རྒྱ་གར་གྱི་མུམ་སྦའེ་ནང་དྲག་རྒོལ་དེ་པ་ཀི་སི་ཐན་དང་འབྲེལ་བ།

རྒྱ་གར་གྱི་གྲོང་ཁྱེར་མུམ་སྦའེ་ནང་དྲག་རྒོལ་སྤེལ་མཁན་གྱི་དྲག་སྤྱོད་པ་རྣམས་པ་ཀི་སི་ཐན་དྲག་སྤྱོད་སྒྲིག་འཛུགས་དང་འབྲེལ་བ་ཡོད་པའི་སྐོར།

2008-12-31
Share

༄༅༎ཉེ་ལམ་རྒྱ་གར་གྱི་གྲོང་ཁྱེར་མུམ་སྦའེ་ནང་དྲག་རྒོལ་སྤེལ་མཁན་གྱི་དྲག་སྤྱོད་པ་རྣམས་པ་ཀི་སི་ཐན་ནང་རྟེན་གཞི་བྱས་པའི་ལཤི་ཀར་ཨེ་ཏོའེ་སྦ་ཞེས་པའི་དྲག་སྤྱོད་སྒྲིག་འཛུགས་དང་འབྲེལ་བ་ཡོད་པ་པ་ཀི་སི་ཐན་གྱི་རྟོགས་ཞིབ་པ་ཚོས་ཤེས་རྟོགས་ཐུབ་ཡོད་སྐོར་ཨ་རིའི་ལྦོལ་སི་རིཏ་ཇར་ནེལ་གསར་ཤོག་གིས་གནས་ཚུལ་སྤེལ་ཡོད་པ་རེད།

དེ་ཡང་གསར་ཤོག་འདིས་གནས་ཚུལ་སྤེལ་འདོན་ལྟར་ན་པ་ཀི་སི་ཐན་གྱི་ཉེན་རྟོག་པས་འཛིན་བཟུང་བྱས་པའི་ལཤེ་ཀར་ཨེ་ཏོའེ་སྦའི་ཚོགས་མི་ཛ་ར་ཤའ་ཟེར་བས་ཉེན་རྟོག་རྟོགས་ཞིབ་པར་རྒྱ་གར་ནང་དྲག་རྒོལ་གྱི་ལས་འགུལ་དེ་བརྒྱུད་སྐུལ་བྱེད་མཁན་ཞིག་ཁོ་པ་ཡིན་པ་ངོས་ལེན་བྱས་ཡོད་སྐོར་བཀོད་ཡོད་པ་དང་མིང་དོན་མ་བྱས་པའི་པ་ཀི་སི་ཐན་གཞུང་གི་ཉེན་རྟོག་དཔོན་རིགས་ཤིག་གིས་ཛ་ར་ཤའ་ཡིས་དྲག་རྒོལ་གྱི་ལས་དོན་དེ་དང་འབྲེལ་བ་ཡོད་པ་ངོས་ལེན་བྱེད་བཞིན་ཡོད་པའི་གནས་ཚུལ་ངོ་སྤྲོད་གནང་ཡོད་སྐོར་བཀོད་ཡོད་པ་རེད།

གོང་ཞུས་གསར་ཤོག་གི་ནང་གནས་ཚུལ་སྤེལ་འདོན་ལྟར་ན་ཨ་རིའི་གནས་ཚུལ་གསང་ཉན་བྱེད་མཁན་ཚོས་མུམ་སྦའེ་གྲོང་ཁྱེར་ནང་དྲག་སྤྱོད་པས་དྲག་རྒོལ་བརྩམས་བཞིན་པའི་སྐབས་དྲག་སྤྱོད་པས་པ་ཀི་སི་ཐན་ནང་ལཤེ་ཀར་ཨེ་ཏོའེ་སྦ་དྲག་སྤྱོད་མི་སྣ་ཛ་རའ་ཤའ་ལ་ཁ་དཔར་བརྒྱུད་སྐད་ཆ་བཤད་ཡོད་པ་དང་ཁོ་པས་ཁ་དཔར་ཐོག་དྲག་སྤྱོད་པ་ཚོར་ལས་དོན་མུ་མཐུད་བྱུས་བཀོད་བྱས་ཡོད་པའི་གནས་ཚུལ་ར་འཕྲོད་བྱུང་ཡོད་སྐོར་ཡང་བཀོད་ཡོད་པ་རེད།

ཉེ་ལམ་གྱི་དྲག་རྒོལ་གྱི་དོན་རྐྱེན་དེས་རྒྱ་གར་དང་པ་ཀི་སི་ཐན་དབར་སྤྱིའི་འབྲེལ་ལམ་ལ་དོ་ཕོག་གང་ཙམ་བཏང་ཡོད་པ་དང་རྒྱལ་ཁབ་དེ་གཉིས་ཀྱི་དབར་སླར་ཡང་དམག་འཐབ་ཀྱི་འཇིགས་པ་ཡོང་སྲིད་པའི་ཁོར་ཡུག་ཅིག་བསྐྲུན་ཡོད་པ་རེད།

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎

དྲ་གནས་ཆ་ཚང༌།