བཙན་བྱོལ་བོད་མིའི་ཁྲིམས་ལུགས་སྦྱོང་བརྡར།

སྐབས་དེར་སྐུ་མགྲོན་གཙོ་བོ་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསུང་བཤད་གནང་བའི་ནང་། ཁྲིམས་ལ་བཅའ་ཁྲིམས་དང་། ཉེས་ཁྲིམས་གཉིས་ཡོད་པ་ལས་  ཉེས་ཁྲིམས་དེ་བཙོན་འཇུག་གི་ཉེས་པ་ཕོག་རྒྱུ་ཆགས་ཡོད་པ་དང། བཅའ་ཁྲིམས་དེ་དངུལ་སོགས་ཆད་པ་རྒྱག་རྒྱུ་ཆགས་ཡོད། དེ་གཉིས་ཐད་ཀར་འབྲེལ་བ་ཡོད་པའི་ཆ་ནས་བཙན་བྱོལ་བོད་མིའི་ཁྲིམས་ཞིབ་ཁང་གི་ཉེས་ཁྲིམས་ཐོག་ནས་ཁྲིམས་ཐག་བཅད་གནང་གི་མེད་ལུགས་བཀའ་གནང་བཞག། དེ་བཞིན་བཀའ་བློན་ཁྲི་པ་མཆོག་གིས་ ང་ཚོའི་སྤྱི་ཚོགས་ནང་ཁ་མཆུ་ཞེ་དྲག་མེད་པ་དེ་ཕྱོགས་གཅིག་ནས་རྙོག་དྲ་མེད་པ་དང་། དྲང་པོ། རང་དབང་ཡོད་པ་བརྩིས་པ་ཡིན་ཀྱང་། དངོས་ཡོད་གནས་སྟངས་ལ་གང་འདྲ་ཆགས་ཡོད་དམ་ཞེ་ན།་ ང་ཚོའི་སྤྱི་ཚོགས་ཙམ་མིན་པར་འཛམ་གླིང་སྤྱི་ཡོངས་ནང་སྐྱོ་པོ་རྣམས་ལ་ཁྲིམས་ལུགས་རྩོད་རྒྱུའི་གོ་རྟོགས་མེད་པ་སོགས་ཀྱི་རྐྱེན་པས་གྱོང་རག་གི་ཡོད་ཅེས་སོགས་གསུང་གནང་བཞག་།

ཐེངས་འདིའི་ ཉིན་གྲངས་བཅུའི་ཟབ་སྦྱོང་འདིར་ས་གནས་ཁྲིམས་ཞིབ་པ་གསུམ་དང་  གཞན་ས་གནས་ཁག་ལྔ་དང་དབུས་ལས་ཁུངས་ཁག་བཅས་ཁྱོན་མི་གྲངས་ ༢༦ ནས་མཉམ་ཞུགས་གནང་ཡོད་པ་དང་  ཟབ་སྦྱོང་ནང་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དང་ས་གནས་ཁྲིམས་ཞིབ་པ་བཅས་ཀྱི་ སྤྱི་མང་གཏུགས་བཤེར་ཁྲིམས་ཡིག་དོན་ཚན་ ༡ ནས་ ༨༨ བར་གཙོས་པའི་རྩ་འཛིན་ཁྲིམས་ཡིག་ཁག་གསུམ་དང་། བཅའ་ཁྲིམས། ཁྲིམས་རྩོད་པའི་བླང་དོར་ལམ་སྟོན། ཁ་མཆུའི་ཞུ་རྩ་དང་། ཞུ་ལན་འབྲི་སྟངས། ཁ་མཆུ་ཞུ་གཏུག་སྐོར་སོགས་སློབ་ཁྲིད་གནང་རྒྱུ་ཡིན་འདུག་།  ཟབ་སྦྱོང་ཀྱི་ཉིན་མཐའ་མའི་ཉིན་བོད་མིང་མང་སྤྱི་འཐུས་ལྷན་ཁང་གི་ཚོགས་གཙོ་སྤེན་པ་ཚེ་རིང་མཆོག་གིས་ཟབ་སྦྱོང་ནང་མཉམ་ཞུགས་གནང་མཁན་རྣམས་ལ་ལག་འཁྱེར་ཡང་གནང་རྒྱུ་ཡིན་འདུག།