བོད་ཀྱི་དབུ་ཁྲིད་༧གོང་ས་མཆོག་དང་ཨོ་བྷ་མ་རྣམ་གཉིས་མཇལ་འཕྲད་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་ཟུར་པ་སྐུ་ཞབས་བྷ་རག་ཨོ་བྷ་མ་(Barack Obama)་རྣམ་གཉིས་མཇལ་འཕྲད་གནང་འདུག
དེ་ཡང་འདི་གའི་གསར་འགོད་པས་གནས་ཚུལ་བཏང་བ་ལྟར་ན། ཕྱི་ཟླ་བཅུ་གཉིས་པའི་ཚེས་གཅིག་ཉིན་རྒྱ་གར་གྱི་རྒྱལ་ས་ལྡི་ལིའི་(ITC Maurya)་མོརྱ་གསོལ་མགྲོན་ཁང་དུ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་ཟུར་པ་དང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་བྷ་རག་ཨོ་བྷ་མ་རྣམ་གཉིས་མཇལ་འཕྲད་གནང་ཡོད་པ་དང་། དེ་ནས་༧གོང་ས་མཆོག་ལྡི་ལི་ནས་མཁའ་ལམ་བརྒྱུད་ཕྱིར་གྷ་གྷལ་གནམ་ཐང་དུ་ཞབས་སོར་འཁོད་སྐབས། ཕྱི་ནང་གསར་འགོད་པ་ཚོར་གསུངས་དོན། ཨོ་བྷ་མ་སྔོན་མ་ནས་ངོས་ཀྱི་ངོ་ཤེས་པ་ཙམ་མ་ཟད། དངོས་གནས་བློ་ཐུབ་གྲོགས་པོ་ཆགས་བསྡད་ཡོད། ཁོང་གིས་རྫིག་པོ་དང་སྤམ་པོ་དེ་འདྲ་བྱེད་ཀྱི་མ་རེད། ཁ་གསལ་གཏིང་གསལ་བྱེད་མཁན་ཞིག་རེད། ངོས་རང་ཨ་རིར་ཕར་འགྲོ་རྒྱུར་གཟུགས་པོའི་ཆ་ནས་ཅུང་ཁག་པོ་རེད། དེར་བརྟེན་ངོས་རང་གི་བློས་ཐུབ་གྲོགས་པོ་རྒྱ་གར་ལ་ཕེབས་བསྡད་དུས་ཐུག་རྒྱུའི་འདོད་པ་བྱུང་། ངོས་རང་གཉིས་ཐུག་ནས་ད་ལྟའི་འཛམ་གླིང་སྒང་འདིར་མི་གསོད་ཀྱི་དཀའ་ངལ་ཞེ་དྲག་མང་པོ་ཡོང་གི་ཡོད་པ་དང་། དེ་ཚང་མ་མིས་བཟོས་པ་ཡིན་སྟབས། ང་ཚོ་འགྲོ་བ་མི་གཅིག་གྱུར་གྱི་འདུ་ཤེས་ཐོག་ནས་དཀའ་ངལ་དེ་དག་སེལ་བའི་སྐོར་ལ་བཀའ་མོལ་བྱུང་། ཅེས་གསུངས་འདུག
ཐེངས་འདིའི་མཇལ་འཕྲད་འདི་ནི་སྐུ་ཞབས་བྷ་རག་ཨོ་བྷ་མ་མཆོག་ཨ་རིའི་སྲིད་འཛིན་ལས་འགན་ནས་འཁྱུར་རྗེས་༧གོང་ས་མཆོག་དང་མཇལ་འཕྲད་གནང་བ་ཐོག་མ་དེ་ཆགས་ཡོད་པ་དང་། ཨ་རིའི་སྲིད་འཛིན་ཟུར་པ་ཨོ་བྷ་མ་མཆོག་ད་རེས་ཕྱི་ཟླ་བཅུ་གཅིག་པའི་ཚེས་༢༩་ཉིན་རྒྱ་ནག་རྒྱལ་ས་པེ་ཅིང་དུ་རྒྱ་ནག་གི་སྲིད་འཛིན་ཞི་ཅིན་ཕིང་(Xi Jinping)་དང་ཐུག་འཕྲད་གནང་རྗེས་རྒྱ་གར་དུ་ཕེབས་འབྱོར་བྱུང་བ་ཡིན་པ་རེད།

གསར་འགོད་པ་འཆི་མེད།