རྫ་དབོན་པོ་ཁུལ་དུ་རྒྱ་ནག་གཞུང་གི་འཛིན་བཟུང་བྱས་པའི་དགེ་འདུན་པ་གསུམ་མ་གཏོགས་གཞན་བོད་མི་ཚང་མ་གློད་གྲོལ་བཏང་ཡོད་པ་རེད་འདུག

རྒྱ་ནག་གཞུང་དབྱེ་བས་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོངས་ཁུལ་སེར་ཤུལ་རྫོང་རྫ་ཆུ་ཁ་རྫ་སྨད་དབོན་པོ་ཁུལ་དུ་དེ་སྔོན་རྒྱ་ནག་གཞུང་གི་ཟླ་བ་༨པའི་ནང་རྫ་ཆུ་ཁ་དབོན་པོ་དགོན་གྲོང་གཉིས་ནས་སྔ་རྗེས་བོད་མི་སྐྱ་སེར་༡༡༧འཛིན་བཟུང་བཀག་ཉར་བྱས་པའི་ཁྲོད་དགེ་འདུན་པ་གསུམ་མ་གཏོགས་གཞན་བོད་མི་སྐྱ་སེར་༡༡༤ཚང་མ་ཟླ་བ་འདིའི་ཕྱི་ཚེས་༢༣ནས་༢༧བར་དུས་ཚོད་འདྲ་མིན་གྱི་ནང་གློད་གྲོལ་བཏང་ཡོད་པ་རེད་འདུག དེའི་སྐོར་བཙན་བྱོལ་ནང་ཡོད་པའི་འབྲེལ་ཡོད་བོད་མི་མིང་འབོད་འདོད་མེད་པའི་ཞིག་གིས་འགྲེལ་བརྗོད་གནང་བྱུང་། རྒྱ་གཞུང་གི་མུ་མཐུད་བཀག་ཉར་བྱས་ཡོད་པའི་དགེ་འདུན་པ་གསུམ་པོ་དེ་ནི་ཉེ་ཆར་ཕྱི་ཟླ་༩ཚེས་༣ཉིན་རྒྱ་ནག་དམག་མིས་དགེ་འདུན་པ་༦དང་བེུད་གཉིས་བཅས་ཁྱོན་བོད་མི་བརྒྱད་འཛིན་བཟུང་བཀག་ཉར་བྱས་པའི་ནང་གི་དགེ་འདུན་པ་གསུམ་ཡིན་ཞིང་། དེའི་ནང་ནས་དགེ་འདུན་གཅིག་གི་ཤག་ཏུ་འདི་ཚེས་༢༧ཉིན་དགོང་དྲོ་ཆུ་ཚོད་༧ཙམ་ཞིག་གི་ཐོག་རྒྱ་ནག་དམག་མི་བདུན་བསླེབས་ཏེ་ཁོང་གི་ཤག་བསྔོག་བཤེར་བྱས་ཡོད་པ་རེད་འདུག་ལ། ས་གནས་ཀྱི་མི་མང་དང་འབྲེལ་ཡོད་ཚོས་བཤད་ན། ཁོང་རྣམ་པས་ཆབ་སྲིད་དང་འབྲེལ་བའི་གནད་དོན་གང་ཡང་གནང་མེད་དུས་ཁོང་རྣམ་པ་མགྱོགས་མྱུར་གློད་གྲོལ་ཡོང་རྒྱུའི་རེ་བ་རྒྱག་བཞིན་ཡོད་པའི་སྐོར་འགྲེལ་བརྗོད་གནང་གི་ཡོད་ཀྱང་ནག་ཉེས་གང་བཀེལ་མིན་ནི་སྲིད་གཞུང་གིས་ལག་པར་ཡོད་དུས་ད་ལྟ་བཤད་ཚོད་ཐུབ་དཀའ་བ་ཞིག་ཡིན་སྐོར་གནས་ཚུལ་ངོ་སྤྲོད་པས་འགྲེལ་བརྗོད་གནང་བྱུང་། གོང་ཞུས་བོད་མི་རྣམས་འཛིན་བཟུང་བཀག་ཉར་བྱས་པའི་རིང་ཟ་མ་ཡག་པོ་མ་སྤྲད་པ་དང་རྡུང་རྡེག་བཏང་བ་སོགས་ནི་རྒྱུན་ལྡན་ལྟར་བྱས་ཡོད་པ་མ་ཟད་སློབ་གསོའི་ལས་འགུལ་སྤེལ་བའི་སྐབས་གཙོ་བོ་རྒྱལ་ཁབ་ལ་ཤ་ཞེན་དང་། ཁ་བྲལ་གྱི་ལས་འགུལ་མི་སྤེལ་བ་སོགས་ཀྱི་སློབ་གསོ་རྒྱབ་ཡོད་པ་རེད་འདུག གཞན་ཡང་རྒྱ་ནག་གཞུང་གི་ས་གནས་བོད་མི་མང་ཚོགས་ལ་སློབ་གསོའི་ལས་འགུལ་སྤེལ་བའི་ནང་ཀྲུང་གོ་གུང་ཁྲན་ཏང་ལ་ཤ་ཞེན་དགོས་པ། ཏང་གི་བཀྲིན་དྲན་དགོས་པ་དང་། ཁ་བྲལ་གྱི་ལས་འགུལ་སྤེལ་རྒྱུ་མིན་པ་དང་། ༧གོང་ས་མཆོག་གི་སྐུ་པར་བདག་ཉར་མི་བྱེད་པ་དང་། སྐད་འཕྲིན་དང་དྲ་རྒྱ་སོགས་ཀྱི་ཚོགས་པ་བཙུགས་མི་ཆོག་པ་དང་གལ་སྲིད་ངེས་པར་བཙུགས་དགོས་ཚེ་ས་གནས་ཀྱི་འགོ་འཁྲིད་དང་ལས་བྱེད་ཞིག་ཚོགས་པའི་ནང་ཡོད་དགོས་པའི་ཆ་རྐྱེན་བཟོས་པ་དེ་ནི་བོད་པའི་ཆོས་དང་རིག་གཞུང་སྐད་ཡིག་སྲུང་སྐྱོབས་དང་འབྲེལ་བའི་གལ་གནད་ཆེ་བའི་ཚོགས་པ་ཁག་སྒོ་རྒྱབ་དགོས་པ་སོགས་རྒྱ་གཞུང་གི་སྲིད་བྱུས་ངན་པ་ཞིག་ཡིན་པ་འགྲེལ་བརྗོད་གནང་བྱུང་། དེ་མིན་རྒྱ་གཞུང་གི་བོད་ནང་དགོན་སྡེ་ཁག་ཏུ་ཕྲུ་གུ་རང་ལོ་༡༨མན་ཆད་གྲྭ་བཙུན་དུ་བཅུག་རྒྱུ་མེད་པའི་གསལ་བསྒྲགས་བྱས་པ་ལྟར་དབོན་པོ་ཁུལ་གྱི་ས་གནས་བོད་མི་ཚོར་ཕྲུ་གུ་རང་ལོ་༡༨མན་ཆད་གྲྭ་བཙུན་ཁོངས་སུ་འཇུག་རྒྱུ་མིན་པའི་ཁས་ལེན་བྱེད་བཅུག་ཡོད་སྐོར་གནས་ཚུལ་ངོ་སྤྲོད་པས་་མུ་མཐུད་འགྲེལ་བརྗོད་གནང་བྱུང་། ཡང་བཞུགས་སྒར་རྡ་རམ་ས་ལར་བརྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་ཉམས་ཞིབ་པ་བསྟན་འཛིན་ཉི་འོད་ལགས་ཀྱིས་རྫ་ཆུ་ཁ་དབོན་པོ་ཁུལ་གྱི་ད་ལྟའི་གནས་སྟངས་ལ་བལྟས་ཚེ་རྒྱ་ནག་གཞུང་གི་མུ་མཐུད་ནས་དམ་དྲག་བྱས་གི་ཡོད་པ་གསུང་གནང་བྱུང་། དེ་མིན་རྫ་སྨད་དབོན་པོ་ཁུལ་དུ་བོད་རྒྱ་ཡིག་རིགས་གཉིས་ཀྱི་ཐོག་དཔའ་ངར་ལྡན་པའི་དབོན་པོ་ཞེས་པའི་ཕ་བོང་གའི་དབྱིབས་ལྡན་པའི་རྡོ་རིང་ཞིག་ཡོད་པ་དེ་ཉེ་ཆར་གཏོར་བ་དེར་གླེང་གཞི་ཞིག་ཆགས་ཡོད་སྐོར་གནས་ཚུལ་ངོ་སྤྲོད་པའི་འགྲེལ་བརྗོད་གནང་བྱུང་། ཉེ་ཆར་ཕྱི་ཟླ་༨ཚེས་༢༢ནས་ཕྱི་ཟླ་༨ཟླ་མཇུག་བར་རྒྱ་ནག་ཉེན་རྟོག་པས་རྫ་དབོན་པོ་དགོན་གྲོང་གཉིས་སུ་སྔ་རྗེས་བོད་མི་སེར་སྐྱ་མི་མང་༡༡༧ འཛིན་བཟུང་བྱས་པའི་ཁྲོད། དགེ་འདུན་པ་གསུམ་མ་གཏོགས་གཞན་བོད་མི་ཚང་མ་གློད་གྲོལ་བཏང་ཡོད་པ་རེད།
གསར་འགོད་པ། པདྨ་དངོས་གྲུབ།
རྩོམ་སྒྲིག་པ། འབེན་པ་སྟོབས་རྒྱལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཡེ་ཤེས་བཀྲ་ཤིས།