བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་༡༧པ་བཞུགས་སྒར་རྡ་རམ་ས་ལར་འཚོགས་འདུག

སྤྱི་ཟླ་༧ཚེས་༣ཉིན་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་༡༧པ་བཞུགས་སྒར་རྡ་རམ་ས་ལའི་ས་གནས་འགོ་འཛིན་གྱི་ཚོགས་ཁང་དུ་འཚོགས་སོང་ལ། དཔལ་འབྱོར་དྲུང་ཆེ་ཚེ་རིང་དོན་འགྲུབ་ལགས་མཛད་སྒོའི་སྐུ་མགྲོན་གཙོ་བོར་ཆེད་ཕེབས་གཏམ་བཤད་གནང་སྐབས། བོད་མི་གཞོན་སྐྱེས་ཚོང་ལས་གནང་མཁན་རྣམས་ལ་རྒྱ་གར་གྱི་ཚོང་གི་སྒྲོམ་གཞི་དང་སྒྲིག་གཞི། ཚོང་ལས་ཇི་ལྟར་ཡར་རྒྱས་གཏོང་དགོས་ཚུལ་དང་ཁྲལ་སྤྲོད་ཕྱོགས། དེ་བཞིན་དེང་དུས་ཀྱི་འཕྲུལ་ཆས་བེད་སྤྱོད་བརྒྱུད་ཚོང་ལས་གཉེར་རྒྱུའི་ཐད་ཟབ་སྦྱོང་གང་མང་སྤྲོད་རྒྱུ་གལ་ཆེ་ཡིན་པ་གསུངས་སོང་།
ཚོང་ལས་བདེ་ཚོགས་ཀྱི་ཚོགས་གཙོ་བཀྲ་ཤིས་དབང་འདུས་ལགས་ཀྱིས། བོད་མིའི་ཚོང་ལས་བདེ་ཚོགས་ནང་ཚོགས་དོད་སྤྲོད་མཁན་ཚང་མ་ཚོགས་ཁོངས་སུ་བརྩི་བཞིན་ཡོད་པ་དང་། ད་ལྟའི་ཆར་བལ་ཡུལ་ནང་ཚོགས་མི་༦༠ལྷག་དང་། རྒྱ་གར་ནང་ཁྱོན་ཚོགས་མི་༧༠མ་ཟིན་ཡོད་པ། བོད་པའི་སྤྱི་ཚོགས་ནང་དཔལ་འབྱོར་ཁེ་ལས་པ་མང་པོ་ཐོན་ཡོད་ཀྱང་། ཕལ་ཆེ་བ་ཚོགས་པ་ཁག་གི་ནང་ཕྱག་ལས་གནང་གི་ཡོད་པས་ཚོང་ལས་གནང་མཁན་དཀོན་ཞིང་། དེ་སྔ་བོད་མིའི་ཚོང་ལས་བདེ་ཚོགས་ནས་ཟབ་སྦྱོང་གང་མང་གོ་སྒྲིག་ཞུས་ཡོད་ཀྱང་། དེར་མཉམ་ཞུགས་གནང་མཁན་མ་བྱུང་བའི་དཀའ་ངལ་ཆེན་པོ་འཕྲད་ཡོད་སྐོར་སོགས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
བོད་མའི་ཚོང་ལས་བདེ་ཚོགས་ནི། ཕྱི་ལོ་༢༠༠༥ལོར་གསར་འཛུགས་ཀྱིས་ད་བར་ལོ་༡༩ཕྱིན་ཡོད་པ་རེད་འདུག

བལ་ཡུལ་གནས་སྡོད་དོན་ལྡན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། བལ་ཡུལ་རྒྱལ་ཁབ་ཀྱི་ནང་བོད་མི་གཞོན་སྐྱེས་ཚོར་ལས་ཀ་རག་རྒྱུ་ཧ་ཅང་ཁག་པོ་ཡིན་པར་བརྟེན། བལ་ཡུལ་ནང་གི་བོད་མི་གཞོན་སྐྱེས་ལས་ཀ་བཙལ་འདོད་ཡོད་པ་ཚོར་སྟབས་བདེ་རོགས་རམ་ཡོང་ཆེད། བལ་ཡུལ་གྱི་བོད་མིའི་ཚོང་ལས་སྡེ་ཚོགས་ནས་ངོ་དེབ་ཁ་བྱང་(TCC Nepal Career Connection)་ཟེར་བ་ཞིག་ཕྱེས་ཡོད་པའི་སྟེང་གཟིགས་ན། ཉི་མ་རེ་རེ་བཞིན་ལས་ཀ་གསར་པ་ཅི་ཡོད་དང་ལས་ཀའི་གོ་སྐབས་ཀྱི་གསར་འཕྲིན་བཅས་འཚོལ་ཐུབ་ཀྱི་ཡོད་སྐོར་འགྲེལ་བརྗོད་གནང་གི་འདུག
ཡང་བཞུགས་སྒར་དུ་གནས་སྡོད་ཚོང་པ་པ་སངས་སྒྲོལ་མ་ལགས་ཀྱིས། ཁོང་བོད་པའི་ཚོང་ལས་བདེ་ཚོགས་ནང་མཉམ་ཞུགས་བྱས་ནས་ལོ་༡༢ཙམ་ཕྱིན་སོང་བ་དང་། བརྒྱུད་རིམ་དེའི་ཁྲོད་ཁོ་རང་ཚོང་པ་ཞིག་ཡིན་པའི་ཆ་ནས་ཚོང་དང་དེ་ཚོང་གི་ཐབས་ལམ་མང་པོ་ཞིག་ཤེས་རྟོགས་བྱུང་སོང་ཞེས་འགྲེལ་བརྗོད་གནང་བྱུང་།
ད་རེས་ཀྱི་ཚོགས་འདུའི་སྐབས་ལོ་འཁོར་སྙན་ཐོ་བགྲོ་གླེང་དང་། ལོ་རྗེས་མའི་སྔོན་རྩིས་དང་གྲོས་ཆོད་གཏན་འབེབས་དང་། དེ་བཞིན་སྐབས་༧པའི་རྒྱུན་ལས་གསར་འདེམས་སོགས་གནང་གི་ཡོད་པ་རེད།

གསར་འགོད་པ། བདེ་ཆེན་དབང་མོ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།