གླུ་བ་གཉིས་གར་སོང་ཆ་མེད།


2013.06.13
གླུ་བ་པདྨ་འཕྲིན་ལས་ལགས་དང་། གླུ་བ་ཕྱག་རྡོར་ལགས།
ཀིརྟིའི་བྱེས་པ་གྲྭ་ཚང་།

༄༅།    །བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་དེ་རིང་བཏང་བའི་གནས་ཚུལ་ལྟར་ན།  ཕྱི་ལོ་༢༠༡༢ ལོའི་ཟླ་༧ པ་ཡས་མས་སུ་བོད་མདོ་སྨད་རྔ་པ་རང་སྐྱོང་ཁུལ་རྔ་པ་རྫོང་རྨེའུ་རུ་མའི་རུ་ཆེན་དང་པོའི་གླུ་བ་པདྨ་འཕྲིན་ལས་ལགས་དང་། གླུ་བ་ཕྱག་རྡོར་ལགས་གཉིས་ཀྱིས་ད་ལྟའི་རང་ལུས་མེར་སྲེག་སོགས་བོད་ནང་གི་གནས་སྟངས་དང་། ༸གོང་ས་མཆོག་དང་། ༸པཎ་ཆེན་རིན་པོ་ཆེ། ཀིརྟི་རིན་པོ་ཆེ་སོགས་དྲན་གླུ་དང་བསྟོད་གླུ། དེ་བཞིན་བློ་བཟང་སེང་གེའི་བསྟོད་གླུ་སོགས་ཡོད་པའི་གླུ་གཞས་ཆེད་སྒྲིག་(སོས་མེད་རྨ་ཁའི་ཟུག་གཟེར་)ཞེས་པའི་འོད་སྡེར་ཞིག་འགྲེམས་སྤེལ་བྱས་ནས་ཉིན་ཤས་ལས་མ་སོང་བར་གླུ་བ་ཁོང་གཉིས་རྨ་ཆུ་རྫོང་ཐོག་ནས་འཛིན་བཟུང་བྱས་ཏེ་ཟླ་བ་༦ ལྷག་ལ་རྔ་པ་རྫོང་དུ་བཀག་ཉར་བྱས་ཡོད་པ་རེད།    དེ་རྗེས་ད་ལོའི་ཕྱི་ཟླ་༢ ནང་ལོ་གཉིས་རེའི་བཙོན་འཇུག་ཁྲིམས་ཐག་བཅད་དེ་སི་ཁྲོན་གྱི་མེན་ཡང་ཞེས་པའི་ས་ གནས་ཀྱི་བཙོན་ཁང་ཞིག་ཏུ་བསྐྱལ་ཡོད་ཚུལ་གྱི་ཡི་གེ་ཞིག་འབྲེལ་ཡོད་ནང་མི་ལ་སྤྲད་ཡོད་ཀྱང་།  ད་བར་ཁོང་གཉིས་ཀྱི་ནང་མི་རྣམས་ཐེངས་གཉིས་ཐུག་འཕྲད་ཆེད་ཕེབས་ཡོད་ཀྱང་།    ས་གནས་ཀྱི་འབྲེལ་ཡོད་ཚོས་ཁོང་གཉིས་འདིར་མེད་ཚུལ་བརྗོད་ནས་ཐུག་འཕྲད་བྱེད་ཐུབ་མེད་པར་བརྟེན།     ཁོང་གཉིས་ཀྱི་གནས་སྟངས་དང་གར་ཡོད་སོགས་གསལ་པོ་ཤེས་རྟོགས་བྱུང་མེད་པ་རེད།
གླུ་བ་པདྨ་འཕྲིན་ལས་ལགས་རང་ལོ་༢༢ དང་། ཕ་མིང་ལ་འཛམ་ལྷ་ཟེར་ཞིང་གྲོངས་ཟིན་པ་དང་། མ་མིང་ལ་ཚེ་རིས་མ་ཡིན་འདུག གླུ་བ་ཕྱག་རྡོར་ལགས་རང་ལོ་༣༢ ཙམ་དང་།  ཕ་མིང་ལ་མཆོག་ལྡན་མདོ་བ་ཡིན་འདུག གླུ་བ་ཕྱག་རྡོར་ལགས་ནི་ཕྱི་ལོ་༢༠༡༢ ཟླ་༨ ཚེས་༡༠ ཉིན་རང་ལུས་མེར་སྲེག་གནང་སྟེ་འདས་གྲོངས་སུ་གྱུར་པའི་རྒྱལ་གཅེས་གཅོད་པ་ལགས་ཀྱི་ཕ་སྤུན་གྱི་སྤུན་ཡིན་པ་དང་། གླུ་བ་ཁོང་གཉིས་ཀྱང་ཉེ་འབྲེལ་ཞིག་ཡིན་འདུག དེ་མིན་རོལ་མོའི་རམ་འདེགས་པ་མཁྱེན་རབ་དང་ཚིག་རྩོམ་པ་པོ་ཉག་ལྡོམ་པོ་གཉིས་ཀྱི་གནས་ཚུལ་ཅི་ཡང་གོ་ཐོས་མ་བྱུང་།
གླུ་བ་ཕྱག་རྡོར་ལགས་ཀྱི་(འེ་རེད་)ཅེས་པའི་གླུ་ཚིག་གཤམ་གསལ་ལྟར་ཡིན།
ང་ཚོའི་རིན་ཆེན་གཏེར་ཁ།།བཙན་པོའི་འཕྲུལ་གྱིས་གཏོར་ནས།།གནས་འདི་སྟོངས་པར་བཟོས་པ།།དབང་མེད་བཙན་ཤེད་འེ་རེད།
སྔོན་བྱོན་མཁས་པའི་མཛད་རྗེས།།ལྔ་ཟུང་རིག་པའི་གནས་མཆོག།ཐབས་ཀྱིས་བརླགས་བརྩིས་བྱེད་པ།།དབང་མེད་བཙན་ཤེད་འེ་རེད།།
ཁ་བ་གངས་རིའི་རྒྱུད་འཛིན།།ན་གཞོིན་དཔའ་བོ་དཔའ་མོ།།བཙན་གྱིས་དམར་གསོད་བྱས་པ།།དབང་མེད་བཙན་ཤེད་འེ་རེད།།
གངས་ཅན་འགྲོ་བའི་མགོན་པོ།།རྒྱལ་དབང་བསྟན་འཛིན་རྒྱ་མཚོ།།བཙན་གྱིས་གཏན་བྲལ་བྱས་པ།།ང་ཚོའི་ལས་དབང་འེ་རེད།།
ཅེས་དང་། ཡང་གླུ་བ་པདྨ་འཕྲིན་ལས་ཀྱི་གླུ་(སྨྲེ་ངག་)ཅེས་པའི་གླུ་ཚིག་ནི། རྗེ་བླ་མ་ས་ཕྱོགས་གཞན་ལ་ཕེབས།།བོད་སློབ་འབངས་མ་མེད་ད་ཕྲུག་བཞིན།།རྒྱ་ནག་པོའི་འོག་ན་སྡུག་བསྔལ་ལྕི།།སྡུག་ལྕི་རུང་བཤད་ས་ང་མེད་གི།།
བོད་གངས་རིའི་དཔའ་བོ་དཔའ་མོ་རྣམས།།ལུས་བུད་ཤིང་བཞིན་དུ་མེ་ལ་བསྲེགས།།མེ་དམར་པོའི་ཀླུང་ན་ན་ཟུག་ཆེ།།སྡུག་ཆེ་རུང་བཤད་ས་ང་མེད་གི།།
བོད་ ཉམ་ཆུང་ཉེས་མེད་ཁྲིམས་ལ་སྦྱར།།ལྕགས་ནག་པོ་བརྒྱབས་ནས་གསོད་རྡུང་བྱས།།ལུས་ བཙོན་རར་སོང་ནས་འཇིགས་སྐྲག་མྱངས།།འཇིགས་ཆེ་རུང་བཤད་ས་ང་མེད་གི།། ཞེས་པ་ཡིན་ལ། དེ་མིན་ ༡ གངས་རིའི་མགོན། ༢ སྐྱོ་འབོད། ༣ ང་ཡི་རྩ་བའི་བླ་མ། ༤ ངོ་ཚ། ༥ བཟོད་མེད་ཀྱི་སྡུག་བསྔལ། ༦ བདེན་དོན་ཁྲག་གི་དར་ཆ། ༧ འཐད་པ་ཡིན། ༨ སྲིན་པོ། ༩ མག་མོག་བྱང་ཐང་གི་ན་བུན། ༡༠ ཡིད་ཐང་ཆད་འགྲོ། བཅས་ཁྱོན་གླུ་བཅུ་གཉིས་ཡོད་འདུག།

བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
སྲིད་སྐྱོང་མཆོག་གིས་སུད་སིའི་གཞུང་དོན་འཚམས་གཟིགས་འགྲུབ་སྟེ་ཧྥ་རན་སིར་ཕེབས་འབྱོར་བྱུང་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎