རྒྱ་ནག་གི་སྲིད་འཛིན་ཞི་ཅིན་ཕིང་གིས (Trump) ཨ་རིའི་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་ཞུས་འདུག

ཚེས ༧ ཉིན་རྒྱ་ནག་གི་གཙོ་འཛིན་ཞི་ཅིན་ཕིང་གིས་སྲིད་འཛིན་ཟུར་པ་(Trump) ཨ་རིའི་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་ཞུས་པ་དང་ཆབས་ཅིག རྒྱལ་ཁབ་གཉིས་དབར་དུས་རབས་གསར་པའི་ནང་ཕན་ཚུན་མཉམ་གནས་ཀྱི་ལམ་ཁ་ཞིག་འཚོལ་རྒྱུར་སྐུལ་ལྕག་གནང་ཡོད་ལུགས་རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་གནས་ཚུལ་སྤེལ་འདུག དེའང་ཨ་རིའི་ CNN བརྙན་འཕྲིན་ཁང་གིས་གནས་ཚུལ་ཡོང་ཁོངས་ལུང་འདྲེན་བྱས་པའི་ནང་ཞི་ཅིན་ཕིང་གིས་ཁ་པར་གྱི་ལམ་ནས་(Trump)ལ་འཚམས་འདྲི་ཞུས་ཡོད་འདུག ཡིན་ཡང་གཟའ་ལྷག་པའི་ཉིན་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་མའོ་ནིན་གྱིས་གསར་འགོད་ལྷན་ཚོགས་སུ་རྒྱ་ནག་གིས་ཨ་རིར་འཛིན་པའི་སྲིད་བྱུས་ནི་སྔར་བཞིན་མཐུན་པོ་ཡིན་ཚུལ་གྱིས་ང་ཚོས་མུ་མཐུད་ནས་ཕན་ཚུན་བརྩི་བཀུར་དང་། ཞི་བདེའི་མཉམ་གནས། གཉིས་ཕན་མཉམ་ལས་ཀྱི་རྩ་དོན་གཞིར་བཟུང་ནས་ལས་དོན་བྱེད་ཀྱི་རེད་ཅེས་བརྗོད་ནས་དེ་ཙམ་གྱི་རེ་བལྟས་འཆིང་བའི་རྣམ་འགྱུར་བསྟན་མེད་པ་རེད།

ཉེ་བའི་ལོ་ཤས་ནང་རྒྱ་ནག་དང་ཨ་རིའི་དབར་གྱི་འབྲེལ་ལམ་སྡུག་ཏུ་ཕྱིན་པ་དང་ལྷག་པར་དུ་ཐེ་ཝན་དང་ལྷོ་རྒྱ་ནག་རྒྱ་མཚོའི་གནད་དོན་གྱི་རྐྱེན་གྱིས་དེ་བས་ཀྱང་སྡུག་ཏུ་ཕྱིན་པ་ལྟར། ད་ལན་རྒྱ་ནག་གི་སྤྱི་ཚོགས་དྲྭ་ལམ་ཁག་ཏུ་(Trump)ཡིས་རྒྱ་ནག་ཐོག་སྒོ་ཁྲལ་འགེལ་རྒྱུས་མཚོན་རྒྱ་ནག་གི་དཔལ་འབྱོར་གནས་སྟངས་སྡུག་ཏུ་འགྲོ་བ་དང་།  རྒྱལ་སྤྱིའི་རང་བཞིན་གྱི་དཀའ་རྙོག་ཆེ་རུ་འགྲོ་སྲིད་པའི་བསམ་ཚུལ་མངོན་ཡོད་འདུགགསར་འགོད་པ། བོད་རྒྱལ།

རྩོམ་སྒྲིག་པ། རྡོ་རྗེ་དགྲ་འདུལ།

དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།

ཨ་རིའི་སྲིད་འཛིན་གྱི་འོས་བསྡུའི་གྲུབ་འབྲས།