བལ་ཡུལ་བོད་མིའི་སྤྱི་ཁྱབ་འབྲེལ་མཐུད་པ་གློད་བཀྲོལ་བཏང་བ།

༄༅༎བལ་ཡུལ་བོད་མིའི་དངས་ལངས་སྤྱི་ཁྱབ་འབྲེལ་མཐུད་པ་སྐུ་ཞབས་འཕྲིན་ལས་བླ་མ་ལགས་ཁ་ས་རེས་གཟའ་པ་སངས་ཉིན་ས་གནས་ཉེན་རྟོག་པས་འཛིན་བཟུང་བྱས་ཏེ་དུས་ཡུན་ཚོུད་༨་བཀག་ཉར་བྱས་པའི་རྗེས་གློད་བཀྲོལ་བཏང་ཡོད་པའི་སྐོར། རྒྱ་གར་གྱི་དུས་བབ་(The Times of India)ཞེས་པའི་གསར་ཤོག་ཐོག་ད་ཆ་གནས་ཚུལ་སྤེལ་འདུག

བལ་ཡུལ་བོད་མིའི་དངས་ལངས་སྤྱི་ཁྱབ་འབྲེལ་མཐུད་པ་འཕྲིན་ལས་བླ་མ་ལགས་དུས་ཡུན་ཚོུད་བརྒྱད་རིང་འཛིན་བཟུང་བཀག་ཉར་བྱས་ཏེ་ད་ཆ་གློད་བཀྲོལ་བྱས་ཡོད་ཀྱང་གོང་ཞུས་བལ་ཡུལ་བོད་མིའི་དངས་ལངས་སྤྱི་ཁྱབ་འབྲེལ་མཐུད་ལས་ཁང་དུ་དམ་དྲག་བྱེད་རྒྱུའི་ཐུགས་ཚབས་གནང་བཞིན་ཡོད་པ་རེད།  སྐུ་ཞབས་འཕྲིན་ལས་བླ་མ་ལགས་འཛིན་བཟུང་བྱས་པའི་དུས་ཚོད་དེ། རྒྱ་ནག་གི་སྐུ་ཚབ་ཚོགས་པ་ཞིག་ལུམ་སྦིའི་གླིང་དུ་གཟིགས་སྐོར་ཕེབས་རྒྱུའི་སྔ་ནུབ་དུ་ཡིན་པ་རེད་ལ་གསར་དུ་འོས་འདེམས་བྱུང་བའི་བོད་མིའི་སྒྲིགས་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་བཀའ་བློན་ཁྲི་པའི་ཐུགས་འགན་དངོས་སུ་བཞེས་རྒྱུའི་དམ་འབུལ་གནང་བར་ཉིན་གྲངས་གསུམ་ལས་མེད་པའི་དུས་ཚོད་དེར་ཡིན་པ་རེད།།