ལྡི་ལི་བསམ་ཡས་གླིང་ལོ་༥༠འཁོར།
2012.12.27
༄༅། །ཁ་སང་ཕྱི་ཚེས་༢༦ཉིན་གྱི་མཛད་སྒོ་དེ་བོད་སྒར་བསམ་ཡས་གླིང་གཞིས་སྒར་དེ་བཞིན་རྒྱ་གར་གཞུང་ཕྱོགས་ནས་ཁྲིམས་མཐུན་གཏན་ཆགས་ཀྱི་གཞིས་སྒར་དུ་ངོས་འཛིན་གནང་བའི་དགའ་སྟོན་མཛད་སྒོ་ཞིག་ཀྱང་རེད་འདུག
དེ་ཡང་ཐོག་མར་༧གོང་ས་༧སྐྱབས་མགོན་ཆེན་པོ་མཆོག་གིས་བསམ་ཡས་གླིང་གཞིས་སྒར་དབུ་འཛུགས་ནས་མི་ལོ་༥༠འཁོར་བའི་མཛད་སྒོར་ཕེབས་པའི་སྐུ་མགྲོན་རྣམ་པར་འཚམས་འདྲི་དང་སྦྲགས་བཀའ་སློབ་བསྩལ་དོན། ང་ཚོ་བོད་པ་ཞིག་ཡིན་པའི་ཆ་ནས་བཤད་ནའང། གང་ལྟར་མི་རིགས་ཀྱི་ལྟ་བ་ཞེས་པ་དེ་བྱབ་ཆུང་གི་ལྟ་བ་འཁྱེར་ན་ནོར་འཁྲུལ་རེད། རྒྱུ་མཚན་ལྡན་པའི་ཐོག་ནས་མི་རིགས་ཀྱི་ཞེན་ཁོག་དང་མི་རིགས་ཀྱི་སྤོབས་སེམས་འཁྱེར་རྒྱུ་དེ་ཧ་ཅང་གལ་ཆེན་པོ་རེད། ང་ཚོའི་ཐ་སྙད་ནང་ང་རྒྱལ་དང་སྤོབས་པ་ཁག་ཁག་རེད། སྤོབས་པ་ཡོང་རྒྱུར་རྒྱུ་མཚན་ཤེས་དགོས། དངོས་པོ་ཡར་རྒྱས་ཐོག་ང་ཚོ་བོད་པས་ཁབ་དང་གཟེར་མ་ཞིག་ཀྱང་བཟོ་ཤེས་ཀྱི་མེད། བསམ་བློའི་སྐོར་དཔེ་ཆའི་ནང་ཡོད་པ་དེར་སློབ་སྦྱོང་བྱས་ཡོད་པ་དེ་འཛམ་གླིང་སུ་གཅིིག་ལ་སྨོན་མི་དགོས་པ་ཞིག་རེད། ཅེས་བཀའ་སློབ་གནང་འདུག
༧གོང་ས་མཆོག་ནས་སྐབས་དེར་ད་དུང་། ང་ཚོ་བོད་པ་མང་དག་ཅིག་གིས་འདོན་པ་འདོན་གྱི་ཡོད་ཀྱང་། དོན་དག་མ་ཤེས་མཁན་མང་པོ་འདུག དེར་བརྟེན་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། བོད་ཀྱི་རིག་གཞུང་ཞེས་བརྗོད་ན། སངས་པའི་ཆོས་དང་སངས་རྒྱས་པའི་ལྟ་གྲུབ་དང་འབྲེལ་བའི་རིག་གཞུང་ཆགས་ཡོད། ང་ཚོ་བོད་ཀྱི་རིག་གཞུང་དེ་བསམ་བློའི་ནང་གཏིང་རིང་པོ་ཞིག་གི་རིག་གཞུང་རེད་མ་གཏོགས། ཞབས་བྲོ་དང་འབག་འདྲ་མིན་གྱོན་པ་དེས་ རིག་གཞུང་དང་སངས་རྒྱས་ཀྱི་ཆོས་ངོས་འཛིན་གྱི་མེད། ཞབས་བྲོ་འཁྲབ་རྒྱུ་དེ་དག་རིག་གཞུང་གི་ཆ་ཤས་ཤིག་ཡིན་ཡང་གཙོོ་བོ་མིན། གཙོ་བོ་བཀའ་འགྱུར་བསྟན་འགྱུར་ པོ་ཏི་སུམ་བརྒྱ་ཡོད་པ་དེའི་ནང་བཤད་ཡོད་པ་དེ་ང་ཚོས་རྡོག་སྒྲུག་རྒྱག་རྒྱུ་དེ་ཧ་ཅང་གལ་ཆེན་པོ་རེད། བཀའ་འགྱུར་བསྟན་འགྱུར་ནང་ནས་ཚན་རིག་སེམས་ཁམས་རིག་པ་དང་། དངོས་ཁམས་རིག་པའི་སྐོར་ཡོད་པ་དེ་དག་སྡེ་ཚན་གཅིག་ཏུ་ཕྱེ། དེ་ནས་ལྟ་གྲུབ་སྐོར་སྡེ་ཚན་གཅིག་ཏུ་ཕྱེ། ལྷག་འཕྲོས་དེ་དག་ནང་ཆོས་རང་ཆགས་ཡོད། དེ་ལྟར་བྱས་ནས་དུམ་བུ་གསུམ་བཟོས་ན་ཞེས་པའི་ལས་དོན་འགོ་བཙུགས་ཟིན་པས་རིམ་བཞིན་དཔེ་ཆ་འཐོན་ཡོང་གི་རེད། དེ་བཞིན་དབྱིན་ཡིག་དང་རྒྱ་ཡིག ཧིན་རྡིའི་ནང་ཕབ་བསྒྱུར་རིམ་བཞིན་བྱེད་ཀྱི་རེད། ཅེས་སོགས་ཀྱི་བཀའ་སློབ་ཟབ་རྒྱས་བཀའ་སློབ་བསྩལ་ཡོད། །