ནག་ཆུ་སྦྲ་ཆེན་རྫོང་དུ་ས་ཡོམ་འགུལ་ཚད་ ༧ བརྒྱབ་སྟེ་མི་ ༡༦ རྐྱེན་འདས་དང་ ༤༦ ལ་རྨས་སྐྱོན།

ས་ཡོམ་གྱི་གནོད་འཚེ་ཕོག་ཡུལ་དུ་མི་ཤི་རྨས་ཀྱི་གནས་ཚུལ་བྱུང་ཡོད་རུང་ཁ་གསལ་མེད་པ་དང་། ཁང་པ་ལོག་དང་སེར་ཁ་གས་པ་སོགས་བྱུང་འདུག

ཟླ་ ༡༠ ཚེས་ ༢༢ ཉིན་གྱི་དགོང་མོ་ཆུ་ཚོད་ ༡༠ དང་སྐར་མ་ ༣༣ ཙམ་ལ་བོད་ཀྱི་ནག་ཆུ་གྲོང་ཁྱེར་སྦྲ་ཆེན་རྫོང་ཁུལ་དུ་ས་ཡོམ་གྱི་གནོད་འཚེ་བྱུང་ཡོད་པ་དང་། ཨ་རིའི་ས་ཡོམ་བརྟག་དཔྱད་དྲ་ཚིགས་ཐོག་འགུལ་ཚད་རིམ་པ་ ༧ ཡིན་པ་བརྗོད་འདུག

ད་རེས་ཀྱི་ས་ཡོམ་གནོད་འཚེ་འདིའི་ཁྲོད་ད་ལྟ་བར་མི་ ༡༦ འདས་གྲོངས་སུ་སོང་ཡོད་པ་དང་། མི་ ༤༦ ལ་རྨས་སྐྱོན་ཕོག་ཡོད་པའི་ཁོངས་ནས་མི་ ༡༡ ལ་རྨས་སྐྱོན་ཚབས་ཆེན་ཕོག་ཡོད་ཅིང་། ཁང་པ་ལོག་པ་སོགས་ཁྱིམ་དུད་ ༣༣༩ ཙམ་ལ་གནོད་འཚེ་བྱུང་ཡོད་སྐོར་རྒྱ་ནག་གཞུང་འབྲེལ་བརྒྱུད་ལམ་ནས་གནས་ཚུལ་སྤེལ་འདུག

ས་ཡོམ་གྱི་གནོད་འཚེ་ཕོག་ཡུལ་དུ་ད་ལྟ་མི་ཤི་རྨས་ཀྱི་གནས་ཚུལ་ཁ་གསལ་མེད་པ་དང་།  ཁང་པ་ལོག་དང་སེར་ཁ་གས་པ་སོགས་བྱུང་འདུག
ནག་ཆུ་སྦྲ་ཆེན་རྫོང་དུ་ས་ཡོམ་འགུལ་ཚད་ ༧ བྱས་པ་ཞིག་བརྒྱབ་འདུག ནག་ཆུ་སྦྲ་ཆེན་རྫོང་དུ་ས་ཡོམ་གྱི་གནོད་འཚེ་བྱུང་བ། (RFA Tibetan)

ཡང་གཞུང་ཕྱོགས་ནས་གསལ་བསྒྲགས་སྤེལ་བའི་ནང་གོར་མོ་ནས་ལྷ་ས་བར་གྱི་རི་ལི་འདི་ནག་ཆུ་བརྒྱུད་སྐྱོད་ཀྱི་ཡོད་པར་བརྟེན་བཀག་ཡོད་པ་བརྗོད་འདུག་ལ། ས་ཡོམ་སྐབས་རི་ནས་རྡོ་ལྷུང་སྟེ་གཞུང་ལམ་འགག་པའི་གནས་ཚུལ་ཡང་ཐོན་འདུག

ནག་ཆུར་ས་ཡོམ་ཚབས་ཆེ་བྱུང་རྗེས་སློབ་མ་ཚོ་ཉེན་སྐྱོབ་སླད་རྩེད་ཐང་དུ་ཉལ་པའི་འདྲ་པར། ༢༠༢༦།༡༠།༢༢
ནག་ཆུར་ས་ཡོམ་བརྒྱབ་རྗེས་སློབ་ཕྲུག་རྣམས་ཐང་དུ་ཉལ་པའི་འདྲ་པར། ནག་ཆུར་ས་ཡོམ་ཚབས་ཆེ་བྱུང་རྗེས་སློབ་མ་ཚོ་ཉེན་སྐྱོབ་སླད་རྩེད་ཐང་དུ་ཉལ་པའི་འདྲ་པར། ༢༠༢༦།༡༠།༢༢ (Citizen Photo via REUTERS)

རྒྱ་ནག་གི་ས་ཡོམ་བརྟག་དཔྱད་དྲ་ཚིགས་ཐོག་ས་ཡོམ་གྱི་གཏིང་ཚད་ཁོ་ལོ་མི་ཌར་ ༡༠ ཙམ་དང་། ས་ཡོམ་བྱུང་ཡུལ་ལྟེ་གནས་ཀྱི་ཉེ་འཁོར་ས་བབ་མཐོ་ཚད་ཆ་སྙོམས་མི་ཌར་ ༤༨༦༤ ཙམ་ཡོད་པའི་ས་མཐོའི་བྱང་ཐང་ཁུལ་དུ་ཡིན་སྐོར་བརྗོད་འདུག

དེ་མིན་ཁང་པ་དང་ལམ། གློག་སོགས་རྨང་གཞིའི་སྒྲིག་ཆས་ལ་གཏོར་བཤིག་ཇི་ཙམ་བྱུང་ཡོད་མེད་གནས་ཚུལ་ཁ་གསལ་མི་འདུག

ས་ཡོམ་གྱི་གནོད་འཚེ་ཕོག་ཡུལ་དུ་ད་ལྟ་མི་ཤི་རྨས་ཀྱི་གནས་ཚུལ་ཁ་གསལ་མེད་པ་དང་།  ཁང་པ་ལོག་དང་སེར་ཁ་གས་པ་སོགས་བྱུང་འདུག
ནག་ཆུ་སྦྲ་ཆེན་རྫོང་དུ་ས་ཡོམ་འགུལ་ཚད་ ༧ བྱས་པ་ཞིག་བརྒྱབ་འདུག ཟླ་༡༠ཚེས་༢༢ཉིན་གྱི་མཚན་མོ་ནག་ཆུ་སྦྲ་ཆེན་རྫོང་དུ་ས་ཡོམ་གྱི་གནོད་འཚེ་བྱུང་ནས་ལམ་ལ་སེར་ཁ་གས་པ། (མི་སེར་གྱི་འདྲ་པར།)

འོན་ཀྱང་སྤྱི་ཚོགས་དྲ་ལམ་ཐོག་ནས་མཐོང་བའི་གནས་ཚུལ་ལ་གཞིགས་ན། གཞུང་ལམ་དང་ཁང་པར་སེར་ཁ་གས་པ་དང་། ཁང་པ་ལོག་པ། རི་ནས་རྡོ་ཟགས་ཏེ་གཞུང་ལམ་འགག་པ་དང་། མང་ཚོགས་མཚན་མོ་ཁང་པའི་ཕྱི་ལ་ཐོན་ནས་འགའ་རེ་མོ་ཌའི་ནང་བསྡད་པ་དང་འགའ་རེ་ཐང་དུ་བསྡད་ཡོད་པ་མཐོང་རྒྱུ་འདུག

རྒྱ་ནག་གཞུང་གི་བརྒྱུད་ལམ་ནང་མྱུར་སྐྱོབ་བྱེད་མཁན་མི་གསོད་རུ་ཁག་དང་དམག་མི་སོགས་མངགས་གཏོང་བྱས་པ་བརྗོད་འདུག

ས་ཡོམ་འགུལ་ཚད་རིམ་པ་ ༧ བྱུང་བའི་རྗེས་སུ་དགོང་དྲོ་ཆུ་ཚོད་༡༠ སྐར་མ་ ༥༩ ཡི་ཐོག་འགུལ་ལྷག་རིམ་པ་ ༣.༩ ཞིག་བྱུང་འདུག་ལ། དེ་རྗེས་ཆུ་ཚོད་༡༢དང་སྐར་མ་༣ གྱི་ཐོག་འགུལ་ལྷག་རིམ་པ་༣.༤ བྱས་པ་སོགས་འགུལ་ལྷག་ཐེངས་ཁ་ཤས་བྱུང་འདུག

པར་རིས་སྒྲིག་བཟོ་བ། ནོར་སྡེ་སྒྲོལ་མ།

བརྙན་པར་སྒྲིག་སྦྱོར་བ། སྒྲོལ་དཀར།