ཚེ་རིང་ཆོས་སྐྱིད་ལགས་ཀྱིས་མེང་ལོར་ཡི་ནི་པོ་ཡའེ་སྨན་ཞབས་མཐོ་སློབ་ཁང་ནས་ཡིག་རྒྱུགས་གྲུབ་འབྲས་རྩེ་ཕུད་ཀྱི་གསེར་གྱི་རྟགས་མ་བླངས་འདུག

ཟླ་བ་འདིའི་ཕྱི་ཚེས་༤ཉིན། རྒྱ་གར་ལྷོ་ཕྱོགས་མེང་ལོར་གྲོང་ཁྱེར་ནང་ཡོད་པའི་ཡི་ནི་པོ་ཡའེ་(YENEPOYA)་སྨན་ཞབས་མཐོ་སློབ་ཁང་གི་བསླབ་པ་མཐར་སོན་པའི་དགའ་སྟོན་རྟེན་འབྲེལ་གྱི་མཛད་སྒོ་ཚོགས་སྐབས། མཐོ་སློབ་ཁང་དེའི་ནང་སློབ་གཉེར་གནང་བཞིན་པའི་ལ་དྭགས་བསོད་ནམས་གླིང་བོད་མིའི་གཞིས་ཆགས་ནས་ཡིན་པ་ཚེ་རིང་ཆོས་སྐྱིད་ལགས་སུ་ཉེ་བའི་སྨན་ཞབས་པའི་ཚན་རིག་གི་གཙུག་ལག་རབ་འབྱམས་པའི་སློབ་སྦྱོང་གནང་སྐབས། སློབ་གྲོགས་སློབ་མ་༣༠ཡོད་པའི་ཁྲོད་ཡིག་རྒྱུགས་གྲུབ་འབྲས་རྩེ་ཕུད་ཀྱི་གསེར་གྱི་རྟགས་མ་ཐོབ་ཡོད་འདུག
ཚེ་རིང་ཆོས་སྐྱིད་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། ཁོང་མོར་དེ་ལྟ་བུའི་རྟགས་མ་རག་རྒྱུའི་རེ་བ་བྱས་མེད་ཀྱང་གསེར་གྱི་རྟགས་མ་རག་སྐབས་སོ་སོས་དཀའ་ལས་རྒྱབ་པའི་གྲུབ་འབྲས་ཐོན་པ་ཞིག་ལ་ངོས་འཛིན་གྱིས་དགའ་ཚོར་བྱུང་བ་དང་། འདི་ནི་གཙོ་བོ་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་བཀའ་དྲིན་ལ་བརྟེན་ནས་སློབ་སྦྱོང་གི་གོ་སྐབས་རག་པ་དང་། ཕ་མ་སྤུན་མཆེད་བཅས་ཀྱི་རྒྱབ་སྐྱོར་དང་བཀའ་དྲིན་ལ་བརྟེན་ནས་བྱུང་བ་ཡིན་ཅེས་ངོ་སྤྲོད་གནང་བྱུང་།
སྤྱིར་བཏང་ཁོ་མོ་ཆུང་དུས་ནས་སློབ་སྦྱོང་ལ་དོ་སྣང་ཆེན་པོ་ཡོད་མཁན་ཞིག་ཡིན་པ་དང་། ཡིག་རྒྱུགས་ཀྱི་གྲུབ་འབྲས་རྩེ་ཕུད་སོན་མཁན་གྱི་གྲས་ཤིག་ཡིན་འདུག
ཚེ་རིང་ཆོས་སྐྱིད་ལགས་ནི་ལ་དྭགས་བསོད་ནམས་གླིང་བོད་མིའི་གཞིས་ཆགས་སུ་སྐྱེས་བ་དང་། གཞི་རིམ་སློབ་གྲྭ་ལ་དྭགས་བོད་ཁྱིམ་དང་འཛིན་གྲྭ་༡༡དང་༡༢གཉིས་གོ་པལ་པུར་བོད་ཁྱིམ་ནས་འབྱུང་རིག་ཀྱི་ཐོག་སློབ་ཐོན་བྱུང་རྗེས། མེང་ལོར་ནི་ཀྲི་སྨན་ཞབས་མཐོ་སློབ་ནས་སྤྱི་ཡོངས་སྨན་ཞབས་ལོ་གསུམ་གྱི་རིང་སློབ་སྦྱོང་གནང་བ་དང་། དེའི་རྗེས་༢༠༢༢དང་༢༣་ལོ་གཉིས་རིང་མེང་ལོར་ཡ་ནི་པོ་ཡི་སྨན་ཞབས་མཐོ་སློབ་ཁང་ནས་ལོ་གཉིས་ཀྱི་རིང་སྨན་ཞབས་པའི་ཉེ་བའི་ཚན་རིག་གཙུག་ལག་རབ་འབྱམས་པའི་སློབ་སྦྱོང་གནང་ཏེ་ད་ལྟའི་ཆར་མཐོ་སློབ་ཁང་དེའི་ནང་སྨན་ཞབས་ཀྱི་ཕྱག་ལས་གནང་བཞིན་ཡོད་པ་རེད།
འདས་པའི་ནང་རྒྱ་གར་གྱི་མཐོ་སློབ་འདྲ་མིན་གྱི་ནང་སློབ་གཉེར་གནང་བཞིན་པ་བོད་པའི་སློབ་ཕྲུག་ཚོས་སྦྱང་འབྲས་རྩེ་ཕུད་ཀྱི་རྟགས་མ་ལོན་མཁན་མི་ཉུང་བ་བྱུང་ཡོད་པ་དང་། ད་ལོ་ཡི་ནི་པོ་ཡའེ་སྨན་ཞབས་མཐོ་སློབ་ཁང་གི་ཉེ་བའི་གཙུག་ལག་རབ་འབྱམས་པ་ལོ་རིམ་གསུམ་ཀའི་ནང་ཡིག་རྒྱུགས་ཀྱི་གྲུབ་འབྲས་རྩེ་ཕུད་སོན་མཁན་ཚང་མ་བོད་མི་ཡིན་པའི་ཁོངས་ནས། ལ་དྭགས་བསོད་ནམས་གླིང་བོད་མིའི་གཞིས་ཆགས་ནས་ཡིན་པ་བོུ་ཚོགས་སྐྱིད་ལགས་ཉེ་བའི་གཙུག་ལག་རབས་འབྱམས་པའི་ལོ་རིམ་དང་པོའི་ནང་གྲུབ་འབྲས་རྩེ་ཕུད་དང་། འབྲུག་ནས་ཡིན་པ་བོད་པའི་བོུ་བསྟན་འཛིན་ནོར་འཛོམས་ལགས་ནས་ཉེ་བའི་གཙུག་ལག་རབས་འབྱམས་པའི་ལོ་རིམ་གཉིས་པའི་རྒྱུགས་སྤྲོད་ནང་གྲུབ་འབྲས་རྩེ་ཕུད། རྡེ་ར་རྡུན་དོན་གྲུབ་གླིང་ནས་ཡིན་པ་བོུ་ཆོས་དབྱངས་ལགས་ཀྱིས་ཉེ་བའི་གཙུག་ལག་རབས་འབྱམས་པའི་ལོ་རིམ་གསུམ་པའི་ནང་ཡིག་རྒྱུགས་གྲུབ་འབྲས་རྩེ་ཕུད་བླངས་ཡོད་པ་རེད།
ཡ་ནི་པོ་ཡི་སྨན་ཞབས་མཐོ་སློབ་ཁང་གི་ནང་རྒྱལ་ཁབ་འདྲ་མིན་བརྒྱད་ནས་སློབ་ཕྲུག་༨༠༠་བརྒལ་བ་ཞིག་ཡོད་པའི་ཁྲོད། བོད་མི་སློབ་ཕྲུག་བརྒྱ་ལྷག་ཡོད་ཅིང་ཡ་ནི་པོ་ཡི་སློབ་ཕྲུག་ཟུར་བ་ཉི་མ་དབྱངས་ཅན་ལགས་ཀྱི་མཐོ་སློབ་དེའི་ནང་བོད་རིགས་སློབ་མ་རྣམས་ལ་སློབ་འཇུག་གི་རོགས་སྐྱོར་བྱེད་བཞིན་ཡོད་པ་དང་། བོད་རིགས་སློབ་མ་ཚོར་སློབ་ཡོན་བརྒྱ་ཆ་༡༠ཆག་ཡང་རག་ཀྱི་ཡོད་པ་རེད་འདུག
གཞན་ཉེ་ལམ་ཟླ་བ་སྔོན་མའི་ཕྱི་ཚེ་༡༨་ཉིན། རྒྱ་གར་ལྷོ་ཕྱོགས་མའེ་སོར་གྲོང་ཁྱེར་གྱི་ནང་ཡོད་པའི་གྲགས་ཆེ་བའི་མའེ་སོར་གཙུག་ལག་སློབ་གྲྭའི་བསླབ་པ་མཐར་སོན་པའི་དགའ་སྟོན་མཛད་སྒོ་ཐེངས་༡༠༣པའི་ཐོག རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་གྲོང་སྡེ་ཨེན་ནས་ཡིན་པ་ཚེ་དབང་མཚམས་གཅོད་ལགས་ཀྱིས་རིགས་རྒྱུད་སྐྱེ་འཕེལ་དཔྱད་ཞིབ་བམ་(Genetic)་ཐོག་གཙུག་ལག་རབ་འབྱམས་ལོ་གཉིས་ཀྱི་རིང་རྒྱུགས་སྤྲོད་ཁག་བཞི་བཏང་བ་ཚང་མའི་རྒྱུགས་འབྲས་རྩེ་ཕུད་གསེར་གྱི་རྟགས་མ་བླངས་ཡོད།
གཞན་བཙན་བྱོལ་བོད་མི་དང་འབྲེལ་བའི་གནས་ཚུལ་གཞན་ཞིག་ལ། རྒྱ་གར་སྒང་ཏོག་དཔལ་ཁང་སློབ་གཉེར་ཁང་གི་སློབ་སྤྱི་ཉི་མ་དོན་གྲུབ་ལགས་དང་ཁོང་གི་བཟའ་ཟླ་སློབ་སྤྱིའི་ལས་རོགས་དབྱངས་ཅན་སྒྲོལ་དཀར་ལགས་རྣམ་གཉིས་ལ་འབྲས་ལྗོངས་མངའ་སྡེ་གཞུང་གི་ཤེས་ཡོན་དང་འབྲེལ་བའི་བྱ་དགའ་ཐོབ་ཡོད་འདུག

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།