སྤྱི་ནོར་༧གོང་ས་མཆོག་འབྲས་ལྗོངས་དང་རྒྱ་གར་ལྷོ་ཕྱོགས་བཅས་སུ་ཆིབས་བསྒྱུར་གནང་གཏན་འཁེལ་འདུག

བཞུགས་སྒར་རྡ་རམ་ས་ལར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཕྱི་ཟླ་༡༠བའི་ཚེས་༢ནས་༤བར་ཐེ་ཝན་གྱི་དད་ལྡན་པ་ཚོས་ཇི་ལྟར་གསོལ་འདེབས་ཞུས་དོན་ལྟར། ཉིན་གྲངས་གསུམ་རིང་ལམ་རིམ་བསྡུས་དོན་དང་། བློ་སྦྱོང་ཚིག་བརྒྱད་མ། མཇུག་ཏུ་སྤྱན་རས་གཟིགས་ཕྱག་བཞིའི་རྗེས་སྣང་བཅས་ཀྱི་སྒོ་ནས་ཆོས་འབྲེལ་སྩོལ་གནང་མཛད་རྒྱུ་དང་།
དེའི་རྗེས་ཕྱི་ཟླ་༡༠བའི་ཚེས་༡༡དང་༡༢སོ་སོར་རྒྱ་གར་བྱང་ཤར་འབྲས་ལྗོངས་ཁུལ་དུ་ཆོས་འབྲེལ་གསུང་ཆོས་དང་། ཕྱི་ཟླ་༡༠བའི་ཚེས་༡༥ཉིན་ནུབ་སྦེན་གྷལ་མངའ་སྡེའི་ས་གནས་ས་ལུ་གར་རུ་ཡོད་པའི་སྲས་བརྒྱུད་གྲྭ་ཚང་དུ་སེམས་བསྐྱེད་ཀྱི་སྒོ་ནས་ཆོས་འབྲེལ་གསུང་ཆོས་སྩོལ་གནང་མཛད་རྒྱུ་ཐུགས་གཏན་འཁེལ་འདུག
དེའི་རྗེས་ཕྱི་ཟླ་༡༡པའི་ནང་རྒྱ་གར་ལྷོ་ཕྱོགས་ཁུལ་དུ་ཆིབས་བསྒྱུར་གྱིས། ཕྱི་ཟླ་༡༡པའི་ཚེས་༢༦ ཉིན་སེར་སྨད་གྲྭ་ཚང་དུ་ལམ་གཙོ་རྣམ་གསུམ་གྱི་སྒོ་ནས་ཆོས་འབྲེལ་དང་། ཕྱི་ཟླ་༡༢ཚེས་༣་ཉིན་སེར་བྱེས་གྲྭ་ཚང་དུ་སྒྲོལ་དཀར་ཡིད་བཞིན་འཁོར་ལོའི་རྗེས་སྣང་། ཕྱི་ཟླ་༡༢ཚེས་༩ཉིན་བཀྲིས་ལྷུན་པོར་ལམ་རིམ་བསྡུས་དོན། ཕྱི་ཟླ་༡༢ཚེས་༡༣ཉིན་རྒྱུད་སྨད་གྲྭ་ཚང་དུ་གསང་བ་འདུས་པའི་རིམ་ལྔ་ཁྲིད་བསྡུས་ཀྱི་བཤད་ལུང་སྩོལ་གནང་མཛད་རྒྱུ་ཡིན་འདུག
རྒྱ་གར་ལྷོ་ཕྱོགས་ཁུལ་གྱི་མཛད་རིམ་གྲུབ་རྗེས། ༧གོང་ས་༧སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་གྱིས། ཕྱི་ཟླ་༡༢བའི་ཚེས་༢༩ནས་༣༡བར་ཉིན་གྲངས་གསུམ་རིང་དུས་འཁོར་གསུང་ཆོས་རྭ་བའི་ནང་མགོན་པོ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པ་དང་། འཇམ་དཔལ་དབྱངས་ཀྱི་རྗེས་སྣང་བཅས་སྩོལ་གནང་གི་མཛད་འཆར་འདུག
གཞན་ཕྱི་ཟླ་༩བའི་ཚེས་༢༧ཉིན་རྡ་སའི་ཉེ་འཁོར་བཀྲིས་ལྗོངས་གཞིས་ཆགས་སུ་ཆགས་པའི་ཁམས་སྒར་བཤད་གྲྭ་འབྲུག་མཐོ་སློབ་དྷརྨ་ཀཱ་རའི་སློབ་གཉེར་ལས་འཆར་དབུ་འབྱེད་ཀྱི་མཛད་སྒོའི་ཐོག་ཇི་ལྟར་གསོལ་འདེབས་ཞུས་དོན་ལྟར་ཆིབས་བསྒྱུར་སྐྱོང་གནང་མཛད་རྒྱུ་ཐུགས་གཏན་འཁེལ་འདུག

གསར་འགོད་པ། སྐལ་ལྡན་བློ་གྲོས།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།