བོད་རྒྱ་འབྲེལ་ལམ་སྐོར་གྱི་རྒྱལ་སྤྱིའི་ལྷན་ཚོགས།

འདི་གའི་གསར་འགོད་པས་གནས་ཚུལ་བཏང་དོན། འདི་ཚེས་༢༩ ཉིན་ཨོ་སུ་ཁྲི་ལེ་ཡའི་སི་ཌི་ནི་གྲོང་ཁྱེར་དུ་། གྲོང་ཁྱེར་དེའི་ནང་ཡོད་པའི་རྒྱ་བོད་མཛའ་འབྲེལ་ཚོགས་པ་དང་། ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་བོད་རྒྱ་མི་རིགས་གཉིས་ཀྱི་འབྲེལ་ལམ་སྐོར་གྱི་རྒྱལ་སྤྱིའི་ཤེས་ཡོན་བསྟི་གནས་ཁང་ཐུན་མོང་གིས་གོ་སྒྲིག་འོག་བོད་རྒྱ་འབྲེལ་ལམ་སྐོར་གྱི་རྒྱལ་སྤྱིའི་མཁས་པའི་ལྷན་ཚོགས་ཤིག་སྐོང་འཚོགས་གནང་ཡོད་པ་དང་། དེའི་ཐོག་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་དབུས་ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་། (University of Technology)ཞེས་པའི་གཙུག་ལག་སློབ་ཆེན་མོའི་སློབ་དཔོན་ཝན་ཅིན་མི། སི་ཌི་ནི་རྒྱ་བོད་མཛའ་འབྲེལ་ཚོགས་པའི་ཚོགས་གཙོ་ལྕམ་སྐུ་མེ་ལན་ཅི་སོགས་བོད་རྒྱ་མི་རིགས་ཀྱི་མཁས་པ་དང་ཆེད་ལས་པ། གསར་འགོད་པ་སོགས་ཁྱོན་མི་གྲངས་བརྒྱ་སྐོར་ལྷན་འཛོམས་ཀྱིས། ད་ལྟའི་བོད་རྒྱ་གཉིས་བར་འཕྲད་བཞིན་པའི་དཀའ་རྙོག་དང༌། བོད་ནང་གི་རང་ལུས་མེར་སྲེག་གིས་མཚོན་པའི་ཛ་དྲག་གི་གནས་སྟངས་བཅས་པའི་སྐོར་བགྲོ་གླེང་གནང་ཡོད་པ་རེད།

ཚོགས་འདུ་དེར་༧གོང་ས་མཆོག་ནས་གལ་ཆེའི་གསུང་འཕྲིན་གནང་ཡོད་པ་དང་། དེ་བཞིན་བོད་ནང་གི་བུད་མེད་རྩོམ་པ་ཚེ་རིང་འོད་ཟེར་དང་། རྒྱ་རིགས་མཁས་དབང་མི་ཉུང་བ་ཞིག་ལ་རྒྱ་ནག་གཞུང་གིས་ཕྱི་བསྐྱོད་ལག་འཁྱེར་མ་སྤྲད་པར་བརྟེན་མཉམ་ཞུགས་ཐུབ་མེད་ཀྱང་། ཁོས་ཚོས་རྒྱབ་སྐྱོར་གྱི་འཕྲིན་ཡིོག་བསྐུར་བ་དང་། རྩོམ་འབྲི་བ་སོགས་བྱས་འདུག་ལ་དེའི་སྐོར་གྱི་གནས་ཚུལ་དྲ་ལམ་བརྒྱུད་རྒྱ་རིགས་མི་གྲངས་ས་ཡ་གཅིག་ལྷག་གིས་བལྟ་ཀློག་ཐུབ་པ་བྱུང་ཡོད་འདུག