༸གོང་ས་མཆོག་གིས་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ཧྥོ་རེས་ལྦི་ཊེ་ཀར་ལགས་ལ་མཇལ་ཁ་སྩལ་གནང་བ།
ཟླ་ ༡༢ ཚེས་ ༤ རས་གཟའ་ལྷག་པའི་ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ཧོ་ལི་ལྦུ་ཌི་གློག་བརྙན་འཁྲབ་སྟོན་པ་གྲགས་ཅན་དང་དེ་སྔ་སྙན་གྲགས་ཅན་གྱི་ (Oscars) གཟེངས་རྟགས་ཐོབ་མྱོང་མཁན་སྐུ་ཞབས་(Forest Steven Whitaker) ལགས་དང་ཁོང་གི་བུ་མོ་(Sonnet Neol Whitaker) རྣམ་གཉིས་ལ་མཇལ་ཁ་སྩལ་གནང་ཡོད་པ་དང་། མཇལ་ཁ་གྲུབ་མཚམས་སྐུ་ཞབས་ཧྥོ་རེས་ལྦི་ཊེ་ཀར་ལགས་ཀྱིས་འདི་ག་རླུང་འཕྲིན་ཁང་ལ། ཁོང་དང་ཁོང་གི་བུ་མོ་གཉིས་ཀར་ཐེངས་འདིར་༸གོང་ས་མཆོག་གི་མཇལ་ཁ་ཐོབ་པར་ཧ་ཅང་དགའ་ཚོར་ཆེན་པོ་བྱུང་ཡོད་སྐོར་དང་། ༸གོང་ས་མཆོག་ནི་འཛམ་གླིང་ནང་ཞི་བདེའི་དེད་དཔོན་ཡིན་པས།
ཁོང་ནས་ཀྱང་བུད་མེད་དང་གཞོན་སྐྱེས་གཙོ་བོར་གྱུར་བའི་དགོས་མཁོ་ཅན་གྱི་མི་རྣམས་ལ་རོགས་སྐྱོར་བརྒྱུད། ཁོང་རྣམ་པའི་མི་ཚེ་ལམ་ལྷོངས་ཡོང་ཆེད་ (UNESCO) ཚོགས་པའི་ནང་ཕྱག་ལས་གནང་གི་ཡོད་ཅིང་། ལས་གཞི་དེའི་བརྒྱུད་ད་བར་མི་ས་ཡ་ ༢ ཙམ་ལ་ཕན་ཐོགས་སྒྲུབ་བཞིན་ཡོད་སྐོར་དང། ༸མགོན་པོ་མཆོག་སྐུ་ཁམས་གསལ་ཐང་དང་སྐུ་ཚེ་ཡུན་རིང་བརྟན་པའི་སྨོན་ལམ་ཡོད། ཅེས་གསུངས་བྱུང་།
སྐུ་ཞབས་ཧྥོ་རེས་ལྦི་ཊེ་ཀར་ལགས་ནས་དེ་སྔ་ཕྱི་ལོ་ ༢༠༡༧ ཟླ་ ༧ ཚེས་ ༢༣ ཉིན་ཨ་རི་མི་ནི་སོ་ཌར་བྱམས་བརྩའི་གནད་དོན་ཐོག་གི་བགྲོ་གླེང་ཚོགས་འདུའི་སྐབས་༸གོང་ས་མཆོག་གི་མཇལ་ཁ་ཞུས་ཡོད་པ་དང་། ཐེངས་འདིར་ཁོང་གིས་༸གོང་ས་མཆོག་གི་ཞལ་མཇལ་ཞུས་པ་ནི་ཐེངས་གཉིས་པ་དེ་ཆགས་ཀྱི་ཡོད་འདུག་ལ། ཐེངས་འདིར་ཁོང་ནས་བཞུགས་སྒར་དུ་༸གོང་ས་མཆོག་གི་མཇལ་ཁ་ཞུས་པ་དང་མཉམ། འདི་ཚེས་ ༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་དང་ལྷན་དུ་མཇལ་འཕྲད་གནང་ཡོད་ཅིང་། འདི་ཚེས་ ༤ ཉིན་༸གོང་ས་མཆོག་གི་མཇལ་ཁ་གྲུབ་མཚམས་ཕྱི་དྲིལ་བོད་ཀྱི་འགྲེམས་སྟོན་ཁང་དང་བོད་ཀྱི་དཔེ་མཛོད་ཁང་དུ་འཚམས་གཟིགས་སུ་ཕེབས་ཡོད་པ་རེད་འདུག
རྩ་བའི་སྐུ་ཞབས་ཧྥོ་རེས་ལྦི་ཊེ་ཀར་ལགས་ནས་ལོ་མང་རིང་། འགྲོ་བ་མིའི་བདེ་དོན་དང་ལྷག་པར་ཞི་བདེ་དང་མཐུན་སྒྲིལ་ཆེད་ཕྱག་ལས་གནང་ཡོད་ཅིང་། ཕྱི་ལོ་ ༢༠༡༤ ལོར་ཁོང་ཡུ་ནེ་སི་ཀོའི་(UNESCO)ཞི་བདེ་དང་མཐུན་སྒྲིལ་གྱི་སྐུ་ཚབ་ཏུ་སྐོ་གཞག་གནང་ཡོད་པ་རེད་འདུག མ་ཟད་ཁོང་ནི་(Whitaker)ཞི་བདེ་དང་འཕེལ་རྒྱས་ལྟེ་གནས་ཁང་ཐོག་མར་གསར་འཛུགས་གནང་མཁན་ཞིག་དང་། ད་བར་ཁོང་ནས་གློག་བརྙན་ ༩༠ ལྷག་ནང་འཁྲབ་སྟོན་གནང་ཡོད་ཅིང་གློག་བརྙན་འཁྲབ་སྟོན་རྩེ་ཕུད་ཀྱི་ཆེས་མཐོའི་གཟེངས་རྟགས་ཡང་སྣ་མང་ཞིག་ཐོབ་མྱོང་ཡོད་པ་རེད་འདུག
གསར་འགོད་པ། བདེ་ཆེན་དབང་མོ།
རྩོམ་སྒྲིག་པ། བདེ་སྐྱིད་ཀུན་སྒྲོལ།
དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།