ཨ་རི་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་བོད་དོན་ཁྲིམས་ཡིག་གཏན་འབེབས་གནང་བར་འཛམ་གླིང་གི་ཡུལ་གྲུ་གང་སར་དགའ་སྟོན་གནང་འདུག -གནས་ཚུལ་ཁ་སྣོན།

ཨ་རི་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་བོད་དོན་ཁྲིམས་ཡིག་གཏན་འབེབས་གནང་བར་བོད་མིའི་སྒྲིག་འཛུགས་ཀྱིས་དགའ་སྟོན་གནང་སྐབས། ༠༧།༡༧།༢༠༢༤

* གནས་ཚུལ་ཁ་སྣོན། ༠༧།༢༥།༢༤

ཨ་མི་རི་ཀའི་གྲོས་ཚོགས་གོང་འོག་གཉིས་ནང་གཏན་འབེབས་བྱུང་བའི་བོད་དོན་ཁྲིམས་ཡིག་ལ་སྤྱི་ཟླ་༧པའི་ཚེས་༡༢ཉིན་ཨ་རིའི་སྲིད་འཛིན་འཇཱོ་སྦཡེ་ཌེན་(Joe Biden)་མཆོག་གིས་མཚན་རྟགས་བསྐྱོན་པའི་རྗེས། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་གཙོས་འཛམ་གླིང་གི་ཡུལ་གྲུ་གང་སའི་ཚོགས་སྡེ་ཁག་དང་མི་སྒེར་བཅས་ཀྱིས་རྣམ་པ་འདྲ་མིན་ཐོག་དགའ་བསུ་ཞུས་ཡོད་པ་དང་། ཕྱི་ཟླ་༧ཚེས་༡༧ཉིན་བོད་མིའི་སྒྲིག་འཛུགས་ཀྱི་ལས་བྱེད་རྣམས་སྲིད་སྐྱོང་ཚོགས་ཁང་དུ་ཚང་འཛོམས་ཐོག་གཞུང་འབྲེལ་རྟེན་འབྲེལ་དགའ་སྟོན་མཛད་སྒོ་ཚོགས་ཡོད་པ་རེད། སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་ལགས་ཀྱིས། ཨ་རིའི་སྲིད་འཛིན་མཆོག་ནས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་དེར་མཚན་རྟགས་བསྐྱོན་ཏེ་ཁྲིམས་སུ་གྱུར་ཡོད་པ་ནི། བོད་དོན་འཐབ་རྩོད་གནང་མཁན་ཙམ་དུ་མ་ཟད་འགྲོ་བ་མིའི་ཐོབ་ཐང་ཐོག་ལས་འགུལ་སྤེལ་མཁན་ཡོངས་ལ་གཏམ་བཟང་ཞིག་ཡིན་པ་དང་། ཁྲིམས་ཡིག་དེའི་ཐོག་སྐུ་ལས་བསྐྱོན་མཁན་གྱི་ཨ་རིའི་གཞུང་དམངས་གཉིས་ལ་ཐུགས་རྗེ་ཆེ་ཞེས་ཞུས་སོང་ལ། དེ་དང་མཉམ་བཀའ་བློན་མཆོག་གིས་ཉེ་ལམ་རྒྱ་ནག་གཞུང་གིས་བཙན་གྱིས་གངས་ལྗོངས་ཤེས་རིག་ནོར་བུའི་གླིང་སློབ་གྲྭ་སྒོ་བརྒྱབ་པའི་གནས་སྟངས་དེར་བློ་ཕམ་དང་བཅས་གདུང་སེམས་མཉམ་བསྐྱེད་ཞུས་སོང་།

གཞན་ཡང་ལས་རིམ་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་ཀྱང་། བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་ལ་ཨ་རིའི་སྲིད་འཛིན་མཆོག་ནས་མཚན་རྟགས་བསྐྱོན་པ་ནི། བོད་གཞིས་བྱེས་གཉིས་ཀྱི་བོད་མི་ཡོངས་དགའ་བ་སྐྱེ་འོས་པ་ཞིག་ཡིན་པ་གསུངས་སོང་།
སྐབས་དེར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་གྱི་དོན་ཚན་ཁག་ངོ་སྤྲོད་ཞིབ་རྒྱས་གནང་སོང་།

ཨ་མི་རི་ཀའི་སྲིད་འཛིན་(Joe Biden)་མཆོག་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་འཆར་(S.138)་ལ་ཟླ་༧ཚེས་༡༢ཉིན་མཚན་རྟགས་བཀོད་གནང་རྗེས་ཨ་རིའི་ཁྲིམས་སུ་གྱུར་ཡོད་པ་རེད་ལ། སྐབས་དེར་ཨ་མི་རི་ཀའི་སྲིད་འཛིན་མཆོག་གིས་ཁོང་གི་གཞུང་འཛིན་གྱིས་རྒྱ་ནག་མི་མང་སྤྱི་མཐུན་རྒྱལ་ཁབ་ལ་སྔོན་འགྲོའི་ཆ་རྐྱེན་གང་ཡང་མེད་པར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གམ་ཡང་ན་༧མགོན་པོ་གང་ཉིད་ཀྱི་སྐུ་ཚབ་ལྷན་དུ་ཐད་ཀར་གྲོས་མོལ་བསྐྱར་གསོ་གནང་སྟེ་བོད་རྒྱ་གཉིས་བར་མ་མཐུན་པའི་རྩོད་རྙོག་ཁག་གྲོས་མོལ་གྱི་ལམ་ནས་སེལ་ཐབས་དགོས་པའི་སྐུལ་ལྕགས་གནང་ཡོད་པ་རེད།

* གནས་ཚུལ་ཁ་སྣོན། ཚེས་༡༨ཉིན།

སྤྱི་ཟླ་༧པའི་ཚེས་༡༧ཉིན་༧རྒྱལ་བའི་བླ་གཟའ་དང་བསྟུན། ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་ནང་ཨ་རིའི་སྲིད་འཛིན་མཆོག་གིས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་ལ་མཚན་རྟགས་བསྐྱོན་ནས་ཁྲིམས་སུ་གྱུར་བར་དགའ་ཚོར་གྱིས་བཀའ་དྲིན་ཆེ་ཞུའི་མཛད་སྒོ་འཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་སྐབས་༡༧ པའི་བོད་མི་མང་སྤྱི་འཐུས་ཟླ་བ་ཚེ་རིང་ལགས་དང་། ས་འཐུས་ཚོགས་གཙོ། ས་གནས་འགོ་འཛིན། ས་གནས་རང་བདེན་ཚོགས་གཙོ། དེ་བཞིན་གཞུང་དང་གཞུང་ཁོངས་མ་ཡིན་པའི་ཚོགས་པ་ཁག་གི་འགན་འཛིན་དང་། ས་གནས་མི་མང་བཅས་མཉམ་ཞུགས་གནང་ཡོད་པའི་ཐོག་ས་གནས་རྒྱ་གར་གྱི་སྐུ་མགྲོན་ཁག་གཅིག་ཀྱང་མཉམ་ཞུགས་གནང་ཡོད་པ་རེད་འདུག

དེ་བཞིན་མོན་གྷོ་འདོད་རྒུ་གླིང་ས་གནས་སུ་མི་མང་རྣམས་ཀྱིས་དང་བླངས་དང་། གཞིས་གྲོང་སོ་སོའི་སྤྱི་མི་ནས་རྐང་འགན་འོག་བོད་མི་ཡོངས་དགའ་སྤོབས་བྱ་འོས་པ་དང་འབྲེལ་ཡོད་རྣམས་ལ་ཐུགས་རྗེ་ཆེ་མཚོད་སླད། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་ལགས་གཞུང་འབྲེལ་འཚམས་གཟིགས་སུ་ཕེབས་པ་དང་སྟབས་བསྟུན།་ཚེས་༡༨ཉིན་མི་མང་མཉམ་འཛོམས་ཐོག་ཨ་རིའི་གཞུང་དམངས་གཉིས་ལ་ཐུགས་རྗེ་ཆེ་ཞུའི་མཛད་སྒོ་འཚོགས་འདུག

དེ་བཞིན་དུ་རྒྱ་གར་དབུས་ཕྱོགས་མན་སྤར་ཕན་བདེ་གླིང་བོད་མིའི་གཞིས་ཆགས་ནང་ཡང་དེ་འབྲེལ་མཛད་སྒོ་ཚོགས་གནང་སྐབས། ས་གནས་གཞིས་འགོ་མཆོག་གིས་ཨ་མི་རི་ཀའི་གཞུང་གིས་བོད་དོན་ཁྲིམས་ཡིག་གཏན་འབེབས་གནང་བའི་བརྒྱུད་རིམ་དང་། གཞུང་དང་ཚོགས་སྡེ་ཁག དེ་བཞིན་ཨ་མི་རི་ཀའི་ནང་གི་བོད་མི་དང་བོད་དོན་རྒྱབ་སྐྱོར་བ་ཚོས་དེའི་ཐོག་ལས་འགུལ་ཇི་སྤེལ་སོགས་ཀྱི་སྐོར་ངོ་སྤྲོད་གནང་ཡོད་འདུག

* གནས་ཚུལ་ཁ་སྣོན། ༠༧།༢༤།༢༤

ཟླ་བ་འདིའི་ཕྱི་ཚེས་༢༤རེས་གཟའ་ལྷག་པ་ཉིན། རྒྱ་གར་ནུབ་སྦང་གྷལ་གྱི་གྲོང་ཁྱེར་ས་ལུ་སྒར་ཁུལ་དུ་གནས་སྡོད་བོད་མི་དང་རྒྱ་གར་ཧི་མ་ལ་ཡའི་རི་རྒྱུད་ཀྱི་མི་མང་ཚོས་མཉམ་དུ། ཨ་མི་རི་ཀའི་གྲོས་ཚོགས་གོང་འོག་གཉིས་ནང་གཏན་འབེབས་བྱུང་བའི་བོད་དོན་ཁྲིམས་ཡིག་ལ་ཨ་རིའི་སྲིད་འཛིན་འཇཱོ་སྦཡེ་ཌེན་(Joe Biden)་མཆོག་གིས་མཚན་རྟགས་བསྐྱོན་ཏེ། ཨ་རིའི་རྒྱལ་ཁབ་ཀྱིས་གཞུང་འབྲེལ་ཐོག་ལག་བསྟར་བྱ་རྒྱུའི་ཁྲིམས་སུ་གཏན་འབེབས་བྱུང་བར་དགའ་སྟོན་དང་། ཨ་རིའི་གཞུང་དམངས་གཉིས་ལ་བཀའ་དྲིན་རྗེས་དྲན་ཞུ་བའི་མཛད་སྒོ་ཞིག་ས་ལུ་སྒར་དུས་འཁོར་ཕོ་བྲང་གི་ཚོམས་ཆེན་ནང་། སྐུ་མགྲོན་གཙོ་བོ་ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པའི་དྲུང་ཆེ་སྐུ་ཞབས་བསོད་ནམས་ལྷུན་གྲུབ་ལགས་དང་། ས་ལུ་སྒར་ཁུལ་གྱི་བོད་པའི་གཞུང་འབྲེལ་དང་གཞུང་འབྲེལ་མིན་པས་ཚོགས་སྐྱིད་ཁག་གི་སྐུ་ཚབ་དང་ཧི་མ་ལ་ཡའི་ནང་པའི་ཤེས་རིག་སློབ་གྲྭའི་དགེ་ལས་སློབ་ཕྲུག་དང་ས་གནས་མི་མང་འདུ་འཛོམས་ཀྱི་ཚོགས་གནང་སོང་ལ་གོ་སྒྲིག་བྱེད་མཁན་གཙོ་བོ་ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པ་ཡིན་འདུག
མཛད་སྒོའི་ཐོག་སྐུ་མགྲོན་གཙོ་བོ་ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པའི་དྲུང་ཆེ་སྐུ་ཞབས་བསོད་ནམས་ལྷུན་གྲུབ་ལགས་ཀྱིས། ད་ལན་སྟོབས་ཆེན་རྒྱལ་ཁབ་ཨ་མི་རི་ཀས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ་དེ་གཙོ་བོ་༧གོང་ས་སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་ལ་བརྟེན་ནས་བྱུང་བ་ཞིག་ཡིན་སྐོར་དང་། བོད་མི་ཚོའི་ངོས་ནས་དུས་རྟག་དུ་ཨ་རིའི་སྲིད་གཞུང་ནས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བའི་ཐད་གོ་རྟོགས་དང་ཁྱབ་བསྒྲགས་རྒྱ་གང་ཆེ་སྤེལ་རྒྱུ་གལ་ཆེ་ཡིན་པ་གསུངས་སོང་ལ། དེར་ཡོད་བོད་མི་དང་ཧི་མ་ལ་ཡའི་མི་མང་ཚོས་དགའ་ཚོར་ཆེན་པོ་བྱེད་བཞིན་འདུག
དེ་བཞིན་རྒྱ་གར་བྱང་ཤར་འབྲས་ལྗོངས་ཀྱི་རྒྱལ་ས་སྒང་ཏོག་དང་། ར་སྦང་ལ། རྡོ་རྗེ་གླིང་དང་ཀ་ལོན་སྦུག་ཁུལ་དུ་གནས་སྡོད་བོད་མི་ཚོས་ཀྱང་ཨ་མི་རི་ཀའི་སྲིད་འཛིན་(Joe Biden)མཆོག་གིས་བོད་རྒྱའི་རྩོད་རྙོག་སེལ་རྒྱུར་སྐུལ་འདེད་གཏོང་བའི་ཁྲིམས་འཆར་དེར་མཚན་རྟགས་བཀོད་པར་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་དགའ་སྟོན་གྱི་མཛད་སྒོ་ཚོགས་ཡོད་པ་རེད།

* གནས་ཚུལ་ཁ་སྣོན། ༠༧།༢༥།༢༤

ཨ་མི་རི་ཀས་བོད་དོན་ཁྲིམས་ཡིག་གཏན་འབེབས་བྱུང་བ་དང་འབྲེལ་སྤྱི་ཟླ་༧པའི་ཚེས་༡༧ ཉིན་ཌལ་ཧོར་ས་གནས་འགོ་འཛིན་གྱིས་སྣེ་ཁྲིད་འོག ས་གནས་འཐུས་ཚོགས་དང་། ས་གནས་རང་བདེན་ཚོགས་ཆུང་། ས་གནས་གཞོན་ནུ་དང་བུད་མེད། ས་གནས་དབུ་མའི་ལམ་ལས་འགུལ་ཁང་། ས་གནས་སྤྱི་མི་བཅས་ཀྱིས་གོ་སྒྲིག་གིས། ཌལ་ཧོར་གནས་བཞུགས་བོད་མི་རྣམས་ནས་ཨ་རིའི་གཞུང་དམངས་གཉིས་ལ་ཐུགས་རྗེ་ཆེ་ཞུའི་གཞུང་འབྲེལ་མཛད་སྒོ་ཞིག་འཚོགས་གནང་ཡོད་པ་དང་། ཌལ་ཧོར་ས་གནས་འཐུས་ཚོགས་ཀྱི་ཚོགས་གཙོ་ཕུར་བུ་དགྲ་འདུལ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ཌལ་ཧོར་མི་མང་གི་ངོས་ནས་དགའ་སྟོན་མཛད་སྒོ་དེ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་༧སྐུའི་བླ་གཟའ་དང་སྟབས་བསྟུན་ནས་སྲུང་བརྩི་ཞུས་ཡོད་པ་དང་། མཛད་སྒོའི་ཐོག་ཌལ་ཧོར་ས་གནས་འགོ་འཛིན་ནས་བོད་སྐད་དང་། ཧིན་རྡུའི་སྐད་ཐོག་ཁྲིམས་ཡིག་དེ་བཞིན་མང་ཚོགས་ལ་འགྲེལ་བརྗོད་གནང་ཞིང་། ཁོང་གིས་ཧིན་རྡུའི་སྐད་ཐོག་འགྲེལ་བརྗོད་གནང་ཡོད་པ་སོགས། ཌལ་ཧོར་དེ་བཞིན་བོད་མི་གནས་སྡོད་ས་གནས་ཆུང་ཆུང་དང་མི་འབོར་ཉུང་ཉུང་ལ་དཔག་པས་དགའ་སྟོན་སྲུང་བརྩི་གང་ལེགས་ཞུས་ཡོད་པ་དང་། དེ་ཡང་ཕྱི་ཟླ་བདུན་པའི་ནང་༧གོང་ས་མཆོག་གི་ཞབས་པུས་སྨན་བཅོས་ལེགས་འགྲུབ་བྱུང་བ་དང་། ༧སྐུའི་འཁྲུངས་སྐར། ཨ་རིའི་གཞུང་གིས་བོད་དོན་ཁྲིམས་འཆར་གཏན་འབེབས་གནང་བ་སོགས་དུས་བཟང་གསུམ་འཛོམས་བྱུང་ཡོད་པ་གསུངས་བྱུང་།
ད་དུང་ཕུར་བུ་ལགས་ཀྱིས་མུ་མཐུད་དུ་། ཨ རིས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་དངོས་སུ་གཏན་འབེབས་བྱུང་བ་ནི། གཙོ་བོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་ཞིང་། ཁྲིམས་འཆར་དེའི་ཐོག་སྐུ་ལས་བསྐྱོན་མཁན་གྱི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ལས་ཀྱི་སྣེ་མོ་བ་གཙོས་པའི། འབྲེལ་ཡོད་ཨ་རིའི་གྲོས་ཚོགས་འཐུས་མི་ཡོངས་ལ་ཐུགས་རྗེ་ཆེ་ཞུས་སོང་།

* གནས་ཚུལ་ཁ་སྣོན། ༠༧།༢༥།༢༤

ཨ་མི་རི་ཀས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་གཞི་གཏན་འབེབས་གནང་བར། སྤྱི་ཟླ་༧ཚེས་༢༥ཉིན་འདི་ག་ཨ་རིའི་རྒྱལ་ས་ཝ་ཤིན་ཀྲོན་མངའ་ཁུལ་གྱི་བོད་མིའི་སྤྱི་མཐུན་ཚོགས་པའི་གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བྱང་ཨ་རིའི་བོད་ཀྱི་སྐུ་ཚབ་དོན་གཙོད་རྣམ་རྒྱལ་ཆོས་གྲུབ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་བསྟན་ཆོས་རྒྱ་མཚོ་ལགས་སོགས་བོད་དོན་ཁྲིམས་ཡིག་དེ་གཏན་འབེབས་ཡོང་བའི་ཆེད་དུ་སྔ་ཕྱིར་ཕྱག་ལས་གནང་མཁན་གཙོ་བོ་གསུམ་ལྷན་བཞུགས་གནང་བའི་ཐོག་ས་གནས་བོད་མི་མང་པོ་ཞིག་འདུ་འཛོམས་གནང་ནས་ཨ་རི་གཞུང་གིས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་གཞི་གཏན་འབེབ་གནང་བར་རྟེན་འབྲེལ་དགའ་སྟོན་དང་ཨ་རིའི་གཞུང་དམངས་གཉིས་ལ་ཐུགས་རྗེ་ཆེ་ཞུ་བའི་མཛད་སྒོ་ཚོགས་ཡོད་པ་དང་། སྐབས་དེར་སྲིད་སྐྱོང་མཆོག་དང་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་བསྟན་ཆོས་རྒྱ་མཚོ་ལགས་བཅས་ཀྱིས་བོད་དོན་ཁྲིམས་ཡིག་གི་བྱུང་རིམ་དང་དེའི་ཐད་གཞུང་དང་ཚོགས་སྡེ་མི་སྒེར་ཚང་མས་སྐུ་ལས་བསྐྱོན་པའི་གནས་སྟངས་སོགས་ངོ་སྤྲོད་གནང་ཡོད་པ་རེད།

ཨེ་ཤེ་ཡ་རང་དབང་རླུང་འཕྲིན་ཁང་།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།