྱེད་ཀྱི་ཡོད་ཀྱང་བོད་ནང་བོད་ཡིག་ཉམ་རྒུད་དང་། རྒྱ་སྐད་ཁྱབ་སྤེལ་གཏོང་བཞིན་པར་ངོ་རྒོལ་ཡང་བྱུང་ཡོད་པ་རེད།
རྒྱ་ནག་གཞུང་གིས་མི་ལོ་བཅུ་ཕྲག་མང་པོ་ནས་བཟུང་བོད་སྐད་དང་ཡུ་གུར་སྐད་ཡིག་ཤུགས་ཆེ་བེད་སྤྱོད་བྱ་ཡུལ་ཁག་ཏུ་རྒྱ་སྐད་ཁྱབ་སྤེལ་གཏོང་ཐབས་བྱས་ནས་མན་རྡ་རིན་རྒྱ་སྐད་དེ་བཞིན་རྒྱ་ནག་རྒྱལ་ཡོངས་ཀྱི་སྐད་ཡིག་བཟོ་ཐབས་གནང་བཞིན་པ་རེད།
རྒྱ་ནག་དབུས་གཞུང་གིས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ལོ་ལྔའི་ནང་མན་རྡ་རིན་རྒྱ་སྐད་གོང་སྤེལ་གཏོང་རྒྱུའི་ལས་འཆར་ཀྱི་ཡིག་ཆ་མང་པོ་ཞིག་བཟོས་ཡོད་པ་དང་། དེ་བཞིན་མན་རྡ་རིན་རྒྱ་ཡིག་ཡང་གོ་བདེ་བ་དང་། སྟབས་བདེ་བ་ཞིག་གཞུང་འབྲེལ་ཐོག་ནས་བཟོས་ནས་མ་འོངས་མན་རྡ་རིན་རྒྱ་ཡིག་དེ་བཞིན་རྒྱ་ནག་རྒྱལ་ཡོངས་ཀྱི་གཞུང་འབྲེལ་སྐད་ཡིག་བཟོ་རྒྱུའི་དམིགས་ཡུལ་འཛིན་བཞིན་ཡིན་འདུག
འདི་ཚེས་༢༥་ཉིན་རྒྱ་ནག་གཞུང་གིས་ས་ཁུལ་དང་མི་རིགས་སོགས་ཀྱི་མིང་འདོན་མ་གནང་བའི་ཐོག་རྒྱ་སྐད་བེད་སྤྱོད་ཉུང་བ་བྱེད་ཡུལ་ས་ཁུལ་ཁག་ལ་མན་རྡ་རིན་རྒྱ་ཡིག་གོང་སྤེལ་གཏོང་རྒྱུར་དམིགས་བསལ་ཤུགས་རྒྱག་དགོས་པ་རེད་ཅེས་བཤད་འདུག
དེ་བཞིན་རྒྱ་ནག་གཞུང་གིས་གྲངས་ཉུང་མི་རིགས་ཀྱི་སྐད་ཡིག་རྩ་བརླག་འགྲོ་ངེས་ཡིན་པ་རྣམས་སྲུང་སྐྱོབ་བྱ་རྒྱུ་ཡིན་ཞེས་ཁས་ལེན་ཡང་བྱས་ཡོད་ལུགས་རོའུ་ཀྲར་གསར་འགྱུར་ལས་ཁང་གིས་གནས་ཚུལ་སྤེལ་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཚོད་དཔག་གནང་བར་གཞིགས་ན། རྒྱ་ནག་ནང་མན་ཇུ་སྐད་ཡིག་ཐེ་བའི་སྐད་ཡིག་བརྒྱ་ལྷག་ད་ཆ་རྩ་བརླག་འགྲོ་བའི་ཉེན་ཁར་སླེབས་ཡོད་འདུག

གསར་འགོད་པ་ཚེ་དབང་དངོས་གྲུབ།