དཀར་མཛེས་རྫོང་ཐོག་ཏུ་བཤད་སྒྲུབ་ལྷ་མོས་སྐད་འབོད།

པདྨ་ཚེ་དབང་ནས་གནས་ཚུལ་བཏང་དོན། ཕྱི་ལོ་ ༢༠༡༢ ཟླ་ ༨ པའི་ཚེས་ ༢༥ ཉིན་བོད་ནང་སྔ་དྲོ་ཆུ་ཚོད་ ༨ །༣༠ ཙམ་ཞིག་ལ་ཁམས་དཀར་མཛེས་རྫོང་གི་ཁྲོམ་གཞུང་དུ། དཀར་མཛེས་དགའ་ལྡན་ཆོས་གླིང་དགོན་གྱི་བཙུན་མ་བཤད་སྒྲུབ་ལྷ་མོ་ལགས་ཀྱིས། ༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག བོད་ལ་རང་དབང་དགོས། ༸རྒྱལ་བ་བསྟན་འཛིན་རྒྱ་མཚོ་བོད་ལ་གདན་འདྲེན་ཞུ་དགོས་ཞེས་སོགས་ཀྱི་སྐད་ཤུགས་ཆེན་པོས་ཞི་རྒོལ་ཐོག་ཁྲོམ་སྐོར་བྱས་ཞོར་ཡིག་ཆ་མང་པོ་གཏོར་ཡོད་འདུག འོན་ཀྱང་ཁོང་གི་ཡིག་ཆའི་ནང་དོན་གང་ཡིན་གསལ་ཁ་མ་ཤེས་ཀྱང་དུས་ཡུན་ཐུང་ངུ་ལས་མ་འགོར་བར་རྒྱ་གཞུང་གི་ཉེན་རྟོག་པ་འབྱོར་ཏེ་ཁོང་ལ་ཉེས་རྡུང་ཚད་མེད་གཏོང་བཞིན་འཛིན་བཟུང་བྱས་པ་མ་ཟད། དཀར་མཛེས་རྫོང་གི་བཙོན་ཁང་ཞིག་ཏུ་བཙོན་འཇུག་བྱས་འདུག སྐབས་དེར་ཕྱི་རྒྱལ་བ་ཞིག་གིས་བཙུན་མ་ཁོང་གིས་གཏོར་བའི་ཡིག་ཆ་དེར་པར་བརྒྱབ་པར་བརྟེན་ཕྱི་རྒྱལ་བ་དེ་ཡང་བཙུན་མ་ཁོང་དང་ལྷན་འཛིན་བཟུང་བཙོན་འཇུག་བྱས་ཡོད་འདུག

རང་ལོ་ ༣༩ ཡིན་པ་བཙུན་མ་བཤད་སྒྲུབ་ལྷ་མོ་ལགས་ནི། དཀར་མཛེས་རྫོང་། ཀཿབྲག་ཤང་། ཤང་ཁག་གྲོང་། ཕ་ཚེ་དབང་འགྱུར་མེད། མ་ཚེ་རིང་དཔལ་མོ་གཉིས་ཀྱིས་བུ་མོ་ཡིན་འདུག་