སྤྲུལ་སྐུ་བསོད་སྦའི་གྲོགས་པོ་འཛིན་བཟུང་།

༄༅༎ད་རེས་ཉེ་ཆར་བོད་བསྟན་སྲིད་ཆེད་སྐུ་ལུས་མེར་མཆོད་ཕུལ་ཏེ་སྐུ་གཤེགས་པའི་མགོ་ལོག་སྤྲུལ་སྐུ་བསོད་སྦ་མཆོག་གི་སློབ་མ་ནམ་མཁའ་འཇིགས་མེད་ལགས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནང་འཛིན་བཟུང་བྱས་ཡོད་པའི་སྐོར་གནས་ཚུལ་ཐོན་ཡོད་པ་རེད་
གནས་ཚུལ་ཐོན་ཁུངས་ལ་གཞིགས་ན་ ནམ་མཁའ་འཇིགས་མེད་ལགས་ནི་ཞིང་གཤེགས་དམ་པ་སྤྲུལ་སྐུ་བསོད་སྦ་མཆོག་གི་སློབ་མའི་ཁོངས་རིན་པོ་ཆེ་དང་ཐུགས་འདྲིས་ཆེན་པོ་ཡོད་མཁན་ཞིག་ཡིན་པ་དང་ ཁོང་ནས་སྤྲུལ་སྐུའི་སྐུ་རུས་དང་འདྲ་པར་སོགས་འཁྱེར་ནས་ལྷ་སར་དགོངས་རྫོགས་མཆོད་འབུལ་ཆེད་ཕེབས་ཡོད་པ་དང་ རྒྱ་གཞུང་ཉེན་རྟོག་པ་དང་གསང་བའི་མི་སྣས་ཁོང་ལྷ་སའི་བར་སྐོར་གྱི་སྐོར་ལམ་ནས་ ད་རེས་གློ་བུར་འཛིན་བཟུང་བྱས་ཏེ་བཙན་འཁྲིད་བྱས་ཡོད་འདུག་
གནས་ཚུལ་ཐོན་ཁོངས་ལ་གཞིགས་ན་ རྒྱ་ནག་གཞུང་གིས་ཁོང་འཛིན་བཟུང་བྱ་དགོས་དོན་དམིགས་བསལ་གསལ་བཤད་བྱེད་ཀྱི་མེད་ཀྱང་ གླེང་ཕྱོགས་ཞིག་ལ་རྒྱ་གཞུང་ཉེན་རྟོག་པས་ ཁོང་གིས་ལྷ་སར་སྐད་འབོད་དང་བོད་རང་བཙན་གྱི་ཡིག་ཆ་འགྲེམས་གཏོར་སོགས་བྱས་པའི་ ཉེས་འཛུགས་བྱེད་ཀྱི་ཡོད་པ་དང་ རྒྱ་ནག་གཞུང་གིས་རྒྱལ་ས་ལྷ་སའི་ནང་ཁོང་དང་འབྲེལ་བ་ཡོད་པའི་ཕ་ཡུལ་གཅིག་པ་དང་ ངོ་ཤེས་གྲོགས་པོ་ཚོར་ཡང་འདྲི་རྩད་ཤུགས་ཆེ་བྱས་པའི་གནས་ཚུལ་ངོ་སྤྲོད་ཡོང་གི་ཡོདཔ་རེད་