ཆེས་མཐོའི་ཁྲིམས་ཞིབ་ཁང་གིས་བལ་ཡུལ་མཆོད་འཇོར་གྱི་ཁྲིམས་རྩོད་པའི་བར་བརྒལ་བཀའ་ཁྱབ་གནང་སྐྱོང་ཡོང་བའི་ཞུ་སྐུལ་ལ་ངོས་བཞེས་གནང་མེད་པ།
མཆོད་འཇོར་ས་གནས་ཀྱི་འོས་བསྡུའི་གྱོད་དོན་ཐད་གྱོད་ཡ་ཞུ་སྦྱོར་བའི་ཁྲིམས་རྩོད་པས་བར་བརྒལ་བཀོད་ཁྱབ་ཅེས་བཙན་བྱོལ་བོད་མིའི་སྤྱི་འཐུས་ཀྱི་དངོས་གཞིའི་འོས་བསྡུའི་གྲུབ་འབྲས་ཀྱི་གསལ་བསྒྲགས་ཕྱི་ཟླ་ ༥ ཚེས་ ༡༣ ཉིན་གནང་འཆར་ཡོད་པ་འདི་ཉིད་གནས་སྐབས་ཕྱིར་འགྱངས་དགོས་པའི་ཆེས་མཐོའི་ཁྲིམས་ཞིབ་ཁང་ལ་ཕྱི་ཚེས་ ༨ ཉིན་ཞུ་སྙན་ཕུལ་ཡོད་པ་དེར། ཆེས་མཐོའི་ཁྲིམས་ཞིབ་ཁང་གིས་ངོས་བཞེས་གནང་མི་འདུག་ལ། ཟླ་ ༥ ཚེས་ ༡༡ ཉིན་ཁྲིམས་རྩོད་པ་རྣམས་ཆེས་མཐོའི་ཁྲིམས་ཞིབ་ཁང་དུ་བཅར་ཏེ། ཁྲིམས་རྩོད་པ་བསྟན་འཛིན་སྒྲོལ་དཀར་ལགས་ཀྱིས་གསུངས་དོན་ལྟར་ན། བར་བརྒལ་བཀའ་ཁྱབ་ཡོང་བའི་ཞུ་སྙན་ཞིག་སླར་ཡང་ཕུལ་འདུག འོན་ཀྱང་ཆེས་མཐོའི་ཁྲིམས་ཞིབ་ཁང་གིས་བཀའ་ལན་ནམ་ཞིག་གནང་རྒྱུ་ཡིན་མིན་གསལ་ཁ་མི་འདུག
དེས་ན་དབུས་འོས་བསྡུ་ལས་ཁང་གིས་ཕྱི་ཟླ་ ༥ ཚེས་ ༡༣ ཉིན་བོད་མི་མང་སྤྱི་འཐུས་སྐབས་ ༡༨ པའི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་གནང་རྒྱུ་དང་འབྲེལ་གསར་འགོད་ལྷན་ཚོགས་ཤིག་འཚོགས་རྒྱུ་ཡིན་པའི་གསལ་བསྒྲགས་སྤེལ་འདུག མཛད་རིམ་སྔོན་སྒྲིག་ལྟར་ན། ཟླ་ ༥ ཚེས་ ༣༡ ཉིན་སྐབས་ ༡༨ པའི་བོད་མི་མང་སྤྱི་འཐུས་ལྷན་ཚོགས་ཀྱི་བདམས་ཐོན་སྤྱི་འཐུས་རྣམ་པས་དམ་བཅའ་འབུལ་བཞེས་གནང་རྒྱུ་ཡིན་པ་རེད།
ཆེས་མཐོའི་ཁྲིམས་ཞིབ་ཁང་གིས་གསལ་བསྒྲགས་གཞིར་བཟུང་ལྟར་ན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དབུ་བཞུགས་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་ལགས་ཀྱི་དྲུང་ནས་ཕྱི་ཟླ་ ༥ ཚེས་ ༢༧ ཉིན་སྐབས་ ༡༧ པའི་བཀའ་ཤག་གི་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་སྲིད་སྐྱོང་གི་ལས་འཁུར་དམ་འབུལ་ཞུ་རྒྱུ་ཡིན་པ་རེད།
རྩ་བའི་ཆེས་མཐོའི་ཁྲིམས་ཞིབ་ཁང་གི་ཁ་མཆུ་ཨང་ ༢༢ པ་འདི་ནི་བལ་ཡུལ་མཆོད་འཇོར་ཁྱབ་ཁོངས་དགོན་ཁག་དྲུག་དང་མི་མང་བརྒྱ་ཕྲག་ཁ་ཤས་ཀྱིས་ས་རྟགས་བཀོད་དེ་ཞུ་གཏུག་བྱས་པའི་གྱོད་གཞི་ཞིག་ཆགས་ཡོད་ཅིང་། དབུས་འོས་བསྡུ་ལས་ཁང་གིས་བལ་ཡུལ་མཆོད་འཇོར་མི་མང་གི་སྤྱི་འཐུས་ཀྱི་སྔོན་འགྲོའི་འོས་བསྡུ་གནང་སྐབས་སྒྲིག་མཐུན་བྱུང་མེད་པ་གཟིགས་ཡོད་སྐོར་གསལ་བཤད་གནང་སྟེ་དངོས་གཞིའི་འོས་བསྡུ་བཀག་སྐྱིལ་གནང་པའི་ཐད་ས་གནས་མི་མང་འཐུས་ཚབ་ཀྱིས་བོད་མིའི་ཆེས་མཐོའི་ཁྲིམས་ཞིབ་ཁང་ལ་དབུས་འོས་བསྡུ་ལས་ཁང་གི་ཁ་གཏད་དུ་ཁྲིམས་གཏུག་བྱས་པ་ཞིག་ཡིན་པ་རེད།
ཕྱི་ཟླ་ ༤ ཚེས་ ༢༣ ཉིན་དབུས་འོས་བསྡུ་ལས་ཁང་གིས་བལ་ཡུལ་མཆོད་འཇོར་ས་གནས་མང་ཚོགས་ཀྱི་འོས་བསྡུའི་ཐོབ་ཐང་བཀག་སྐྱིལ་བྱས་པ་དང་འབྲེལ། དབུས་འོས་བསྡུའི་འགན་འཛིན་བློ་བཟང་ཡེ་ཤེས་ལགས་ཀྱིས་གནས་ཚུལ་ཞིབ་ཕྲ་ཟླ ༥ ཚེས་ ༡༣ ཉིན་གསལ་བསྒྲགས་གནང་རྒྱུ་ཡིན་ཞེས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་ཡོད།།