རང་ལུས་མེར་སྲེག་མ་གནང་བར་ཤེས་ཡོན་སློབ་སྦྱོང་ལ་འབད་རོགས།

བོད་བསྟན་སྲིད་མི་རིགས་བཅས་པའི་དོན་དུ་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་བ་ཝ་ན་དབུས་བོད་ཀྱི་སློབ་གཉེར་ཁང་གི་སློབ་མ་བསྟན་འཛིན་ཆོས་དབྱིངས་ལགས་ཀྱི་སྐུ་ཕུང་བཞུགས་སྒར་རྡ་རམ་སཱ་ལ་ནས་ཞུགས་འབུལ་ཞུས་སྐབས་བོད་མི་བརྒྱ་ཕྲག་མང་པོ་ལྷན་བཞུགས་གནང་འདུག
དེ་ཡང་འདི་ཚེས་༢༦་ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག་བཞུགས་སྒར་རྡ་རམ་ས་ལའི་ལྷ་རྒྱལ་རིར་བསྟན་འཛིན་ཆོས་དབྱིངས་ལགས་དམ་པ་དེར་མྱ་ངན་གུས་བཏུད་དང་། ཁོང་གི་སྐུ་ཕུང་ཞུགས་འབུལ་གྱི་མཛད་སྒོ་ཞིག་འཚོགས་སྐབས་དམ་དེའི་ཕ་མ་རྣམ་གཉིས་དབུས་པའི་ནང་མི་སྤུན་མཆེད་རྣམས་དང་། སྤྱི་འཐུས་ཚོགས་གཙོ་ཚོགས་གཞོན་དང་རྒྱུན་ལས་རྣམ་པ། བཀའ་བློན་ཁག་ཅིག གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་བརྒྱ་ཕྲག་མང་པོ་ལྷན་ཞུགས་གནང་འདུག
ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བཏང་གནང་བ་དང་། རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ལ་གདུང་སེམས་མཉམ་བསྐྱེད་དང་མྱ་ངན་གུས་འདུད་ཆེད་ངག་བཅད་སྐར་མ་གཅིག་རིང་ཞུས་པའི་རྗེས་སུ། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲི་གཅོད་ལགས་ཀྱིས་བསྟན་འཛིན་ཆོས་དབྱིངས་ལགས་ནས་སྐུ་ལུས་མེར་བསྲེགས་གནང་སྟེ་འདས་གྲོངས་ཕྱིན་པའི་བར་གྱི་བརྒྱུད་རིམ་སྐོར་དང་། དེ་ནས་ཁོང་གི་སྐུ་ཚེའི་ལོ་རྒྱུས་ངོ་སྤྲོད་གནང་འདུག ཡང་སྐབས་དེར་བསྟན་འཛིན་ཆོས་དབྱིངས་ལགས་དམ་དེའི་ཕ་ངག་དབང་མཁས་གྲུབ་ལགས་ཀྱིས་བོད་པའི་སློབ་མ་རྣམས་ནས་བོད་ཀྱི་རྩ་དོན་ཆེད་རང་ལུས་མེར་སྲེག་གི་ཐབས་ལམ་མ་འདེམས་པར་ཤེས་ཡོན་ཐོག་ནས་འཐབ་རྩོད་རྒྱུན་སྐྱོང་གནང་རྒྱུ་ཧ་ཅང་གལ་ཆེ་ཡིན་སྐོར་དང་། ལྷག་དོན་དུ་བོད་ཀྱི་སྐད་ཡིག་ལ་དོ་སྣང་གནང་དགོས་པའི་འབོད་སྐུལ་ཤུགས་ཆེ་གནང་འདུག་ལ་བུ་དམ་པ་དེས་བྲིས་གནང་བའི་ཚིག་བཅད་མི་འདྲ་བ་གཉིས་ལྗགས་གློག་གནང་བའི་ནང་། བོད་པའི་རིག་གཞུང་དེ་བོད་པས་མ་བཟུང་ན་སུ་ཡིས་བཟུང་། བོད་པའི་བོད་སྐད་དེ་བོད་པས་མ་བཟུང་ན་སུ་ཡིས་བཟུང༌། བོད་པས་ནང་ཁུལ་ལ་མཐུན་སྒྲིལ་མ་བྱེད་ན་སུ་ཡིས་བྱེད། མཐུན་སྒྲིལ་བྱས་ན་གཞན་གྱིས་གནོད་པ་བྱས་ཀྱང་མི་གནོད། ཅེས་འཁོད་ཡོད་འདུག
མང་ཚོགས་ཀྱིས་དམ་པ་དེའི་སྐུ་ཕུང་ལ་མཇལ་དར་སྒྲོན་སྒྲུབ་པའི་རྗེས་སུ་མི་མང་བརྒྱ་ཕྲག་མང་པོས་བྱང་ཆུབ་སེམས་མཆོག་རིན་པོ་ཆེའི་ཞལ་འདོན་གསུང་བཞིན་དུ་སྐུ་ཕུང་དུར་ཁྲོད་ལ་གདན་འདྲེན་ཞུས་ནས་དེར་སྨོན་ལམ་ཁག་གསུང་དོན་དང་སྦྲགས་སྐུ་ཕུང་ཞུགས་འབུལ་ཞུས་འདུག

གསར་འགོད་པ་སེང་གེ་རི་བསོད་ནམས་ལྷ་མོ།