རྒྱ་ནག་སྲིད་འཛིན་གྱིས་ཧོང་ཀོང་ནང་ལས་འགུལ་སྤེལ་མཁན་ཚོར་ཉེན་བརྡ།

རྒྱ་ནག་སྲིད་འཛིན་ཞི་ཅིན་ཕིང་དང་ཉེ་ལམ་གསར་དུ་བདམས་པའི་ཧོང་ཀོང་གི་སྤྱི་ཁྱབ་འགན་འཛིན་ Carrie Lam།

༄༅། །རྒྱ་ནག་གི་སྲིད་འཛིན་ཞི་ཇིན་པིང་ཧོང་ཀོང་དུ་འཚམས་གཟིགས་སུ་ཡོད་པ་དང་། གཟའ་སྤེན་པའི་ཉིན་ཧོང་ཀོང་ནང་མི་སྟོང་ཕྲག་མང་པོས་ཧོང་ཀོང་ནང་མང་གཙོའི་ཐོབ་ཐང་མཐོ་རུ་གཏོང་དགོས་རྒྱུར་དམིགས་པའི་ངོ་རྒོལ་རྔམ་སྟོན་ཁྲོམ་སྐོར་བྱས་ཤིང་། རྒྱ་ནག་གི་སྲིད་འཛིན་གྱིས། ཧོང་ཀོང་ནང་རྒྱ་ནག་གི་མངའ་དབང་གོང་བུ་གཅིག་འགྱུར་དང་བརྟན་ལྷིང་ལ་ཉེན་ཚབས་བཟོ་བའི་ལས་འགུལ་རྩ་བ་ནས་སྤེལ་འཇུག་རྒྱུ་མིན་པ་བརྗོད་འདུག
རྒྱ་ནག་གི་སྲིད་འཛིན་ཞི་ཇིན་པིང་གི་གཏམ་བཤད་དེ་ཧོང་ཀོང་དབྱིན་ཡུལ་གྱིས་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ཉི་ཤུ་འཁོར་བའི་དུས་དྲན་མཛད་སྒོའི་ཐོག་བྱས་པ་ཤིག་ཡིན་ཞིང་། དུས་དྲན་མཛད་སྒོ་དེའི་སྐབས་ཉེ་ལམ་གསར་དུ་བདམས་པའི་ཧོང་ཀོང་གི་སྤྱི་ཁྱབ་འགན་འཛིན་ Carrie Lam གྱི་ལས་འཁུར་དམ་བཅའ་ཡང་བྱས་ཡོད་པ་རེད།  ཧོང་ཀོང་གི་ཡུལ་མི་མང་པོས་ Carrie Lam ནི་རྒྱ་ནག་གིས་གང་ཁྲིད་མི་སྣ་ཞིག་ཡིན་པར་ངོས་འཛིན་བྱེད་བཞིན་པའི་ཐོག། རྒྱ་ནག་གཞུང་གིས་ཧོང་ཀོང་གི་རང་དབང་དང་མང་གཙོའི་ཐོབ་ཐང་ཐོག་དམ་དྲག་བྱེད་ཤུགས་ཆེ་རུ་གཏོང་བཞིན་པར་ཁོང་ཁྲོ་ཆེན་པོ་བྱེད་བཞིན་ཡོད་པ་རེད།
རྒྱ་ནག་གི་སྲིད་འཛིན་ཞི་ཇིན་པིང་གི་ཐེངས་འདིའི་ཧོང་ཀོང་གི་འཚམས་གཟིགས་འདི་ནི་ཕྱི་ལོ་ ༢༠༡༢ ལོར་ཁོང་རྒྱ་ནག་གི་སྲིད་འཛིན་དུ་བསྐོ་བཞག་བྱུང་རྗེས་ཀྱི་འཚམས་གཟིགས་ཐོག་མ་དེ་ཡིན་པ་དང་། ཞི་ཇིན་པིང་གི་སྲུང་སྐྱོབ་ཀྱི་ཆེད་ནམ་རྒྱུན་འཁྲུག་ཆ་དོད་པའི་ཧོང་ཀོང་གྲོང་ཁྱེར་གྱི་ཆ་ཤས་མང་ཆེ་བ་སྒོ་བརྒྱབ་ཡོད་འདུག
གཟའ་སྤེན་པའི་ཉིན་རྒྱ་ནག་གི་སྲིད་འཛིན་ཞི་ཇིན་པིང་གིས། སུས་ཀྱང་ཧོང་ཀོང་གི་རྩ་ཁྲིམས་ལ་ཉེན་ཁ་བཟོ་བའམ། སྐམ་ས་ཆེན་པོར་གནོད་གཞིའི་ལས་འགུལ་སྤེལ་བ། ཡང་ན་སིམ་འཛུལ་བྱ་ཡུལ་དུ་བེད་སྤྱོད་བྱེད་ན་འགྲིག་རྒྱུ་མིན་པའི་ཉེན་བརྡ་ཤུགས་ཆེ་བཏང་འདུག
ཧོང་ཀོང་ནང་གི་གཞོན་སྐྱེས་ལས་འགུལ་བ་ཁག་གཅིག་གིས་ཧོང་ཀོང་ལ་རང་ཐག་རང་གཅོད་ཀྱི་ཐོབ་ཐང་དགོས་ལུགས་འབོད་སྒྲ་ཤུགས་ཆེ་སྒྲོགས་བཞིན་པ་མ་ཟད། ཧོང་ཀོང་རྒྱ་ནག་ནས་ལོགས་སུ་རང་བཙན་དགོས་རྒྱུའི་དགོས་འདུན་བཏོན་བཞིན་ཡོད་པ་རེད།།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།