རྒྱ་ནག་ཝུའུ་ཧན་འཁེལ་འཐག་སློབ་ཆེན་དུ་སློབ་མ་ཚོས་ངོ་རྒོལ་བྱས་འདུག

རྒྱ་ནག་གི་ཝུའུ་ཧན་འཁེལ་འཐག་སློབ་ཆེན་དུ་ལྐོག་རྔན་བླངས་བ་དང་གློག་བཅད་པའི་རྐྱེན་གྱིས་སློབ་མ་ཚོས་ངོ་རྒོལ་བྱས་འདུག
འདི་ག་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་གནས་ཚུལ་ཤེས་རྟོགས་བྱུང་བར་གཞིགས་ན། དེ་སྔ་ཏོག་དབྱིབས་རིམས་ནད་ཐོག་མར་མཆེད་ས་རྒྱ་ནག་ཝུའུ་ཧན་གྲོང་ཁྱེར་ནང་ཡོད་པའི་དཔལ་འབྱོར་ཚོང་ལས་སྐོར་གྱི་འཁེལ་འཐག་སློབ་ཆེན་གྱི་སློབ་མའི་ཉལ་ཁང་གི་གློག་བཅད་པ་དང་། ཏོག་དབྱིབས་རིམས་ནད་ཁྱབ་གདལ་ཕྱིན་པའི་དབང་གིས་སློབ་གྲྭའི་ཁོར་ཡུག་ཁྱོན་ཡོངས་སུ་བཀག་རྒྱ་བསྡམས་པའི་གནས་སྟངས་འོག་འདས་པའི་ཉིན་འགའི་རིང་སློབ་མ་བརྒྱ་ཕྲག་བརྒལ་བས་ངོ་རྒོལ་བྱས་ཡོད་འདུག
དེ་ནི་སློབ་ཆེན་དེའི་བདག་གཉེར་དོ་དམ་པ་མཐོ་གྲས་ཤིག་གིས་ལྐོག་རྔན་བླངས་པ་དང་གློག་རྐུན་མ་བརྒྱབ་པའི་ཉེས་དོན་འོག་རྒྱ་སྒོར་ས་ཡ་གཉིས་ལྷག་གི་ཆད་པ་བཅད་པའི་གནས་ཚུལ་ཐོན་པའི་རྗེས་སློབ་མའི་ངོ་རྒོལ་དོན་རྐྱེན་དེ་བྱུང་བ་ཞིག་ཡིན་འདུག་ལ། ཉིན་གྲངས་དུ་མའི་རིང་སློབ་མའི་ཉལ་ཁང་དུ་གློག་བཅད་པར་བརྟེན་ཚ་སྡུག་ཆེ་བའི་དབང་གིས་སློབ་མ་ཚོ་གཉིད་མ་ཁུག་པ་སོགས་དཀའ་ངལ་དུ་མ་འཕྲད་རྐྱེན་སློབ་ཆེན་གྱི་ངོས་ནས་སློབ་མ་ཚོར་དགོངས་དག་ཞུ་དགོས་པའི་དགོས་འདུན་བཏོན་འདུག རྗེས་སུ་སློབ་གྲྭའི་སྒོ་ཕྱེས་ཏེ་སློབ་མའི་ཉལ་ཁང་དུ་གློག་བསྐྱར་གསོ་བྱས་ཡོད་འདུག
རྒྱ་ནག་ནང་གློག་རིན་མཐོ་དྲགས་པའི་རྐྱེན་གྱིས་རྒྱ་ནག་ནང་གི་ཚོང་ལས་ཙག་ཙིག་གི་རིགས་ལ་ཧ་ལས་པའི་གནོད་ཀྱི་ཡོད་པ་ཧུའུ་པེ་ས་ཁུལ་དུ་གནས་སྡོད་དཔྱད་བརྗོད་པ་གོ་ཧྥེ་ཟེར་བ་ཞིག་གིས་འདི་ག་རླུང་འཕྲིན་ཁང་ལ་བརྗོད་ན། འབྲི་ཆུ་འགག་གསུམ་གྱི་ཆུ་མཛོད་གསར་རྒྱག་བྱེད་སྐབས་རྒྱ་ནག་གི་དཔོན་རིགས་ཚོས་དུས་ཡུན་ཆུ་ཚོད་གཅིག་གི་རིང་གློག་གི་རིན་གོང་སྐར་མ་ཁ་ཤས་ལས་མི་དགོ་པ་བཤད་ཡོད་ཀྱང་། ལོ་མང་རྗེས་ནས་ད་དུང་ཡང་རིན་གོང་མར་ཆག་མེད་པ་དང་། དེའི་རྐྱེན་གྱིས་ཚོང་ལས་ཙག་ཙིག་གཉེར་མཁན་ཚོར་གློག་རིན་མཐོ་དྲགས་པའི་རྐྱེན་གྱིས་ཁོང་ཚོའི་ཚོང་ལས་ལ་ཧ་ཅང་གི་གནོད་ཀྱི་ཡོད་ཅེས་འགྲེལ་བརྗོད་བྱས་ཡོད་འདུག
གསར་འགོད་པ། བོད་རྒྱལ།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།