སྲིད་སྐྱོང་མཆོག་གིས་སློབ་ཕྲུག་ཁག་ཅིག་ལ་བོད་དང་བཙན་བྱོལ་ནང་གི་གནས་སྟངས་ངོ་སྤྲོད་གནང་བ།

དེ་ཡང་དགུན་ཁའི་རིག་གཞུང་ངོ་སྤྲོད་ལས་གཞིའི་ནང་མཉམ་ཞུགས་གནང་མཁན་སློབ་ཕྲུག་ཚོར་རེས་གཟའ་ཟླ་བའི་སྔ་དྲོ་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་སློབ་གནང་བ་དང་། ལས་གཞི་དེའི་ནང་མཉམ་ཞུགས་གནང་མཁན་སློབ་ཕྲུག་ཚོར་བོད་ཀྱི་ས་ཁམས་དང་། བོད་ཀྱི་ལོ་རྒྱུས་ད་ལྟའི་གནས་སྟངས་སྐོར་ཤེས་རྟོགས་ཡོང་ཐབས་ཀྱི་ཆེད་དུ་དམིགས་ཏེ་བཀའ་སློབ་གནང་ཡོད་ཅིང་། ལས་གཞི་དེའི་ནང་མཉམ་ཞུགས་གནང་མཁན་སློབ་ཕྲུག་མང་ཆེ་བ་ནི་རྒྱ་གར་ནང་གི་སྒེར་གྱི་སློབ་གྲྭ་ཁག་ནང་སློབ་གཉེར་བྱེད་མཁན་ཡིན་པ་དང་། དུས་ཡུན་ཚོུད་གཅིག་རིང་ལ་སྲིད་སྐྱོང་མཆོག་དང་ཕན་ཚུན་ཐུགས་འཕྲད་སྐབས་གནས་ཚུལ་འདྲ་མིན་ཐོག་ལ་བཀའ་མོལ་གནང་བ་མ་ཟད། ད་དུང་སྲིད་སྐྱོང་མཆོག་གིས་སློབ་ཕྲུག་ཚོར་དཔེ་དེབ་མང་པོ་ལྟ་ཀློག་བྱས་ན་བོད་ཀྱི་གནས་སྟངས་ཤེས་རྟོགས་ཡག་པོ་ཐུབ་ནས་མི་གཞན་ལ་བོད་ཀྱི་གནས་སྟངས་འགྲེལ་བརྗོད་བྱེད་པར་ཕན་ཐོགས་ཡོང་རྒྱུ་ཡིན་པའི་ལམ་སྟོན་གནང་ཡོད་ལ། ད་ལྟའི་བོད་ནང་གི་ཆབ་སྲིད་ཀྱི་གནས་བབ་དང་། རྒྱ་ནག་ཞུང་གིས་བོད་ལ་བཙན་འཛུལ་བྱས་པའི་རྗེས་རྒྱ་གར་ནང་བོད་མིའི་གཞིས་ཆགས་བྱུང་རིམ་ཇི་ལྟར་ཡིན་པ། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་མིའི་སྤྱི་ཚོགས་དེ་དེང་རབས་དང་མཐུན་པའི་དམངས་གཙོ་གསར་གཏོད་གནང་བ་དང་། བཙནབྱོལ་ནང་བོད་མིའི་གཞིས་ཆགས་ཁག་གསར་འཛུགས་གནང་བའི་གནས་སྟངས། ད་ལྟའི་རྒྱ་གར་ནང་གི་བོད་མིའི་གཞིས་ཆགས་ནང་གི་བོད་མིའི་མི་འབོར་ཉུང་དུ་འགྲོ་བའི་དཀའ་ངལ་སོགས་ཀྱི་གནས་ལུགས་རྣམས་ངོ་སྤྲོད་གནང་ཡོད་པ་རེད་འདུག
ད་དུང་སྲིད་སྐྱོང་མཆོག་གིས་མཇུག་བསྡོམས་ཀྱི་གསུང་བཤད་མ་གནང་གོང་དབུས་བོད་མིའི་སྒྲིག་འཛུགས་ཀྱི་གནས་སྟངས་མདོར་བསྡུས་ངོ་སྤྲོད་གནང་ཡོད་པ་རེད་འདུག
གསར་འགོད་པ། ལྕགས་མོ་འཚོ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་སྤེལ་མཁན། ཡེ་ཤེས་བཀྲ་ཤིས།