ཨ་མི་རི་ཀའི་ University of Colorado གཙུག་ལག་སློབ་གཉེར་ཁང་ནང་༸ གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་དང་སྐུའི་ཡང་སྲིད་དང་འབྲེལ་བའི་བགྲོ་གླེང་ཚོགས་འདུ་ཞིག་ཚོགས་ཡོད་པ།

ཕྱི་ཟླ་ ༩པའི་ཚེས་ ༡༢ དང་ ༡༣ ཉིན་གཉིས་ཀྱི་རིང་ཨ་རིའི་ Colorado གཙུག་ལག་སློབ་གཉེར་ཁང་ནང་༧གོང་ས་སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་དང་སྐུའི་ཡང་སྲིད་དང་འབྲེལ་བའི་བགྲོ་གླེང་དེའི་ཐོག་འདས་པ་དང་ད་ལྟའི་ཡང་སྲིད་སྐོར་གྱི་ལམ་ལུགས་དང་གནང་སྲོལ་ཁག དེ་བཞིན་དུས་རབས་མང་པོ་དང་སྐུ་ཕྲེང་མང་པོའི་རིང་ལ་དད་ལྡན་པ་ཚོའི་ཁྲོད་དུ་དད་སེམས་ཇི་ལྟར་བསྐྱེད་པ་དང་ཇི་ལྟར་རྒྱུན་སྲིང་བྱས་པའི་སྐོར་། དེང་སྐབས་ཀྱི་བོད་ཀྱི་གནས་བབ་ཛ་དྲག་དང་ས་བབ་ཆབ་སྲིད་གནས་སྟངས་འོག་།རྒྱ་ནག་གཞུང་ཡིན་ན་རེད་། བོད་མིའི་སྒྲིག་འཛུགས་ཡིན་ནའང་རེད། མ་འོངས་ཡང་སྲིད་ཀྱི་གནད་དོན་དེ་ག་འདྲ་ཆགས་རྒྱུ་ཡིན་པ་སོགས་ཀྱི་བགྲོ་གླེང་གནང་ཡོད་པ་རེད་འདུག
དེ་བཞིན་ཐེངས་འདིའི་བགྲོ་གླེང་ཚོགས་འདུ་དེའི་ཐོག་གཏམ་བཤད་གནང་མཁན་གཙོ་བོ་’འབུམ་རམས་པ་ཟླ་བ་བློ་སྐྱིད་ཚང་དང་ཀི་ལོམ་རྦི་ཡ་གཙུག་ལག་སློབ་གཉེར་ཁང་གི་ཆབ་སྲིད་རིག་པའི་འབུམ་རམས་པ་བསྟན་འཛིན་རྡོ་རྗེ་ལགས་དང་ Aarhus གཙུག་ལག་སློབ་གཉེར་ཁང་གི་ཆེད་མཁས་པ་ Cameron Warner དང་ Old Dominion གཙུག་ལག་སློབ་གཉེར་ཁང་གི་བོད་རིག་པའི་ཆེད་མཁས་པ་ Nicole Wilock Free སོགས་མཉམ་ཞུགས་གནང་ཡོད་པ་རེད་འདུག ཡང་གནས་ཚུལ་ནང་།ཕྱི་ལོ་༢༠༢༢ ལོར་རྒྱལ་སྤྱིའི་ཉམས་ཞིབ་པའི་ཚོགས་ཁག་ཅིག་གིས་ཉམས་ཞིབ་དྲ་གནས་ཤིག་གསར་འཛུགས་ཀྱིས་ཡང་སྲིད་ཀྱི་གནད་དོན་ཐད་ཉམས་ཞིབ་བརྒྱུད་༧གོང་ས་མཆོག་གི་སྐོར་གྱི་གནད་འགག་གི་དུས་སྐབས་འདིའི་ཟིན་བྲིས་དང་ཡང་སྲིད་སྐོར་ཤེས་རྟོགས་བྱེད་དགོས་པའི་སྐོར་བཀོད་ཡོད་པ་རེད་འདུག གོང་ཞུས་སྤྱི་ནོར་ ༸གོང་ས་ ༸སྐྱབས་མགོན་ཆེན་པོ་མཆོག་གི་དབུ་ཁྲིད་དང་སྐུའི་ཡང་སྲིད་དང་འབྲེལ་བའི་བགྲོ་གླེང་ཚོགས་འདུ་དེ་ University of Colorado གཙུག་ལག་སློབ་གཉེར་ཁང་གི་ཨེ་ཤི་ཡའི་སློབ་གླིང་སྡེ་ཚན་དང་ Tibet Himalaya Initiative ཞེས་པའི་ཨེ་ཤི་ཡའི་སློབ་གཉེར་བལྟི་ཁང་དང་ Aarhus གཙུག་ལག་སློབ་གཉེར་ཁང་གི་རིག་གཞུང་དང་སྤྱི་ཚོགས་སློབ་གླིང་བཅས་ནས་ཐེངས་འདིའི་བགྲོ་གླེང་ལ་མཐུན་རྐྱེན་སྦྱར་གནང་བ་ཞིག་ཡིན་པ་རེད་འདུག

གསར་འགོད་པ་། ལྕག་མོ་མཚོ།
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་སྤེལ་མཁན། ནོར་སྡེ་སྒྲོལ་མ།