དུས་འཁོར་དབང་ཆེན་ཐེངས་སོ་བཞི་བ་ལེཊ་པར་བསྩལ་གྲུབ་འདུག

༧གོང་ས་མཆོག་གིས་རྒྱ་གར་རྡོ་རྗེ་གདན་དུ་དུས་དབང་ཐེངས་སོ་བཞི་བ་གནང་བཞིན་པ། ༢༠༡༧།༡།༡༢

དུས་འཁོར་དབང་ཆེན་ཞུས་རྗེས་འཁྱེར་རྒྱུ་ཞིག་ཡོད་པ་དགོས་བ་ནི་བསམ་པ་བཟང་པོ་བྱ་རྒྱུ་དེ་ཡིན་པ་༧གོང་ས་མཆོག་གིས་བཀའ་གནང་འདུག
དེ་ཡང་ཕྱིི་ཟླ་༡་ཚེས་༡༣་བོད་ཟླ་༡༡་ཚེས་༡༦་ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཡོངས་སུ་རྫོགས་པ་ལེགས་པར་བསྩལ་གནང་གྲུབ་ཅིང་། དུས་འཁོར་དབང་ཆེན་ཞུས་ཏེ་འཁྱེར་རྒྱུ་ཞིག་ཡོད་པ་དགོས་བ་དེ་ནི་བསམ་པ་བཟང་པོ་བྱ་རྒྱུ་དེ་ཡིན་པ་བཀའ་གནང་ཡོད་པ་རེད།
༧གོང་ས་སྐྱབས་མགོན་ཆེན་པོ་མཆོག་གིས། ཕྱི་ཚེས་༡༣་ཉིན་དཔལ་དུས་ཀྱི་འཁོར་ལོའི་གོང་མ་གོང་ཆེན་དང་། རྡོ་རྗེ་སློབ་དཔོན་བདག་པོ་ཆེན་པོའི་དབང་བཅས་བསྐུར་གནང་མཛད་ཅིང་། ༧གོང་ས་སྐྱབས་མགོན་ཆེན་པོ་མཆོག་གིས་བསམ་པ་བཟང་པོ་བྱས་ན་དགེ་ཚན་ཇི་ཡོད་དང་། མ་བྱས་ན་སྐྱོན་ཇི་ཡོད་ཞིབ་ཏུ་བསམ་སྟེ། མི་ཚེ་འདི་ཉོན་མོངས་ཀྱི་གཞན་དབང་དུ་མི་གཏོང་བར་གཞན་ཕན་རང་བཞིན་ཅན་གྱི་མི་ཚེ་ཞིག་སྐྱེལ་དགོས་བསམ་པའི་འདུན་པ་བརྟན་པོ་ཞིག་གི་ཐོག་ནས་ཧུར་ཐག་བྱེད་དགོས་པའི་བཀའ་སློབ་ཕེབས་ཡོད་པ་རེད།
ད་དུང་༧གོང་ས་སྐྱབས་མགོན་ཆེན་པོ་མཆོག་གིས་དེ་ལྟར་བྱས་ཚེ་མི་ཚེ་འདི་བདེ་སྐྱིད་ལྡན་པ་ཞིག་ཡོང་རྒྱུ་ལྟ་ཅི་སྨོས། སྐྱེ་བ་ཕྱི་མ་ཡང་མི་ལུས་བཟང་པོ་ཞིག་འཐོབ་རྒྱུ་ངེས་པ་ཡིན་པ་བཀའ་གནང་ཡོད་པ་རེད།
གསུང་ཆོས་དབུ་བཙུགས་སྐབས། རྒྱ་གར་བའི་སློབ་ཕྲུག་ཁག་གཅིག་གིས་ཤེས་རབ་སྙིང་པོ་ལེགས་སྦྱར་གྱི་སྐད་ནང་གསུང་འདོན་ཞུས་རྗེས། སུ་པེན་གྱི་སྐད་ཐོག་སུ་པེན་དང་མེཀ་སི་ཀོ ཆི་ལེ་བཅས་ནས་ཕེབས་པའི་ཆོས་ཞུ་བ་ཁག་གཅིག་གིས་འཕགས་པ་ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོའི་མདོ་སེཔེན་གྱི་སྐད་ནང་གསུང་འདོན་ཞུས་ཤིང་། འདི་ནི་༧གོང་ས་སྐྱབས་མགོན་ཆེན་པོ་མཆོག་གི་བཀའ་ཆོས་གནང་སྐབས་སེཔེན་སྐད་ནང་ཤེས་རབ་སྙིང་པོ་གསུང་འདོན་ཞུས་པ་ཐེངས་མ་དང་པོ་དེ་ཡིན་འདུག
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་སྔོན་འགྲོའི་གསུང་ཆོས་སྐབས་མི་བཟང་པོ་ཞིག་བྱ་རྒྱུ་ནི་འཛམ་གླིང་ནང་གི་ཆོས་ལུགས་ཚང་མའི་གཅིག་གྱུར་གྱི་བསླབ་བྱ་དེ་ཡིན་པ་བཀའ་གནང་བ་དང་། ལྟ་གྲུབ་ཀྱི་ཐོག་ནས་ནང་བ་སངས་རྒྱས་བས་ཆོས་ཐམས་ཅད་རྟེན་ནས་བཏགས་པ་ཙམ་ཡིན་པ་གསུངས་པའི་རྟེན་འབྲེལ་གྱི་རྣམ་བཞག་ཐོག་ནས་བྱ་བྱེད་ཐམས་ཅད་འཐད་ཚུལ་གསུངས་པ་འདི་ནི་དམིགས་བསལ་ཅན་ཞིག་ཡིན་པ་བཀའ་གནང་ཡོད་པ་རེད།
ཡང་དཔལ་དུས་ཀྱི་འཁོར་ལོའི་དབང་ཆེན་ཞུས་པའི་གསང་སྔགས་ཀྱི་ལམ་ཉམས་ལེན་བྱ་ཚུལ་སྐོར་བཀའ་སློབ་ཕེབས་སྐབས། བྱང་ཆུབ་ཀྱི་སེམས་དང་སྟོང་པ་ཉིད་ཀྱི་རྩེ་ཟིན་པའི་སྔགས་ལམ་ལ་བརྟེན་ནས་ཤེས་སྒྲིབ་ཕྲ་མོ་སྤངས་ནས་རྣམ་མཁྱེན་གྱི་གོ་འཕངས་ཐོབ་ཐབས་བྱ་རྒྱུ་དེ་ཡིན་པ་བཀའ་གནང་པ་དང་། དེ་ཡང་རིག་པ་གློ་བུར་སེམས་བཙན་ཐབས་སུ་བཀག་ནས་འགྲོ་བའི་ཐབས་སོགས་ངོ་སྤྲོད་གནང་ཡོད་པ་རེད།
ཕྱི་ཚེས་༡༤་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་འཕགས་མཆོག་སྤྱན་རས་གཟིགས་ཀྱི་རྗེས་གནང་དང་། ༧གོང་ས་སྐྱབས་མགོན་ཆེན་པོ་མཆོག་༧སྐུ་ཚེ་ཡུན་དུ་བརྟན་པའི་བརྟན་ཞུགས་བསྟར་འབུལ་ཞུ་རྒྱུ་ཡིན་པ་རེད།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།