བོད་དོན་དམིཊ་བསལ་འབྲེལ་མཐུད་པ་བསྐོ་བཞག་གནང་རོགས།

ཨ་རིའི་སྲིད་འཛིན་(Donald Trump)་མཆོག་གིས་ཨ་རིའི་ཕྱི་སྲིད་ལས་ཁུངས་ནང་། བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་བཞག་ཡོང་དགོས་བ་ཨ་རིའི་གྲོས་ཚོགས་ཀྱི་འཐུས་མི་༣༧་གྱིས་སྲིད་འཛིན་མཆོག་ལ་རེ་སྐུལ་གནང་འདུག
དེ་ཡང་ཚེས་༢༡་ཉིན་ཨ་རིའི་གྲོས་ཚོགས་འོག་མའི་དམངས་གཙོ་ཚོགས་པ་དང་། སྤྱི་མཐུན་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་ཀྱི་འཐུས་མི་༣༧་གྱིས་མཚན་རྟགས་བཀོད་ནས་སྲིད་འཛིན་མཆོག་ལ་རེ་སྐུལ་ཕྱག་བྲིས་ནང་། གྲོས་ཚོགས་ཀྱི་འཐུས་མི་ཡིན་པའི་ཆ་ནས་ཨ་རིའི་ཕྱི་སྲིད་ལས་ཁུངས་ནང་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་བཞག་ཡོང་བར་ང་ཚོས་སྲིད་འཛིན་མཆོག་ལ་རེ་སྐུལ་ཞུ་བཞིན་ཡོད་ཅེས་འཁོད་ཡོད་པ་དང་། གྲོས་ཚོགས་ཀྱི་འཐུས་མི་རྣམས་ཀྱི་ཕྱག་བྲིས་ནང་། ཐུན་མོང་མ་ཡིན་པའི་བོད་ཀྱི་ཆོས་དང་། རིག་གཞུང་། སྐད་ཡིག་བཅས་པ་གཅེས་སྲུང་དང་། རྒྱ་ནག་ནང་འདྲ་མཉམ་གྱི་སྒོ་ནས་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཐད་ལ་ཨ་རིའི་གྲོས་ཚོགས་ནང་ཆབ་སྲིད་ཚོགས་པ་དབྱེ་མེད་ཀྱིས་རྒྱབ་སྐྱོར་ཤུགས་ཆེ་ཡོད་པ་དང་། ༢༠༠༢ལོར་གྲོས་ཚོགས་ནས་གཏན་འབེབས་གནང་པའི་བོད་དོན་ཁྲིམས་ཡིག་ནི་ཨ་རི་གཞུང་གིས་བོད་ཐོག་འཛིན་པའི་སྲིད་ཇུས་ཀྱི་རྨང་གཞི་ཡིན་ཞིང་། སྲིད་ཇུས་དེའི་དམིགས་ཡུལ་གཙོ་བོ་དེ་ཡང་བོད་མིའི་ཐུན་མོང་མ་ཡིན་པའི་ངོ་བོ་སྲུང་སྐྱོབ་ཆེད་དུ་ཡིན་པ་དང་། དེ་དག་འགྲུབ་ཆེད་དུ་གྲོས་ཚོགས་ནས་བོད་དོན་དམིགས་བསལ་འབྲེལ་མཐུད་པའི་གོ་གནས་གསར་འཛུགས་གནང་ཡོད་པ་གསལ་འདོན་གནང་འདུག
ད་དུང་མུ་མཐུད་དུ་གསལ་བར། གྲོས་ཚོགས་ནས་བོད་དོན་ཁྲིམས་ཡིག་གཏན་འབེབས་གནང་པ་ནས་བཟུང་། བོད་དོན་དམིགས་བསལ་འབྲེལ་མཐུད་པའི་གོ་གནས་དེ་ཕྱི་སྲིད་ལས་ཁུངས་ཀྱི་དྲུང་གཞོན་ཕྱག་རོགས་ཀྱི་གནས་བབ་ཡིན་ཞིང་། སྲིད་འཛིན་མཆོག་གིས་སྣེ་ཁྲིད་གནང་པའི་འཛིན་སྐྱོང་ཐོག་ནས་བོད་མིའི་རང་དབང་དང་། བདེ་དོན་ཐད། དེ་སྔའི་འཛིན་སྐྱོང་རིམ་པ་དང་། གྲོས་ཚོགས་གཉིས་ཐད་ནས་རྒྱབ་སྐྱོར་ཡོད་པ་དེ་ད་ལྟའི་སྲིད་གཞུང་ནས་ཀྱང་རྒྱུན་སྐྱོང་མུ་མཐུད་གནང་རྒྱུའི་ཆོད་སེམས་བརྟན་པོ་ཡོད་པ་དེ་རྒྱ་ནག་ལ་བརྡ་ལན་སྤྲོད་གལ་ཆེ་བ་ཡིན་པ་ནན་བརྗོད་གནང་འདུག
ལྷག་པར་དུ་གྲོས་ཚོགས་ཀྱི་འཐུས་མི་རྣམས་ཀྱིས་སྲིད་འཛིན་མཆོག་ལ་ཕུལ་བའི་ཕྱག་བྲིས་ནང་། ད་ལྟའི་དུས་འདིར་བོད་ནང་ཛ་དྲག་གི་གནས་སྟངས་ཤིག་ཏུ་ཡོད་པ་དྲན་སྐུལ་གནང་ཐོག་རྒྱ་ནག་གཞུང་ནས་གསེར་རྟ་བླ་རུང་སྒར་ནང་བསྟན་སློབ་གླིང་གི་གྲ་ཤག་གཞི་རྒྱ་ཆེ་བའི་གཏོར་བཤིག་དང་། གྲྭ་བཙུན་ཕྱིར་འབུད་ཀྱི་ལས་འགུལ་སྤེལ་བཞིན་པ་དང་། བོད་ནང་ཕྱི་ཕྱོགས་ནས་རང་དབང་ངང་འགྲིམ་འགྲུལ་བྱ་རྒྱུར་ཕྱོགས་ཡོངས་ནས་དམ་བསྒྲགས་ཤིན་ཏུ་ཆེ་བར་བརྟེན་བོད་འདི་བཞིན་དྲག་པོའི་ཁྲིམས་གཞི་བཀོད་སྡོམ་བྱས་པའི་གནས་སྟངས་ལྟ་བུར་གྱུར་ཡོད་པ་གསུངས་གནང་འདུག བོད་དོན་དཀའ་རྙོག་སེལ་ཐབས་སུ་བོད་ཕྱི་ནང་གཉིས་ཀྱི་བོད་མི་ཡོངས་ནས་བོད་རྒྱ་འབྲེལ་མོལ་ལ་རེ་བའི་ངང་སྒུག་བྱེད་བཞིན་ཡོད་ཀྱང་འབྲེལ་མོལ་བར་མཚམས་ཆད་དེ་ལོ་ངོ་བདུན་ཙམ་འགྲོ་ཡོད་པ་རེད། བོད་རྒྱ་འབྲེལ་མོལ་བསྐྱར་གསོ་གཙོས་པའི་བོད་ཀྱི་གནད་དོན་མདུན་སྐྱོད་སླད་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་རྒྱུ་དེ་གོམ་པ་དང་པོ་ཞིག་ཆགས་ཀྱི་ཡོད་པ་འཁོད་འདུག

གསར་འགོད་པ་དོན་གྲུབ་རྣམ་རྒྱལ།