བོད་ཀྱི་གཞོན་ནུ་དང་བུད་མེད་ལྷན་ཚོགས་གཉིས་ཀྱིས་རྡོ་རྗེ་གདན་དུ་སྤྱི་ཚོགས་ཞབས་ཞུ་གནང་འདུག

དེ་ཡང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་ནང་པའི་གནས་མཆོག་རྡོ་རྗེ་གདན་དུ་གསུང་ཆོས་སྩལ་གནང་མཛད་པའི་རིང་། ཕྱི་ནང་གི་དད་ལྡན་སེར་སྐྱ་མི་མང་ཁྱོན་ཆེ་ཞིག་འདུ་འཛོམས་ཆེ་བའི་དུས་སྐབས་སུ་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས་གཉིས་ཀྱིས་སྤྱི་ཚོགས་ཞབས་ཞུའི་ལས་འགུལ་འདྲ་མིན་སྤེལ་ཡོད་པ་ལྟར། ད་ཐེངས་༧གོང་ས་མཆོག་གི་གསུང་ཆོས་རིང་ཕྱི་ལོ་༢༠༢༣་ལོའི་ཟླ་བ་༡༢་པའི་ཚེས་༡༩ཉིན་ནས་སྤྱི་ལོ་གསར་ཚེས་ཀྱི་ཚེས་༢བར་གྱི་ཉིན་གྲངས་བཅོ་ལྔའི་རིང་། བོད་ཀྱི་གཞོན་ནུ་ལྷན་ཚོགས་ཡན་ལག་ས་གནས་ཁག་བཅུ་ནས་བོད་མི་སེར་སྐྱ་ཕོ་མོ་རྒན་གཞོན་དྭང་བླངས་ཞབས་ཞུ་བ་༦༠བརྒལ་བ་ཞིག་མཉམ་ཞུགས་ཀྱིས། གཙོ་བོ་༧གོང་ས་མཆོག་གི་གསུང་ཆོས་ཀྱི་མཛད་རིམ་མཚོན་པས་གསལ་བསྒྲགས་ཞུ་རྒྱུ་དང་། ཛ་དྲག་མྱུར་སྐྱོབ་གནང་བ། དེ་བཞིན་མི་དང་ཅ་དངོས་བོར་བ་འཚོལ་རྙེད་ཡོང་ཐབས་གནང་བ། གཞན་ཡང་མེ་འཁོར་འབབ་ཚུགས་སུ་ཆོས་ཞུ་བར་སྣེ་ལེན་རོགས་སྐྱོར་ཞུས་བ་བཅས་ཀྱི་ལས་འགུལ་ཆ་བགོས་གནང་ཏེ་སྤྱི་ཚོགས་ཞབས་ཞུ་སྒྲུབ་གནང་ཡོད་པ་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཚོགས་གཞོན་བཀྲིས་དར་རྒྱས་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།
ད་དུང་ཁོང་གིས་གསུངས་ན། བོད་ཀྱི་གཞོན་ནུ་ལྷན་ཚོགས་ཀྱིས་འདི་ལྟ་བུའི་སྤྱི་ཚོགས་ཞབས་ཞུ་ཐོག་མར་ཕྱི་ལོ་༡༩༨༠་གྲངས་ཞིག་ནས་གནང་འགོ་བཙུགས་པ་དང་། དེ་ནི་གཙོ་བོ་བོད་ནས་ཕེབས་མཁན་རྣམས་ལ་སྐད་ཀྱི་གོ་བརྡ་མ་འཕྲོད་པའི་དཀའ་ངལ་འཕྲད་པ་རྣམས་ལ་རོགས་རམ་བྱ་ཆེད་ལས་འགུལ་དེ་སྤེལ་བ་ཞིག་ཡིན་ཀྱང་ལས་འགུལ་དེར་མང་ཚོགས་ནས་དགའ་བསུ་དང་རྒྱབ་སྐྱོར་གནང་བ་ལ་སོགས་ལ་བརྟེན་ནས་མུ་མཐུད་དུ་མཇུག་སྐྱོང་གནང་བ་ཡིན་འདུག
བོད་ཀྱི་གཞོན་ནུའི་དྭང་བླངས་ལས་འགུལ་དེའི་ནང་མཉམ་ཞུགས་གནང་མཁན་བོད་དོན་ལས་འགུལ་བ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་ཀྱིས། ཁོང་ཕྱི་ལོ་༢༠༡༢་ལོ་ནས་བོད་ཀྱི་གཞོན་ནུའི་སྤྱི་ཚོགས་ཞབས་ཞུ་ལས་འགུལ་དེའི་ནང་ཆད་མེད་མཉམ་ཞུགས་གནང་ཡོད་པ་དང་། ཁོང་གི་ངོས་ནས་སྤྱི་ཚོགས་ཞབས་ཞུའི་ལས་འགུལ་དེ་ནི་ནང་ཆོས་ཉམས་ལེན་གཙོ་བོ་དེ་ཡིན་པ་གསུངས་བྱུང་།
གཞན་བོད་ཀྱི་བུད་མེད་ལྷན་ཚོགས་ཀྱི་ངོས་ནས་ད་རེས་༧གོང་ས་མཆོག་གི་གསུང་ཆོས་རིང་། ཟླ་བ་འདིའི་ཕྱི་ཚེས་༡་བར་བདུན་ཕྲག་གཅིག་གི་རིང་རྡོ་རྗེ་གདན་དུས་འཁོར་གསུང་ཆོས་ར་བའི་ནང་འཕྲོད་བསྟེན་དང་འབྲེལ་ནས་ཁོར་ཡུག་གཙང་བཟོའི་ལས་འགུལ་སྤེལ་གནང་ཡོད་པ་དང་། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་གསུངས་ན། ད་རེས་སྔ་ལོ་དང་མི་འདྲ་བར་ཆོས་ཞུ་བའི་གྲངས་འབོར་ཕྲན་བུ་ཉུང་བ་ཡོད་དུས་བོད་ཀྱི་བུད་མེད་ལྷན་ཚོགས་ཀྱིས་སྤྱི་ཚོགས་ཞབས་ཞུའི་ལས་འགུལ་ཁག་ཅིག་ཕྱིར་འཐེན་གནང་ཡོད་ན་ཡང་བོད་ནང་གི་ཁོར་ཡུག་དང་འགྲོ་བ་མིའི་ཐོབ་ཐང་གི་གནས་སྟངས་ཀྱི་མཚོན་པས་བོད་དོན་དང་འབྲེལ་ཡིག་ཆ་ཁག་ཕྱི་ནང་དད་ལྡན་པ་རྣམས་ལ་འགྲེམས་སྤེལ་གནང་ཡོད་པ་འགྲེལ་བརྗོད་གནང་བྱུང་།

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།