སྲིད་སྐྱོང་མཆོག་ཨ་རིའི་གྲོས་ཚོགས་ནང་དངོས་སུ་བཅར་ནས་བོད་དོན་ཁྲིམས་ཡིག་གཏན་འབེབས་བྱུང་བར་ཐུགས་རྗེ་ཆེ་ཞུས་འདུག

ཨ་རིའི་རྒྱལ་ས་ཝ་ཤིན་ཀྲོན་དུ་ཨ་རིའི་གྲོས་ཚོགས་ཀྱི་ཚོགས་ཁང་ཞིག་ནང་དགའ་སྟོན་མཛད་སྒོའི་སྐབས། ༠༧།༢༥།༢༠༢༤

དེ་ཡང་ཨ་རིའི་རྒྱལ་སར་ཡོད་པའི་བོད་ཀྱི་སྐུ་ཚབ་དོན་གཅོད་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་ཟུང་འབྲེལ་གྱིས་ཕྱི་ཚེས་༢༥ཉིན་སྲིད་སྐྱོང་སྤེན་པ་ཚེ་རིང་ལགས་དང་མཉམ་དུ་ཨ་རིའི་རྒྱལ་ས་ཝ་ཤིན་ཀྲོན་དུ་ཨ་རིའི་གྲོས་ཚོགས་ཀྱི་ཚོགས་ཁང་ཞིག་ནང་། བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་འཆར་དངོས་སུ་ཁྲིམས་ཡིག་ལ་གཏན་འབེབས་བྱུང་བར་དགའ་བསུ་དང་། བོད་དོན་ཁྲིམས་ཡིག་དེར་རྒྱབ་སྐྱོར་གནང་མཁན་དང་སྐུ་ལས་བསྐྱོན་མཁན་ཨ་རིའི་གཞུང་དང་གྲོས་ཚོགས་འཐུས་མི་རྣམས་ལ་ཐུགས་རྗེ་ཆེ་ཞུ་བའི་མཛད་སྒོ་ཞིག་འཚོགས་གནང་ཡོད་པ་དང་། དེའི་ཐོག་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ནན་སི་པེ་ལོ་སི་(Nancy Pelosi)་ལགས་དང་། ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་མཡེཀེལ་མེཀོལ་(Michael McCaul)་ལགས། ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་(Jim McGovern) ལགས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་སོགས་ཀྱི་གཙོས་བོད་མི་དང་བོད་དོན་རྒྱབ་སྐྱོར་བ་ཁག་གཅིག་མཉམ་ཞུགས་གནང་ཡོད་ཅིང་། ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་མཡེཀེལ་མེཀོལ་(Michael McCaul)་ལགས་ཀྱིས་མཛད་སྒོའི་ཐོག བོད་དེ་རྒྱ་ནག་གི་ཆ་ཤས་ནམ་ཡང་མིན་པ་དང་། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པ་གསལ་བོར་བཀོད་ཡོད་པའི་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་གསར་པ་དེ་བརྒྱུད་ཨ་མི་རི་ཀའི་ངོས་ནས་བོད་དོན་ལ་རྒྱབ་སྐྱོར་སྔར་ལྷག་གནང་རྒྱུ་ཡིན་པ་ནན་གསུངས་གནང་པ་དང་མཉམ། ད་དུང་ཁོང་གིས་ཁྲིམས་ཡིག་དེ་ཡིས་ང་ཚོས་བོད་མི་རྣམས་བརྗེད་མེད་པ་གསལ་སྟོན་དང་། སྤྱི་ནོར་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་ནི་བོད་ཀྱི་ལོ་རྒྱུས་ནང་གལ་འགངས་ཆེ་ཤོས་དེ་ཡིན་སྲིད་ཅེས་བསྔགས་བརྗོད་འབྲེལ་ཞབས་པུས་སྨན་བཅོས་གང་མྱུར་དྭངས་བསྐྱེད་ཡོང་བའི་སྨོན་འདུན་ཞུས་གནང་སོང་།

ཡང་ཨ་རིའི་གྲོས་ཚོགས་འཐུས་མི་(Jim McGovern)་ལགས་ཀྱིས། བོད་དོན་ཁྲིམས་ཡིག་འདི་བརྒྱུད་ང་ཚོས་བོད་མི་རྣམས་ལ་རྒྱབ་སྐྱོར་དང་ཆིག་སྒྲིལ་གྱི་རྣམ་པ་སྟོན་གྱི་ཡོད་ལ། བོད་དོན་ཁྲིམས་ཡིག་འདིས་ལོ་རྒྱུས་ཀྱི་བདེན་པ་ཁུངས་བཙན་ཁག་ཐེག་བྱེད་བཞིན་པ་གསུངས་སོང་།
མཛད་སྒོའི་ཐོག་ད་དུང་བོད་དོན་ཐོག་ཤུགས་ཆེའི་རྒྱབ་སྐྱོར་གནང་མཁན་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ནན་སེ་པེ་ལོ་སི་མཆོག་གིས་གཏམ་བཤད་གནང་སྐབས། ཕྱི་ལོ་༢༠༠༧ལོར་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་བའི་སྐོར་དྲན་གསོ་གནང་བ་དང་མཉམ། སྲིད་འཛིན་ཟུར་པ་བྷུ་ཤུ་དང་ལྕམ་ལོའི་རེ་བྷུ་ཤུ་རྣམ་གཉིས་མཛད་སྒོར་ཞུགས་པའི་གལ་ཆེའི་རང་བཞིན་དེར་རྒྱ་ནག་གིས་དོ་སྣང་ཆེན་པོ་བྱས་ནས་མི་དགའ་བའི་རྣམ་འགྱུར་ཤུགས་ཆེན་པོ་བསྟནཡོད་པའི་སྐོར་སོགས་གསུངས་ཡོད་པ་རེད།

བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་དེའི་དམིགས་ཡུལ་ནི། ཨ་མི་རི་ཀས་བོད་མིའི་ཐོབ་ཐང་དང་རིག་གཞུང་སྲུང་སྐྱོབ་ལ་རྒྱབ་སྐྱོར་ཤུགས་ཆེ་རུ་གཏོང་རྒྱུ་ཡིན་པ་མ་ཟད། ཁྲིམས་ཡིག་དངོས་སུ་ཁྲིམས་ཐོག་གཏན་འབེབས་བྱུང་བ་དེས་ཁྲིམས་འཛུགས་ཀྱི་རྒྱབ་ལྗོངས་སུ་ཕྱོགས་གཉིས་ཀྱི་འབད་བརྩོན་གསལ་སྟོན་བྱས་ཏེ་བོད་མིར་འཕྲད་བཞིན་པའི་འགྲན་སློང་ལ་ཁ་གཏད་གཅོག་པའི་ཁས་ལེན་ཡང་བསྐྱར་དུ་བྱུང་ཡོད་པ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་གསུངས་ཡོད་འདུག
དེ་བཞིན་ལྕམ་ནན་སེ་པེ་ལོ་སི་ལགས་ཀྱིས་སྲིད་སྐྱོང་སྤེན་པ་ཚེ་རིང་ལགས་ཀྱིས་བོད་དོན་གོ་རྟོགས་སྤེལ་བའི་ལས་དོན་ལ་འབད་བརྩོན་ལྷོད་མེད་གནང་བར་བསྔགས་བརྗོད་གནང་བ་དང་འབྲེལ། སྲིད་སྐྱོང་མཆོག་ལ་ཨ་མི་རི་ཀའི་རྒྱལ་ཡོངས་དམངས་གཙོ་ཐེབས་རྩ་ཁང་གི་༢༠༢༤ལོའི་དམངས་གཙོའི་ཞབས་ཞུའི་གཟེངས་རྟགས་ཐོབ་པར་དགའ་བསུའི་འཚམས་འདྲི་གནང་ཡོད་པ་རེད།

གསར་འགོད་པ། རིག་ལྡན་སྒྲོལ་མ། བསྟན་འཛིན་བདེ་སྐྱིད། ཀླུ་འབུམ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།