བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༥༣པ་ལ་དྭགས་སུ་ཚོགས་བཞིན་འདུག

དེ་ཡང་ཕྱི་ཟླ་༨ཚེས་༧ཉིན་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༥༣པ་རྒྱ་བལ་འབྲུག་གསུམ་ནས་ས་གནས་ཁག་༣༨ཀྱི་ཚོགས་བཅར་བ་༨༣མཉམ་ཞུགས་གནང་བའི་ཐོག ལ་དྭགས་ཀྱི་བསོད་ནམས་གླིང་བོད་མིའི་གཞིས་ཆགས་ཀྱི་མི་མང་ཚོགས་ཁང་ནང་དབུ་འཛུགས་གནང་སོང་ལ། ཚོགས་ཆེན་དེ་བཞིན་སྤྱི་ཚེས་༡༢བར་ཉིན་ལྔའི་རིང་ཚོགས་རྒྱུ་ཡིན་པ་རེད་འདུག
ཚོགས་ཆེན་གྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དཔོན་རིགས་ཁྲིམས་རྩོད་པ་བཀྲིས་རྒྱལ་མཚན་ལགས་དང་། དམིགས་བསལ་སྐུ་མགྲོན་དུ་ལ་དྭགས་ནང་པའི་ཚོགས་འདུའི་གཞོན་ནུ་ཚོགས་པའི་དབུ་སྐྱོང་དང་ལ་དྭགས་ནང་ཚོགས་བུ་མོ་ཚོགས་པའི་སྐུ་ཚབ། དེ་བཞིན་བསོད་ནམས་གླིང་བོད་མིའི་གཞིས་ཆགས་ཀྱི་མང་གཙོའི་ཀ་བ་གསུམ་གཙོས་རྒྱ་ཤོག་ཁག་གི་རྒྱག་དཔོན་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ཕེབས་གནང་འདུག

དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱི་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། ལ་དྭགས་ས་གནས་ནི་སྤྱིར་ཡོངས་ནས་ས་གནས་གནད་འགག་ཆེན་པོ་ཡིན། དེ་ནི་ང་ཚོའི་ཕ་ཡུལ་བོད་རྒྱལ་ཁབ་དང་ས་འབྲེལ་ཆགས་པའི་ས་གནས་དང་། ༧གོང་ས་མཆོག་ཡང་ཡང་ཆིབས་བསྒྱུར་གནང་ནས་ཐུགས་ཉེ་བོ་གནང་སའི་ས་གནས་ཡིན་པ། གཞན་ལ་དྭགས་ས་གནས་གཞོན་ནུ་དང་དབུས་གཞོན་ནུ་གཉིས་བར་ཀྱི་དེ་སྔའི་དཀའ་ངལ་དེ་སེལ་ཐབས་སུ་མུ་མཐུད་བཀའ་མོལ་གནང་བཞིན་པ་ཡིན་པས། ད་རེས་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༥༣པ་ལ་དྭགས་སུ་ཚོགས་གཏན་འཁེལ་བ་ངོ་སྤྲོད་གནང་བྱུང་།
མཛད་སྒོའི་སྐུ་མགྲོན་གཙོ་བོ་བཀྲིས་རྒྱལ་མཚན་ལགས་ཀྱིས་གསུངས་བཤད་གནང་སྐབས། གཙོ་བོ་ས་གནས་འཛིན་སྐྱོང་ནས་ལ་དྭགས་ས་གནས་སུ་གཞིས་ཆགས་པའི་བོད་མི་ཀུན་གྱི་བདེ་སྡུག་ལ་ས་གནས་ཡུལ་མི་དང་གཅིག་མཚུངས་ཀྱི་ལྟ་སྐྱོང་གནང་གི་ཡོད་པ་དང་། དེ་བཞིན་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་འདི་ལ་ཡང་ས་གནས་འཛིན་སྐྱོང་ནས་རྒྱབ་སྐྱོར་ཡོད་པ་སོགས་གསུངས་ཡོད་པ་རེད།
ཡང་མཛད་སྒོའི་དམིགས་བསལ་སྐུ་མགྲོན་ལ་དྭགས་ནང་ཚོགས་གཞོན་ནུ་ཚོགས་པའི་དབུ་སྐྱོང་རིག་འཛིན་རྡོ་རྗེ་ལགས་ཀྱིས། གཙོ་བོ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ཐུགས་ཀྱི་དགོངས་གཞི་སྔོན་དུ་བཏང་ནས་བོད་མི་རིགས་ཀྱི་འཐབ་རྩོད་ལ་ཡང་ལ་དྭགས་ནང་པའི་གཞོན་སྐྱེས་ཀུན་གྱིས་ཡང་རྒྱབ་སྐྱོར་གཙང་མ་ཡོད་པ་གསུངས་སོང་།
ཀ་ཤེ་མིར་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ས་ཡིད་བཊ་ལགས་ཀྱིས། ཁོང་གི་དམིགས་ཡུལ་དང་རེ་བ་གཙོ་བོ་བོད་རང་བཙན་གྱི་དོན་དུ་ཡིན་པ་དང་། ༧རྒྱལ་བ་རིན་པོ་ཆེ་མཆོག་མགྱོགས་མྱུར་བོད་ལ་ཕེབས་ཐུབ་པའི་སྨོན་ལམ་ཡོད་པ་གསུངས་བྱུང་།
ད་རེས་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཀྱི་ཚོགས་ཆེན་ལ་དྭགས་ས་གནས་སུ་ཚོགས་པ་ཐེངས་གཉིས་པ་ཡིན་པ་རེད་འདུག

གསར་འགོད་པ། འཕྲིན་ལས་ཆོས་སྒྲོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།