སུའུ་དན་ནང་རྒྱ་མི་ལས་བཟོ་བ་བཙན་ཁྲིད།

༄༅༎ཨཕ་རི་ཀའི་སུའུ་དན་(Sudan)རྒྱལ་ཁབ་ཀྱི་བྱང་ཤར་ཞིང་ཆེན་ནང་དུ་ཁ་སྔོན་ཕྱི་ཟླ་དྲུག་པ་ནས་བཟུང་གཞུང་གི་དམག་དཔུང་དང་གྱེན་ལོག་ཤོག་ཁག་དབར་དམག་འཐབ་བྱེད་བཞིན་པ་ལྟར་ད་རེས་གྱེན་ལོག་པས་རྒྱ་མིའི་གནས་ཡུལ་དུ་རྒོལ་རྡུང་བཏང་སྟེ་རྒྱ་མི་ལས་བཟོ་བ་བཙན་ཁྲིད་བྱས་པ་མ་ཟད།དེ་རིང་རེས་གཟའ་ཉི་མའི་ཉིན་གྱེན་ལོག་པ་རང་ངོས་ནས་ཀྱང་རྒྱ་མི་ལས་བཟོ་བ་༢༩ འཇུ་བཟུང་བྱས་པའི་ཕྱིར་བསྒྲགས་བྱས་ཡོད་པ་རེད།
དེ་ཡང་རེས་གཟའ་སྤེན་པའི་ཉིན་སུའུ་དན་ནང་གི་གྱེན་ལོག་ཤོག་ཁག་གིས། སུའུ་དན་གྱི་བྱང་ཤར་ཞིང་ཆེན་ནང་དུ་ཡོད་པའི་གཞུང་གི་དམག་མིའི་སྐྱེལ་འདྲེན་ཐོག་རྒོལ་རྡུང་བཏང་བར་བརྟེན་གཞུང་གི་དམག་དཔུང་དང་གྱེན་ལོག་ཤོག་ཁག་དབར་ལ་དྲག་པོའི་འཐབ་འཁྲུགས་བྱུང་བའི་རྗེས། གྱེན་ལོག་པས་རྒྱ་མི་ལས་བཟོ་བ་འཇུ་བཟུང་བྱས་པ་མ་ཟད། སུའུ་དན་གཞུང་གི་དམག་མི་དགུ་ཡང་འཇུ་བཟུང་བྱས་ཡོད་འདུག སུའུ་དན་མི་དམངས་བཅིངས་བགྲོལ་ལས་འགུལ་ཚོགས་པའི་མགྲིན་ཚབ་པ་ཨར་ནུ་ལོ་ཌི་ཟེར་བས་ཕེ་རན་སི་གསར་འགྱུར་ལས་ཁང་ལ་བཤད་དོན། ཁོང་ཚོ་འཛིན་བཟུང་བྱས་པ་ཡིན། འོན་ཀྱང་ང་ཚོས་གནས་ཚུལ་གསལ་པོ་བཟོ་ཡ་ལ་ཁོང་ཚོའི་བདེ་འཇགས་ལ་ཉེན་ཁ་མེད་པར་གནས་ཡོད་ལ་སུ་གཅིག་ལ་རྨས་སྐྱོན་བྱུང་མེད། རྒྱ་མིའི་ལས་བཟོ་བ་དེ་དག་ནི་ཞིང་ཆེན་དེའི་ནང་དུ་ལམ་བཟོའི་ལས་ཀ་བྱེད་མཁན་ཡིན་པ་དང༌། ཁོང་ཚོ་ནུ་སྦ་རི་རྒྱུད་དུ་དོ་དམ་བྱས་ཡོད་པ་དང་དེ་ནི་བདེ་འཇགས་ཀྱི་གནད་འགག་གི་ཐོག་ནས་ཡིན་པ་བཤད་ཡོད་པ་རེད། དེ་རིང་རྒྱ་ནག་ཕྱོགས་ནས་སུའུ་དན་ནང་གི་རྒྱ་མིའི་ལས་བཟོ་ཁང་དུ་གྱེན་ལོག་ཤོག་ཁག་གིས་རྒོལ་རྡུང་བཏང་བའི་རྗེས་རྒྱ་མི་རིགས་འགའ་ཤས་ཤིག་གར་སོང་ཆ་མེད་དུ་གྱུར་བའི་སྐོར་བཤད་ཡོད་འདུག།