༸གོང་ས་མཆོག་གིས་སོག་ཡུལ་གྱི་ན་རོ་པ་རིན་པོ་ཆེ་མཆོག་གཙོས་པའི་སོག་རིགས་གཞོན་སྐྱེས་བརྒྱ་ལྷག་ལ་མཇལ་ཁ་སྩལ་ཡོད་པ།

སོག་ཡུལ་གྱི་ན་རོ་པ་རིན་པོ་ཆེ་མཆོག་གིས་སོག་རིགས་གཞོན་སྐྱེས་ཚོར་དེང་རབས་ཀྱི་ཚན་རིག་དང་ནང་པའི་ཆོས་གཉིས་ལ་མཐུན་པའི་ཆ་དང་ལེགས་ཆ་ལེན་རེས་སྣ་མང་ཡོད་པའི་ལམ་སྟོན་དང་། ཆོས་ཚན་ཕན་ཚུན་བགྲོ་གླེང་བརྗེ་རེས་སོགས་ཀྱི་ཐད་ཕྱག་ལས་ཤུགས་ཆེ་གནང་གི་ཡོད་པས། ད་ལམ་ན་རོ་པ་རིན་པོ་ཆེ་མཆོག་ནས་ཆེད་དུ་སོག་ཡུལ་གྱི་གཞོན་སྐྱེས་ཕོ་མོ་བརྒྱ་ལྷག་གི་དབུ་ཁྲིད་དེ་བཞུགས་སྒར་དུ་བཅར་ཡོད་པར། ཟླ་ ༡༡ ཚེས་ ༡༡ ཉིན་བཞུགས་སྒར་༧རྒྱལ་བའི་ཕོ་བྲང་དུ་བོད་མིའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ནས་ཆེད་དམིགས་མཇལ་ཁ་སྩལ་ཡོད་པས། ཁོང་ཚོ་ཧ་ཅང་དགའ་སྤྲོ་ཆེན་པོ་དང་ན་རོ་རིན་པོ་མཆོག་སོག་རིགས་གཞོན་སྐྱེས་ཁྲོད་ཆོས་ཚན་ཟུང་སྦྲེལ་གྱི་གོ་རྟོགས་སྤེལ་བའི་ཕྱག་ལས་འཁྲུག་ཆ་དོད་ཤོས་གནང་མཁན་ཞིག་ཆགས་ཡོད་པ་སོགས། སོག་ཡུལ་གྱི་བླ་མ་ཟླ་བ་ཕུར་བུ་ལགས་ནས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་གི་འདུག

སོག་ཡུལ་གྱི་གཞོན་སྐྱེས་བུད་མེད་ཚེ་སྐྱིད་ལགས་ནས་༸གོང་ས་མཆོག་ལ་མཇལ་ཏེ་དགའ་ཚོར་ཤིན་ཏུ་ཆེན་པོ་བྱུང་བ་དང་། སོག་ཡུལ་གྱི་མི་མང་བརྒྱ་ཆ་ ༦༠ ལྷག་ནང་པའི་ཆོས་ལ་དད་མོས་གནང་མཁན་ཆགས་ཡོད་ནའང་། ང་རང་གཞོན་སྐྱེས་ཤིག་ཡིན་པའི་ཆ་ནས་ནང་ཆོས་ལ་དོ་སྣང་བྱ་དགོས་ཀྱི་ཡོད་མོད། མཐུན་རྐྱེན་མ་ཚང་བའི་དཀའ་ངལ་ཡོད་པ་སོགས་ཀྱིས་ནང་པའི་ཆོས་ངོ་མ་དེ་ཤེས་པའི་དོན་དུ་བཞུགས་སྒར་དུ་ངོ་བཅར་གནང་བའི་སྐོར་འགྲེལ་བརྗོད་གནང་གི་འདུག་ལ། སོག་ཡུལ་ནས་ཡོང་བ་གྷན་ཛུ་རུཀ་ལགས་ཀྱིས། ངའི་ཐོག་མའི་བག་ཆགས་ནི་ས་གནས་འདི་ཧ་ཅང་མཛེས་སྡུག་ལྡན་པ་དང་ཚོར་སྣང་སྐྱིད་པོ་བྱུང་བ་མ་ཟད།དམིགས་བསལ་༧གོང་ས་མཆོག་ལ་མཇལ་ཁ་ཞུས་ནས་བརྗོད་མི་ཤེས་པའི་དགའ་ཚོར་བྱུང་བ་ངོ་སྤྲོད་གནང་གི་འདུག ཡང་སོག་ཡུལ་གྱི་མཇལ་བཅར་བ་བྷག་ངྷི་ཏི་ལགས་ནས་༸གོང་ས་མཆོག་ལ་མཇལ་བསྐལ་ལྡན་པ་ནི་ཧ་ཅང་རྩ་ཆེན་པོ་དང་བསྐལ་བཟང་ཡིན་ཞིང་། སོག་ཡུལ་གྱི་མི་བརྒྱ་སྐོར་ཅིག་༸གོང་ས་མཆོག་ལ་མཇལ་རྒྱུའི་བསྐལ་བཟང་གི་གོ་སྐབས་ཐོབ་པ་ནི་ཧ་ཅང་གིས་བཀའ་དྲིན་བསྐྱངས་པ་དང་། ང་ཚོ་ལ་མཚོན་ན་མཇལ་ཁ་འདི་ཧ་ཅང་གིས་རྩ་ཆེན་པོར་ཚོར་གྱི་ཡོད་ཅེས་འགྲེལ་བརྗོད་གནང་བྱུང་།

སོག་པོ་ཧལ་ཧའི་ཡུལ་ནི་སྔ་མོ་ནས་བོད་ཀྱི་ནང་ཆོས་ལ་དད་མོས་གནང་མཁན་དང་། ལྷག་པར་༸རྒྱལ་དབང་སྐུ་ཕྲེང་གསུམ་པ་ནས་བཟུང་སྐུ་ཕྲེང་རིམ་བྱོན་དང་ཐུན་མོང་མ་ཡིན་པའི་ཆོས་སྲིད་ཀྱི་འབྲེལ་ལམ་ཟབ་མོ་ཡོད་པས། བར་ལམ་སོག་ཡུལ་ནང་གསར་བརྗེ་ལངས་ཏེ་བསྟན་པ་ལ་ཉམས་ཆག་ཆེན་པོ་ཕྱིན་པར། ༸གོང་ས་མཆོག་སོག་ཡུལ་དུ་ཐེངས་མང་ཆིབས་བསྒྱུར་གྱིས་སོག་ཡུལ་ནང་བསྟན་པ་སླར་གསོའི་དོན་དུ་སྐུ་ངལ་རྒྱ་ཆེ་བསྐྱོན་པའི་འབྲས་བུར། དེང་སང་སོག་ཡུལ་ནང་དགོན་སྡེ་གྲྭ་ཚང་དང་བླ་སྤྲུལ་དགེ་བཤེས་སོགས་ཧ་ཅང་མང་པོ་འཐོན་གྱི་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།