མ་འོངས་བོད་པའི་སློབ་ཕྲུག་རྣམས་ཀྱི་སྐད་ཡིག་ཡར་རྒྱས་ཐད་རིག་ནུས་གསར་པ་ཞིག་དབུ་འཛུགས་གནང་འཆར་ཡོད་པ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ནས་གསུངས་པ།

ཟླ་ ༡༡ པའི་ཚེས་ ༣ ཉིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་ཟློས་གར་ཚོགས་ཁང་དུ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནས་སྨོན་ལམ་མི་བཟོས་རིག་ནུས་ཀྱི་ཚོད་ལྟ་རིམ་པ་དང་པོ་དེ་ལེགས་གྲུབ་དང་བསྟུན། སྨོན་ལམ་མངོན་འགྱུར་གྱི་མཛད་སྒོ་ཐེངས་གཉིས་པ་དེ་འཚོགས་སོང་བ་དང་། ཐེངས་འདིའི་སྨོན་ལམ་མངོན་འགྱུར་གྱི་མཛད་སྒོའི་སྐབས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནས། སྨོན་ལམ་ཡིག་སྒྱུར་མཉེན་ཆས་གསར་པ་དང་སྨོན་ལམ་དྲ་རྒྱའི་ཟུར་སྣོན། སྨོན་ལམ་མཉམ་རུབ། སྨོན་ལམ་མཐེབ་གཞོང་དང་སྨོན་ལམ་མེ་ལོང་བཅས་མངོན་འགྱུར་རིམ་པ་ལྔ་དངོས་སུ་དབུ་འབྱེད་གནང་སོང་བ་དང་། སྨོན་ལམ་གྱི་འཕྲུལ་ལས་བརྡ་འཕྲིན་ངོས་ནས་བོད་ཡིགབཀོལ་སྤྱོད་བྱེད་པར་སྟབས་བདེ་དང་དཀའ་ངལ་སེལ་ཐབས་སོགས། སྲིད་འབྱོར་རིག་གསུམ་ཕྱོགས་ཡོངས་ནས་ལས་འགན་སྒྲུབ་ནུས་པ་ཞིག་བཟོ་ཐབས་བྱས་ཡོད་ཅིང་། མ་འོངས་སློབ་ཕྲུག་རྣམས་ཀྱི་སྐད་ཡིག་དང་པོ་ཡར་རྒྱས་ཐད་རིག་ནུས་གསར་པ་ཞིག་དབུ་འཛུགས་གནང་རྒྱུའི་འཆར་གཞི་ཡོད་པ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

སྨོན་ལམ་མངོན་འགྱུར་གྱི་མཛད་སྒོའི་དེའི་ཐོག སྨོན་ལམ་ཡིག་བསྒྱུར་མཉེན་ཆས་གསར་པ་དང་། སྨོན་ལམ་དྲ་རྒྱའི་ཟུར་སྣོན་དང་སྨོན་ལམ་མེ་ལོང་སོགས་ཀྱི་སྐོར་འབྲེལ་ཡོད་ལས་བྱེད་རྣམས་ནས་ངོ་སྤྲོད་དང་འབྲེལ་དེ་དག་གི་ཁྱད་ཆོས་དང་དམིགས་བསལ་ཕན་ནུས། དེ་བཞིན་དེ་སྔ་དང་མི་འདྲ་བའི་བྱེད་ནུས་སོགས་ཀྱི་སྐོར་ལ་ཟབ་རྒྱས་ངོ་སྤྲོད་གནང་སོང་ལ། སྨོན་ལམ་བརྡ་འཕྲིན་དེ་བཞིན་བཀོལ་སྤྱོད་གནང་མཁན་ཁག་ཅིག་ནས་ཀྱང་། སྨོན་ལམ་མི་བཟོས་རིག་ནུས་དེ་བཞིན། ཉིན་རེའི་འཚོ་བའི་ཁྲོད་ཕན་ཐོགས་ཆེན་ཞིང་། བོད་ཀྱི་སྐད་ཡིག་ཐད་ཞབས་འདེགས་རླབས་ཆེན་སགྲུབ་བཞིན་ཡོད་སྐོར་འདི་ག་རླུང་འཕྲིན་ཁང་ལ་འགྲེལ་བརྗོད་གནང་གི་འདུག

གཞི་རྩའི་སྔ་ལོའི་ཟླ་ ༡༡ པའི་ནང་སྨོན་ལམ་མངོན་འགྱུར་གྱི་མཛད་སྒོ་ཐེངས་དང་པོའི་ཐོག བོད་ལམ་མི་བཟོས་རིག་ནུས་ཀྱི་རིག་སྒྱུར་རིག་ནུས་དང་། ཀློག་འདོན་རིག་ནུས། སྒྲ་འཛིན་རིག་ནུས། ཡིག་འཛིན་རིག་ནུས་བཅས་མང་ཚོགས་ཁྲོད་འགྲེམས་སྤེལ་གནང་ཡོད་ཅིང་། ཐེངས་འདིའི་སྨོན་ལམ་མངོན་འགྱུར་གྱི་མཛད་སྒོའི་ཐོག དགའ་ལྡན་ཕོ་བྲང་གི་སྐུ་ཚབ་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཁག་ཅིག དེ་བཞིན་སེར་སྐྱ་མང་ཚོགས་མི་ཉུང་བ་ཞིག་ནས་ལྷན་བཞུགས་གནང་སོང་།

གསར་འགོད་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།