རྒྱ་ནག་གི་སྲིད་བློན་ལ་ངོ་རྒོལ་དང་བོད་དོན་རེ་སྐུལ་གནང་འདུག

རྒྱ་ནག་གི་དཔོན་རིགས་ཚོའི་ཚོང་དང་ཆབ་སྲིད་ཀྱི་གནོན་ཤུགས་འོག་མ་ཚུད་པ་གནང་དགོས་པའི་འབོད་སྐུལ་ཞུས་འདུག
རྒྱ་ནག་གི་སྲིད་བློན་ལཱི་ཀེ་ཅིཡང་ཨའོསི་ཊརེ་ལི་ཡའི་ཡུལ་གྲུར་རྒྱལ་དོན་འཚམས་གཟིགས་སུ་ཕེབས་འབྱོར་ཡོད་ཅིང་། ཕྱི་ཚེས་ ༢༣ གཟའ་ཕུར་བུའི་ཉིན་རྒྱལ་ས་ཀེན་སྦེ་རར་ཡོད་པའི་རྒྱལ་ཡོངས་གྲོས་ཚོགས་སུ་ཕེབས་སྐབས། བོད་མི་དང་བོད་དོན་རྒྱབ་སྐྱོར་བ་དེ་བཞིན་རྒྱ་ནག་གི་དྲག་གནོན་འོག་པ་ཕྷ་ལུང་ཀོང་ཆོས་འཁོར་སྒོམ་གྲུབ་ཚོགས་པའི་མི་སྣ་སོགས་ནས་ངོ་རྒོལ་སྐད་འབོད་ཆེན་པོ་བྱས་འདུག་ལ། ད་བཞིན་ཕྱི་ཚེས་ ༢༤ ཉིན་ཨོསི་ཏྲེ་རི་ལི་དཔལ་འབྱོར་ལྟེ་གནས་ཀྱི་གྲོང་ཁྱེར་སིཌ་ནིར་ཕེབས་སྐབས་ཀྱང་བོད་མི་ཚོས་ངོ་རྒོལ་གྱི་ལས་འགུལ་སྤེལ་འདུག།  ངོ་རྒོལ་གྱི་ལས་འགུལ་དེ་དག་ཨའོསི་ཊརེ་ལི་ཡའི་ནང་ཡོད་པའི་བོད་རིགས་སྤྱི་མཐུན་ཚོགས་པ་དང་བོད་དོན་རྒྱབ་སྐྱོར་ཚོགས་པ་སོགས་མཉམ་འབྲེལ་གྱི་ཐོག་ནས་གོ་སྒྲིག་བྱས་པ་ཡིན་འདུག། དེ་སྔ་བོད་ཀྱི་སྲིད་དོན་བཙོན་ཟུར་མང་པོ་ཞིག་ལོ་ལྟར་སྐྱབས་བཅོལ་བའི་ཁོངས་སུ་ཨའོསི་ཊརེ་ལི་ཡར་གཞིས་སྤོས་བྱེད་ཀྱི་ཡོད་སྟབས། ད་ཆ་ཡུལ་དེའི་ས་གནས་འདྲ་མིན་གྱི་ནང་བོད་མི་བརྒྱ་ཕྲག་འགའ་ཤས་གནས་སྡོད་བྱེད་བཞིན་ཡོད་པ་རེད། བོད་མི་ཚོས་རྒྱ་ནག་གི་དཔོན་རིགས་ཡུལ་དེའི་ནང་ནམ་ཡོང་སྐབས་ངོ་རྒོལ་གྱི་ལས་འགུལ་སྤེལ་གྱི་ཡོད་པར་མ་ཟད། བོད་རིགས་ཚོགས་པའི་སྒྲིག་འཛུགས་ཀྱི་ངོ་བོའི་ཐོག་ནས་ཨའོསི་ཊརེ་ལི་ཡའི་གཞུང་དང་གྲོས་ཚོགས་ལ་བོད་མིའི་དགོས་འདུན་གྱི་ཡིག་ཆ་ཡང་མཁོ་སྤྲོད་ཞུ་སྲོལ་ཡོད་པ་ལྟར། ད་རེས་ལཱི་ཀེ་ཅིཡང་གི་འཚམས་དང་བསྟུན་ཏེ། ཨའོསི་ཊརི་ལི་ཡའི་གཞུང་དང་གྲོས་ཚོགས་ནས་རྒྱ་ནག་དང་མཉམ་དུ་བཀའ་མོལ་གནང་སྐབས་བོད་ནང་གི་དངོས་ཡོད་དཀའ་ངལ་སེལ་ཐབས་ཐད་བཀའ་བསྡུར་གནང་དགོས་པ་དང་།  ཆགས་འཇིགས་མཚམས་སུ་སླེབས་པའི་བོད་མི་རིགས་སྲུང་སྐྱོབ་ཆེད་རྒྱབ་སྐྱོར་ཡོང་བ། ལྷག་པར་དུ་ཨའོསི་ཊརེ་ལི་ཡ་རྒྱ་ནག་གི་ཆབ་སྲིད་དང་དཔལ་འབྱོར་གྱི་ཤུགས་རྐྱེན་འོག་མི་ཚུད་པ་གནང་དགོས་པ་སོགས་ཀྱི་དགོས་འདུན་དང་འབོད་སྐུལ་ཞུས་འདུག

གསར་འགོད་པ་རིག་ལྡན་སྒྲོལ་མ།