དཔལ་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་ཆེ་མཆོག་གིས་འབྲུག་ཡུལ་ནང་ཞབས་སོར་འཁོད་བསྟུན་མཛད་རིམ་གྱི་ཉིན་དང་པོར་སྲིད་བློན་ཚེ་རིང་སྟོབས་རྒྱལ་མཆོག་དང་ལྷན་མཇལ་ཕྲད་གནང་འདུག
དཔལ་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འབྲུག་ཡུལ་དུ་ཕྱི་ཟླ་ ༡༠ ཚེས་ ༣༠ ཉིན་ཞབས་སོར་འཁོད་ཡོད་ཅིང་། ཇི་ལྟར་གདན་འདྲེན་ཞུས་པ་ལྟར་འབྲུག་སྤ་གྲོ་ཤེས་རིག་མཐོ་སློབ་ཏུ་ནང་ཆོས་དང་འབྲེལ་བའི་གསུང་བཤད་གནང་འདུག་པ་མ་ཟད་། རིན་པོ་ཆེ་མཆོག་གིས་སྤ་གྲོ་སྐྱིད་ཆུ་ལྷ་ཁང་དུ་གནས་གཟིགས་གནང་འདུག
སྤ་གྲོ་ཤེས་རིག་མཐོ་སློབ་ཏུ་གསུང་བཤད་གནང་པའི་སྐབས་དཔལ་༧རྒྱལ་དབང་ཀརྨ་པ་རིན་པོ་ཆེ་མཆོག་གིས། “གསང་སྔགས་རྡོ་རྗེ་ཐེག་པའི་རྒྱལ་ཁབ་གཅིག་མ་གཏོགས་མེད་པ་འདི་དཔལ་ལྡན་འབྲུག་གི་རྒྱལ་ཁབ་འདི་ཡིན་པ་དང་། ༧མི་དབང་མངའ་བདག་རིན་པོ་ཆེ་ཡབ་སྲས་ཀྱི་བཀའ་དྲིན་ལ་བརྟེན་ནས་འབྲུག་གི་ནང་སེམས་ཀྱི་བདེ་སྐྱིད་རེད། ཕྱི་དངོས་པོའི་ཡར་རྒྱས་རེད། གང་ཅིའི་ཐོག་ནས་གཞན་དང་མི་འདྲ་བ་ཞིག་ཡོད་པ་འདི་ཚང་མས་མཁྱེན་གྱི་ཡོད་རེད། དེ་འདྲ་ཡིན་དུས། ང་རང་ཚོ་འབྲུག་གི་མི་སེར་ལ་སྐྱེས་པ་ཙམ་གྱིས་རང་བཞིན་གྱི་ང་ཚོས་རྒྱུན་དུ་གཤོད་བསྡད་པའི་དལ་འབྱོར་གྱི་ལུས་རྟེན་འདི་དལ་བ་བརྒྱད་དང་འབྱོར་བ་བཅུ་ཚང་བསྡད་པ་གཅིག དམ་པའི་ཆོས་སྒྲུབ་རྒྱུ་དང་དཀར་པོའི་དགེ་བའི་ལས་ལ་འཇུག་རྒྱུའི་མཐེུན་འཛོམས་ཡག་མེད་ན་མ་གཏོགས་འཛོམས་བསྡད་པ། འདི་འདྲ་གཅིག་གི་ཁོར་ཡུག་བཟང་པོ་ཟེར་ནའང་འདྲ། འདི་འདྲའི་རྒྱལ་ཁབ་རྩ་ཆེན་པོ་གཅིག་ལ་སྐྱེས་པ་འདི་ཁྱེད་རང་ཚོ་ཚང་མས་སྤོབས་པ་བྱེད་འོས་པ་གཅིག་དང་། གཅེས་སྤྲས་བྱ་འོས་པ་ཞིག་ཆགས་ཀྱི་ཡོད་རེད་བསམ་གྱི་འདུག་” ཅེས་གསུངས་འདུག
ད་རེས་འབྲུག་རྒྱལ་ཁབ་ཀྱིས་ཇི་ལྟར་གདན་ཞུ་གསོལ་འདེབས་ཞུས་པ་ལྟར། སྒྲུབ་བརྒྱུད་བསྟན་པའི་གཙུག་རྒྱན་དཔལ་༧རྒྱལ་དབང་ཀརྨ་པ་རིན་པོ་ཆེ་མཆོག་དང་། ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་༧སྐྱབས་རྗེ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གིས་དབུས་པའི་བོད་བརྒྱུད་ནང་བསྟན་གྱི་བསྟན་བདག་བླ་ཆེན་རྣམ་པ་ཕྱི་ཟླ་ ༡༡ ཚེས་ ༡ ཉིན་འབྲུག་རྒྱལ་ཁབ་ཀྱི་དགེ་ལེགས་ཕུག་དྲན་ཤེས་གྲོང་ཁྱེར་གྱི་ཁྲོམ་ཁར་ཞོགས་པ་ཆུ་ཚོད་ ༣ ནས་ཕྱི་དྲོ་ཆུ་ཚོད་ ༣ བར་བྱང་ཆུབ་མཆོད་རྟེན་ ༡༠༨ ལྷན་ཅིག་ཏུ་བཞེངས་སྐྲུན་གྱི་ལས་འཆར་དེར་རབ་གནས་བྱིན་གྱིས་རླབས་ཕྱིར་ཆེད་ཕེབས་གནང་པ་ཞིག་ཡིན་པ་དང་། འདི་ནི་བོད་བརྒྱུད་ནང་བསྟན་གྱི་བསྟན་བདག་བླ་ཆེན་རྣམ་པ་འདི་ལྟར་འབྲུག་ཆོས་ལྡན་གྱི་རྒྱལ་ཁབ་ནང་གདན་འཛོམས་རྒྱུའི་གཞི་རྒྱ་ཆེ་བའི་ཆོས་ཕྱོགས་ཀྱི་མཛད་རིམ་ཞིག་དང་སྔར་བྱུང་མྱོང་མེད་པའི་ལོ་རྒྱུས་ཀྱི་རང་བཞིན་ལྡན་པ་ཞིག་ཏུ་གྱུར་ཡོད་པ་རེད།།
ཁ་སྣོན་གསར་འགོད། བཀྲ་དབང་།
བརྙན་པར་སྒྲིག་སྦྱོར་བ། འཕྲིན་ལས་ཆོས་སྒྲོན།