རྡོ་རྗེ་བཀྲ་ཤིས་ལགས་ཀྱི་གཅེན་མོས་ཞུ་འབོད་ལས་འགུལ་སྤེལ་སྐབས་ཉེན་རྟོག་པས་རས་ཡོལ་ནག་པོས་བཏུམ་ནས་བཀག་འདུག

དེ་ཡང་འབྲེལ་ཡོད་བརྒྱུད་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྙན་དང་བཅས་གནས་ཚུལ་འབྱོར་བ་ལྟར་ན། འདི་ཚེས་༢༣དང་༢༤་ཉིན་གཉིས་རིང་། དེང་སྐབས་རྒྱ་ནག་གི་བཙོན་འོག་ཚེ་བཙོན་གྱི་ཁྲིམས་ཆད་འཁུར་བཞིན་པའི་འབྱོར་ལྡན་པ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་དམ་མགོན་ཏེ་ལགས་ཀྱིས་བོད་རང་སྐྱོང་ལྗོངས་ཟེར་བའི་མི་དམངས་ཁྲིམས་ཁང་མདུན་དུ་ཡང་བསྐྱར་མུ་མཐུད་དུ་ཞུ་འབོད་ལས་འགུལ་སྤེལ་ཡོད་པ་དང་། གནས་ཚུལ་ངོ་སྤྲོད་པས་གསུང་ན། ཉེ་ལམ་སྤྱི་ཟླ་གསུམ་པའི་ཚེས་༣༡ཉིན་ལྷ་ས་གྲོང་ཁྱེར་རྒྱ་ནག་གི་སྤྱི་བདེ་ཉེན་རྟོག་ཚན་པས་རྡོ་རྗེ་བཀྲ་ཤིས་ལགས་ཀྱི་གཅེན་པོ་རྡོ་རྗེ་ཚེ་བརྟན་ལགས་འབོད་འགུག་བྱས་ནས། རྡོ་རྗེ་བཀྲ་ཤིས་ལགས་ཀྱི་ཁྲིམས་ཆད་ཀྱི་གནད་དོན་ཐད་ཉེན་རྟོག་ཚན་པས་གོ་བསྡུར་རིམ་པ་བྱས་ཡོད་ཀྱང་ཁྲིམས་ཆད་བཏང་ཟིན་ལ་འགྱུར་བ་གཏོང་ཐུབ་ཐབས་མེད་ཚུལ་གསལ་བཤད་བྱས་པ་དང་མཉམ། མ་འོངས་བར་རྡོ་རྗེ་བཀྲ་ཤིས་ལགས་ཀྱི་གནད་དོན་དང་འབྲེལ་ནས་ངོ་རྒོལ་ལས་འགུལ་རིགས་སྤེལ་མི་ཆོག་པ་དང་དེ་འབྲེལ་གྱི་གནས་ཚུལ་ཕྱི་ལ་བསྒྲགས་མི་ཆོག དེ་ལྟར་བྱས་བ་ཡིན་ན་འཛིན་བཟུང་བྱེད་རྒྱུ་ཡིན་པའི་ཉེན་བརྡ་བཏང་ཡོད་འདུག་ཀྱང་། ཉེན་བརྡ་བཏང་མིན་ལ་མ་བལྟོས་བར་ད་ཐེངས་བསྐྱར་དུ་དྲང་བདེན་གྱི་ཐག་གཅོད་དགོས་བའི་ཞུ་འབོད་ལས་འགུལ་སྤེལ་བ་ཡིན་པ་ངོ་སྤྲོད་གནང་བྱུང་ལ། བརྙན་ནང་མཐོང་གསལ་ལྟར་ན། མགོན་པོ་སྐྱིད་ལགས་ཀྱིས་ཁྲིམས་ཁང་མདུན་ལས་འགུལ་སྤེལ་སྐབས་དེ་མ་ཐག་རྒྱ་ནག་གི་ཉེན་རྟོག་པ་དང་སྒོ་སྲུང་བ་ཚོས་རས་ཡོལ་ནག་པོ་ཞིག་གིས་ཁོང་མོའི་མཐའ་ནས་བཏུམ་སྟེ་ཕྱི་ནས་མཐོང་མི་ཐུབ་པ་བཟོས་བ་དང་འགོག་ཐབས་བྱས་འདུག་ལ་དེའི་རྗེས་ཀྱི་གནས་ཚུལ་ཁ་གསལ་མི་འདུག
དེ་སྔ་༢༠༡༠ལོའི་ཕྱི་ཟླ་༦པའི་ཚེས་༢༦ཉིན་ལྷ་སའི་རྒྱ་ནག་གི་འབྲིང་རིམ་མི་དམངས་ཁྲིམས་ཁང་གིས་གསང་བའི་ཁྲིམས་བཤེར་བྱས་པ་བརྒྱུད། ཚོང་པ་རྡོ་རྗེ་བཀྲ་ཤིས་ལགས་སུ་བུ་ལོན་སྔ་གཡར་དང་འབྲེལ་བའི་ངན་ཇུས་བཤམས་པའི་ཉེས་འཛུགས་འོག་ཚེ་བཙོན་གྱི་ཁྲིམས་ཐག་བཅད་ནས་གྲྭ་བཞི་བཙོན་ཁང་དུ་བཀག་སྟེ་ད་ཆ་མི་ལོ་བཅོ་ལྔ་ཙམ་འགྲོ་བཞིན་པའི་སྐབས་འདིར། རྡོ་རྗེ་བཀྲ་ཤིས་ལགས་ཀྱི་གཅེན་པོ་རྡོ་རྗེ་ཚེ་བརྟན་ལགས་དང་གཅེན་མོ་མགོན་ཏེ་ལགས། ཁོ་མོའི་ཁྱོ་ག་ཆོས་སྐྱོང་ལགས་གསུམ་གྱིས་ད་བར་ཡང་ནས་བསྐྱར་དུ་ཁྲིམས་ཁང་མདུན་སོགས་སུ་དྲང་བདེན་གྱི་ཐག་གཅོད་ཡོང་བའི་ཞུ་འབོད་ལས་འགུལ་རབ་དང་རིམ་པར་སྤེལ་ཡོད་པ་རེད།

གསར་འགོད་པ། ཀླུ་འབུམ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།