ལོན་ཌོན་དུ་བཀའ་གདམས་གསར་མའི་ཆོས་ཚོགས་ཀྱི་མདུན་དུ་ངོ་རྒོལ།

༄༅། །ཁ་སང་ཕྱི་ཚེས་ ༡༨ གཟའ་པ་སངས་ཉིན་འཛམ་གླིང་བོད་མིའི་བདེ་དོན་དྭངས་བླངས་ལས་འགུལ་ཚོགས་པའི་གོ་སྒྲིག་འོག་བོད་མི་དང་བོད་དོན་རྒྱབ་སྐྱོར་བསྡོམས་མི་གྲངས་གསུམ་བཅུ་བསྐོར་ཞིག་གིས་དབྱིན་ཇིའི་རྒྱལ་ས་ལོན་ཌོན་དུ་ཡོད་པའི་ཡོད་པའི་བཀའ་གདམས་གསར་མའི་ཆོས་ཚོགས་ཀྱི་མདུན་ངོ་རྒོལ་སྐད་འབོད་ཀྱི་ལས་འགུལ་ཞིག་སྤེལ་འདུག།
འཛམ་གླིང་བོད་མིའི་བདེན་དོན་དྭངས་བླངས་ལས་འགུལ་ཁང་གིས་ངོ་རྒོལ་གྱི་ལས་འགུལ་འདི་སྤེལ་དགོས་པའི་སྐོར་གྱི་གསར་འགོད་གསལ་བསྒྲགས་ཤིག་སྤེལ་འདུག་པ་དེའི་ནང་། དགེ་བཤེས་སྐལ་བཟང་རྒྱ་མཚོས་བདག་ཏུ་བཟུང་བའི་བཀའ་གདམ་གསར་མའི་ཆོས་ཚོགས་ཟེར་བ་དེས་བོད་བརྒྱུད་ནང་བསྟན་གྱི་མཚན་སྙན་ཁ་ལ་འཁྱེར་ནས་དབྱིན་ཇིའི་མི་དམངས་ལ་མགོ་བསྐོར་གཏོང་བཞིན་པ་ཐེང་འདོན་བྱ་རྒྱུ་དང་། དེ་བཞིན་དོལ་རྒྱལ་དང་དོལ་རྒྱལ་ཚོགས་པ་ཟེར་བའི་དངོས་ཡོད་ཀྱི་གནས་ཚུལ་ཇི་ཡིན་མང་ཚོགས་ལ་གསལ་སྟོན་ཆེད་ངོ་རྒོལ་གྱི་ལས་འགུལ་དེ་སྤེལ་བ་ཡིན་པ་བཀོད་འདུག་ལ། ཁོང་ཚོས་དགོས་འདུན་དོན་ཚན་ཁག་གཅིག་བཏོན་ཡོད་པ་དེའི་ནང་། བཀའ་གདམ་གསར་མ་ཟེར་བའམ་རྒྱལ་སྤྱིའི་ཤུགས་ལྡན་ཚོགས་པ་ཟེར་བ་སུ་ཡིན་རུང་༧གོང་ས་༧སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་ལ་གཞི་མེད་སྐྱོན་འཛུགས་ཞུ་རྒྱུ་མཚམས་འཇོག་དགོས་པ་དང་། དེ་སྔོན་༧གོང་ས་༧སྐྱབས་མགོན་ཆེན་པོ་མཆོག་ལ་མཚན་སྨད་ཞུ་བའི་ལས་འགུལ་འདི་དབྱིན་ཡུལ་ནང་འགོ་བཙུགས་པ་ཞིག་ཡིན་སྟབས། འཛམ་གླིང་བོད་མིའི་བདེན་དོན་དྭངས་བླངས་ལས་འགུལ་ཁང་གིས་ཀྱང་ངོ་རྒོལ་གྱི་ལས་འགུལ་འདི་དབྱིན་ཡུལ་ནས་འགོ་བཙུགས་ཏེ་༧གོང་ས་༧སྐྱབས་མགོན་ཆེན་པོ་མཆོག་ལ་མཚན་སྨད་ཞུ་བའི་ལས་འགུལ་མཚམས་འཇོག་མ་བྱས་བར་བོད་མིའི་བདེན་དོན་དྭངས་བླངས་ཚོགས་པའི་ངོས་ནས་ཀྱང་ངོ་རྒོལ་གྱི་ལས་འགུལ་དུས་ནམ་ཡང་མཚམས་འཇོག་བྱ་རྒྱུ་མིན་པའི་བསྒྲགས་གཏམ་སྤེལ་འདུག།  བོད་མི་ཚོས་འགོ་ཁྲིད་དེ་དབྱིན་ཡུལ་དུ་གནས་སྡོད་དགེ་བཤེས་སྐལ་བཟང་རྒྱ་མཚོའི་བཀའ་གདམ་གསར་མའི་ཆོས་ཚོགས་ཤིག་གི་མདུན་ངོ་རྒོལ་སྐད་འབོད་བྱས་པ་ད་རེས་དང་པོ་དེ་ཡིན་ཞིང་། བཀའ་གདམ་གསར་མའི་མིང་གི་ཐོག་ནས་ཆོས་ཚོགས་འཛམ་གླིང་གི་ས་ཕྱོགས་གང་སར་ཡོད་པ་རེད།།

ཞིབ་ཕྲ་གཤམ་ལ་འབྲེལ་ཡོད་མི་སྣས་ས་གནས་ནས་འདི་ག་རླུང་འཕྲིན་ཁང་དུ་ངོ་སྤྲོད་གནང་བར་གསན་རོགས་ཞུ༎

གསར་འགོད་པ་སྤྱི་ཁྱབ་རྩོམ་སྒྲིག་འགན་འཛིན་སྐལ་ལྡན་བློ་གྲོས།

ཡང་དེ་དང་འབྲེལ་བའི་གནས་ཚུལ་ཞིག་ང་ཚོའི་གསར་འགོད་པ་ངག་དབང་ཆོས་འཕེལ་ལགས་ཀྱིས་ཕྱོགས་སྒྲིག་གནང་བར་གསན་རོགས་གནང་།