རི་ཀྱོ་ལགས་ཀྱིས་ཁ་ཆེམས་འདི་ལྟར་བཞག་འདུག
2012.08.21
དེ་ཡང་ཚངས་དབྱངས་རྒྱ་མཚོས་འདི་གའི་གསར་ཁང་ལ་བརྗོད་དོན། ༢༠༡༢ ཟླ་ ༥ ཚེས་ ༣༠ ཉིན་གྱི་ཕྱི་དྲོའི་དུས་ཚོད་ ༣ ཡས་མས་སུ་འཛམ་ཐང་ཇོ་ནང་དགོན་ཆེན་གྱི་ཉེ་འཁྲིས་སུ་བོད་མི་རིགས་ཀྱི་རྩ་དོན་ཆེད་སྐུ་ལུས་མེར་བསྲེགས་གནང་མཁན་རྒྱལ་གཅེས་དཔའ་མོ་རི་ཀྱོ་ལགས་ཀྱི་ཁ་ཆེམས་ཡི་གེ་རྙེད་སོན་བྱུང་བའི་ནང། ཁ་སྐད་བྱས་ཏེ་བྲིས་ཡོད་པ་དེ་ཡང་"འཛམ་གླིང་བདེ་སྐྱིད་ཐོབ་པར་ཤོག རྒྱལ་བ་ཡིད་བཞིན་ནོར་བུ་བོད་ལ་བྱོན་ཐུབ་པའི་ཆེད། བཤའ་ཚོང་མ་བྱེད། ཉེ་རིང་ལ་མ་རྐུ། བོད་སྐད་ཤོད། སྲོག་མ་གཅོད། ནང་འཛིང་མ་བྱེད། སེམས་ཅན་ཐམས་ཆད་ཀྱི་སྡུག་བསྔལ་ང་ཡོད་པར་ཤོག ང་མ་ཤི་བར་རྒྱ་ལག་ལ་ཤོར་སོང་ན་ཁྱེད་ཚོས་མ་འཛང་མ་སྣོག (ཡུལ་སྐད།) མཐུན་འབྲེལ་བྱོས། ལག་སྡང་གཅིག་ཏུ་འབྲེལ་ནས་རིག་གནས་སྦྱོང་། རིག་གནས་སྦྱོང་། ང་མེར་བསྲེགས་རྗེས་བཟའ་མི་ཚང་མས་སེམས་མ་སྡུག"ཞེས་འཁོད་འདུག
རྒྱལ་གཅེས་དཔའ་མོ་རི་ཀྱོ་ལགས་ནི་འཛམ་ཐང་བར་མ་ཡུལ་ཚོའི་གཙང་སྡེ་ནས་ཡིན་ལ། འཚོ་གནས་འབྲོག་པ་ཡིན་འདུག ཁོ་མོ་ནམ་རྒྱུན་གྲོང་ཕན་ཚུན་ལ་མཐུན་ཐབས་ལ་འབད་པ་དང་། ཉམ་ཐག་ལ་རོགས་པ་བྱེད་པ། དགེ་སྤྱོར་ལ་འབད་པ་བྱེད་མཁན་ཞིག་ཡིན་འདུག་ལ། མེར་བསྲེགས་མ་བཏང་གི་སྔོན་གྱི་ཉིན་མང་པོའི་ནང་ཉིན་མཚན་གཉིས་ལ་ཕྱག་འཚལ་གྱིན་འདུག་པས་སྔོན་མ་ཞིག་ནས་ཁོ་མོས་རང་ལུས་མེར་སྲེག་གཏོང་རྒྱུར་གྲ་སྒྲིག་བྱས་ཡོད་པར་ས་གནས་མང་ཚོགས་ཀྱིས་ངོས་འཛིན་བྱེད་ཀྱིན་ཡོད་འདུག ཁོ་མོ་ད་སྐབས་རང་ལོ་ ༣༦ ཡིན་པ་དང་། ཁོ་མོའི་ཕ་མིང་ལ་ཕྱུག་ལོ་དང་། མ་མིང་ལ་རིན་ལྷ། ཁྱོ་གའི་མིང་ལ་སྣང་སྟོང་ཟེར་ཞིང་། ཁོང་གཉིས་ལ་ཕྲུ་གུ་ཆུང་ཆུང་གསུམ་ཡོད་འདུག