དགའ་ལྡན་ཁྲི་ཐོག་༡༠༢རི་རྫོང་སྲས་སྤྲུལ་རིན་པོ་ཆེ་མཆོག་དགོངས་པ་རྫོགས་འདུག

འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་༡༠༢ སྐྱབས་རྗེ་རི་རྫོང་སྲས་སྤྲུལ་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་རིན་པོ་མཆོག་དགུང་གྲང་༩༦ཐོག་ཞབས་ཕྲན་བུ་སྙུང་བ་ལས་གཞན་སྐུ་གཟུགས་ལ་སྙུང་གཞི་གང་ཡང་མེད་པར་དགུང་ལོ་མཐོ་བའི་རྐྱེན་གྱི་ཟླ་བ་འདིའི་ཕྱི་ཚེས་༨ཀྱི་དགོང་དྲོ་ཆུ་ཚོད་༩དང་སྐར་མ་༡༥ཐོག་དགོངས་པ་རྫོགས་ཏེ་ད་ལྟ་ཐུགས་དམ་ལ་བཞུགས་མུས་སུ་ཡིན་པ་རེད་འདུག  ད་ལྟའི་ཆར་འབྲས་སྤུང་བླ་སྤྱི་དང་བློ་གསལ་གླིང་གྲྭ་ཚང་དང་ཀླུ་དཀྱིལ་ཁང་ལ་སོགས་པའི་ནང་ཁྲི་ཟུར་རིན་པོ་ཆེ་མཆོག་གི་དགོངས་རྫོགས་ཀྱི་བསྔོ་སྨོན་མཆོད་འབུལ་གནང་བཞིན་ཡོད་པ་ཕྱོགས་མཚུངས་དེ་རིང་བོད་མིའི་སྒྲིག་འཛུགས་ངོས་ནས་བསྔོ་སྨོན་མཆོད་འབུལ་གནང་འདུག དེ་མིན་འདི་ལོ་༧གོང་ས་༧སྐྱབས་མགོན་ཆེན་པོ་མཆོག་ལ་དྭགས་ལ་ཆིབས་སྒྱུར་གནང་སྐབས་ཁྲི་ཟུར་རིན་པོ་མཆོག་ཟུར་མཇལ་གནང་བའི་སྐབས་སུ་༧གོང་ས་མཆོག་ནས་ཁྲི་ཟུར་རིན་པོ་ཆེ་མཆོག་མཛད་པ་མཐར་ཕྱིན་ཡོད་པ་དང་།  ཐུགས་སྤྲོ་པོ་བྱེད་ནས་བཞུགས་དགོས་པའི་སྐུལ་མ་གནང་འདུག ཁོང་གིས་གསུང་ཡས་ལ་ཁྲི་ཟུར་རིན་པོ་ཆེ་མཆོག་ནས་གཙོ་བོ་གསང་བདེ་འཇིགས་གསུམ་གྱི་ཉམས་བཞེས་གཙོ་བོ་གནང་གི་ཡོད་པ་གསུང་གནང་བྱུང་།
༧སྐྱབས་རྗེ་དགའ་ལྡན་ཁྲི་ཟུར་རི་རྫོངས་སྲས་སྤྲུལ་རིན་པོ་མཆོག་ནི་ལ་དྭགས་ཁུལ་ནས་དགའ་ལྡན་ཁྲི་ལ་ཕེབས་མཁན་ཐོག་མ་དེ་ཡིན་དང་ཁོང་ནི་ཕྱི་ལ་༡༩༢༧ལོར་ལ་དྭགས་མང་སྤྲོ་ཞེས་པའི་མཁར་དུ་མེས་དབོན་བཙན་པོའི་གདུང་རྒྱུད་དུ་འཁྲུངས་ཤིང་༧སྐྱབས་རྗེ་རྒྱལ་སྲས་བ་ཀུ་ལ་རིན་པོ་ཆེ་ལས་རབ་བྱུང་མནོས་པའི་མཚན་ཡང་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་ཞེས་མཚན་གསོལ། ༡༩༤༥ལོར་དཀའ་ཆེན་ཡེ་ཤེས་དོན་གྲུབ་དང་ལྷན་དུ་བོད་དུ་ཕེབས་ཏེ་ལམ་རིམ་དང་རྣམ་འགྲེལ་ལ་སོགས་པའི་གཞུང་ཆེན་ཁག་སློབ་གཉེར་གནང་བ་དང་ཕྱི་ལོ་༡༩༤༩ལོར་བློ་གསལ་གླིང་གྲྭ་ཚང་དུ་ཆོས་བཞུགས་ཀྱི་གཞུང་ཆེན་ཁག་ལ་སློབ་གཉེར་གནང་འགོ་ཚུགས་ཏེ་བོད་ནང་དུས་འགྱུར་བྱུང་རྗེས་རྒྱ་གར་ནང་ཕེབས་ཏེ་ཌལ་ལ་ཧོ་སི་གདན་ས་གསུམ་གྱི་མཁས་པ་མང་དག་གཅིག་བཞུགས་ཡོད་སྐབས་ལོ་གཅིག་ལྷག་ཙམ་རིང་འདུལ་མཛོད་ཀྱི་རྩོད་སྦྱངས་གནང་སྟེ། ཕྱི་ལོ་༡༩༧༢ལོར་ས་གནས་དེར་དགེ་བཤེས་ལྷ་རམས་འཕར་མའི་མཚན་རྟགས་བཞེས་པའི་རྗེས་རྒྱུད་སྨད་དུ་སྔགས་ཀྱི་ཆོས་ཐོག་འགྲིམས་ཏེ་རིམ་པའི་རྒྱུད་སྨད་ཀྱི་དགེ་བསྐོས་དང་བླ་མ་དབུ་མཛད་དང་དེ་བཞིན་མཁན་པོ་བཅས་ཀྱི་མཛད་འགན་བཞེས་གནང་བ་དང་ཕྱི་ལོ་༡༩༨༤ྋགོང་ས་མཆོག་གིས་བློ་གླིང་མཁན་པོར་ཕྱག་རྟགས་བསྩལ་བ་གཞིར་བཟུང་གི་རིན་པོ་ཆེ་མཆོག་ནས་མཁན་པོ་མཛད་འགན་ལོ་དྲུག་རིང་གནང་བ་དང་ཕྱི་ལོ་༡༩༩༥ལོར་རིན་པོ་ཆེ་མཆོག་ྋགོང་ས་མཆོག་གི་བྱང་རྩེ་ཆོས་རྗེར་བསྐོ་བཞག་གི་ཕྱག་རྟགས་ཕེབས་པ་དང་དེ་རྗེས་ཕྱི་ལོ་༢༠༠༩ལོར་༸གོང་ས་༸སྐྱབས་མགོན་ནས་ཁོང་ལ་དགའ་ལྡན་ཁྲི་ཐོག་བརྒྱ་དང་གཉིས་པའི་ཕྱག་རྟགས་བསྩལ་བ་གཞིར་བཟུང་ཐུགས་འགན་བཞེས་བ་སོགས་གང་ལྟར་ཁྲི་ཟུར་རིན་པོ་ཆེ་མཆོག་ནས་༧གོང་ས་མཆོག་གི་བཀའ་དགོངས་ལམ་སྟོན་གཙོ་བོ་འཛིན་པའི་ཐོག་ནས་འཇིག་རྟེན་ཆོས་བརྒྱད་སྤང་བའི་སྒོ་ནས་ཆོས་ཉམས་ལེན་གནང་བཞིན་ཡོད་རྒན་ཐུབ་བསྟན་ཆོས་བཟང་ལགས་ཀྱི་གསུང་གནང་བྱུང་།

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཡེ་ཤེས་བཀྲ་ཤིས།