སྐབས་བཅུ་བདུན་པའི་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པ་རྒྱུན་སྐྱོང་ཐུབ་མེད་པ།

ཕྱི་ཟླ་ ༩ པའི་ཚེས་༡༤ ཉིན་སྐབས་བཅུ་བདུན་པའི་གྲོས་ཚོགས་ཚོགས་དུས་བརྒྱད་པའི་ཉིན་བཞི་པའི་ཐོག ཤེས་རིག་ལས་ཁུངས་མ་ལག་དང་བཅས་པའི་ལས་སྡོམས་ཐོག་སྤྱི་ཡོངས་ཀྱི་བགྲོ་གླེང་དང་། བཀའ་བཤག་གི་ལས་འདེབས་གསལ་བཤད་ཀྱི་ལེ་ཚན་ཞིག་འཚོག་བཞིན་ཡོད་ཀྱང་། ཉིན་རྒྱབ་ཏུ་གྲུབ་ཆ་མ་ཚང་བའི་རྐྱེན་གྱིས་གྲོས་ཚོགས་ལས་རིམ་དེ་རྒྱུན་སྐྱོང་ཐུབ་མེད་པ་རེད། དེ་རིང་གྲོས་ཚོགས་ཚོགས་དུས་བརྒྱད་པའི་ཉིན་བཞི་པའི་སྔ་དྲོར་གཞི་རིམ་མི་མང་ལས་འགུལ་ཚོགས་པའི་ཚོགས་མི་རྣམས་ནས་གྲོས་ཚོགས་ཀྱི་ཕྱི་རུ་ཁྲིམས་ཞིབ་པ་བསྐོ་གཞག་དགོས་པའི་སྐད་འབོད་ཀྱི་ལས་འགུལ་སྤེལ་སོང་བ་དང་། གང་མགྱོགས་སྤྱི་འཐུས་ཚོགས་གཙོ་དང་ཚོགས་གཞོན་རྣམ་གཉིས་ནས་ལས་འགུལ་བ་དང་ལྷན་བཀའ་མོལ་གནང་དགོས་པའི་དགོས་འདུན་བཏོན་སོང་བའི་སྐབས་དེར་བདེ་སྲུང་བཀའ་བློན་རྒྱ་རི་སྒྲོལ་མ་ཆེད་ཕེབས་ཀྱིས་ལས་འགུལ་བ་རྣམས་ནས་ཞི་བའི་སྒོ་ནས་དཀའ་རྙོག་སེལ་ཐབས་གནང་རྒྱུ་དང་། གནད་དོན་དེའི་སྐོར་སྤྱི་འཐུས་ཚོགས་གཙོ་ཚོགས་གཞོན་དང་ལྷན་བཀའ་མོལ་གནང་རྒྱུ་ཡོང་གི་རེད་ཅེས་གསུངས་སོང་།

ཉིན་རྒྱབ་གྲོས་ཚོགས་ཀྱི་ལས་རིམ་ཐོག་སྤྱི་འཐུས་ཀྱི་གྲུབ་ཆ་མ་ཚང་བར་བརྟེན་གྲོས་ཚོགས་རྒྱུན་སྐྱོང་ཐུབ་མེད་པའི་སྐོར་ལ་འདི་ག་གསར་འགོད་པས་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་སུ་བཀའ་འདྲི་ཞུས་པར་ཁོང་གིས། ཐེངས་འདིར་གྲོས་ཚོགས་ཚོགས་ཐུབ་མེད་པ་ནི་བདེ་སྲུང་ལྷན་ཁང་ངོས་ནས་འགན་འཁུར་ཐུབ་ཀྱི་མི་འདུག་ཅེས་གསུངས་དུས་ང་ཚོས་གྲོས་ཚོགས་ལ་སླེབས་ཐུབ་ཀྱི་མི་འདུག་ཅེས་སྐད་འབོད་ལས་འགུལ་བར་སྟངས་འཛིན་གནང་སྟངས་མ་འགྲིག་པར་བརྟེན་ནས་བྱུང་བ་རེད་ཅེས་གསུངས་སོང་ཡང་། གཞི་རིམ་མི་མང་ལས་འགུལ་ཁང་གི་འཐུས་མི་ཚེ་བརྟན་ཕུན་ཚོགས་ལགས་ཀྱིས། གྲོས་ཚོགས་ཚོགས་མ་ཐུབ་པ་ནི་བདེ་སྲུང་ལྷན་ཁང་ནས་སྟངས་འཛིན་མི་ཐུབ་པའི་རྒྱུ་མཚན་ཡིན་ཞེས་པ་ནི་ཁ་གཡར་བ་ཙམ་ལས། སྤྱི་འཐུས་རེ་ཞིག་ནས་གྲོས་ཚོགས་སུ་མ་བཅར་བའི་རྐྱེན་གྱིས་རེད་ཅེས་གསུངས་སོང་།
གསར་འགོད་པ་ཞིག་གིས་གྲོས་ཚོགས་ཚོགས་མ་ཐུབ་པའི་རྒྱུ་མཚན་ནི་གཞི་རིམ་མི་མང་ནས་སྐད་འབོད་ཀྱི་ལས་འགུལ་སྤེལ་བར་བརྟེན་མ་རེད་དམ་ཞེས་དྲིས་པར་བསྟན་གཡང་ལགས་ཀྱིས། ང་ཚོ་ཡར་བསླེབས་པའི་རྒྱུ་མཚན་གྱིས་གྲོས་ཚོགས་ཚོགས་མ་ཐུབ་པའི་གནད་དོན་བྱུང་བ་མ་རེད་ཅེས་གསུངས་སོང་། རྩ་བའི་དེ་རིང་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཐོག་ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་སྙན་སྒྲོན་དང་བཀའ་ཤག་གི་ལན་འདེབས་སོགས་ཀྱི་ལས་རིམ་རིམ་པས་ཡོད་ཀྱང་། ད་ལྟའི་ཆར་རྒྱུན་སྐྱོང་མི་ཐུབ་པར་དེ་མུར་ལུས་ཡོད་པ་རེད།
གསར་འགོད་པ། བདེ་ཆེན་དབང་མོ།
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་སྤེལ་མཁན། ནོར་སྡེ་སྒྲོལ་མ།