རྒྱ་གཞུང་གིས་གསར་འགོད་པ་སོ་བཞི་འཛིན་བཟུང་བྱས་འདུག

༄༅༎དེ་རིང་རེས་གཟའ་ཉི་མའི་ཉིན་འགྲོ་བ་མིའི་ཐོབ་ཐང་ཚོགས་པ་ཞིག་གིས། རྒྱ་ནག་གཞུང་གིས་གསར་འགོད་པར་དམ་བསྒྲགས་ཀྱི་བྱ་སྤྱོད་ལག་བསྟར་བྱས་པར་བརྟེན་ནས། ༢༠༡༡ ལོར་གཞུང་གི་སྲིད་དབང་མགོ་རྟིང་སློག་ཐབས་བྱས་པ་དང༌། གཞུང་གི་གསང་བའི་གནས་ཚུལ་རྐུ་འཁྱེར་བྱས་པའི་ཆབ་སྲིད་ཀྱི་ནག་ཉེས་བཙུགས་པའི་གསར་འགོད་པ་ཉུང་མཐར་ཡང་༣༤ འཛིན་བཟུང་བྱས་ཡོད་པའི་སྐོར་གསུང་བཞག
དེ་ཡང་ཨ་མི་རི་ཀའི་ནང་དུ་ཡོད་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་བཏོན་པའི་ལོ་རེའི་སྙན་ཐོའི་ནང༌། རྒྱ་ནག་གཞུང་གིས་གཞུང་འཛིན་གུར་ཁྲན་ཏང་གི་གནས་ཚུལ་ཕྱི་འགྱར་འགྲོ་རྒྱུ་འགོག་ཐབས་ཀྱིས་གསར་འགོད་རང་དབང་ཐོག་ལ་དམ་བསྒྲགས་བྱེད་པའི་ཁར་ཉེ་བའི་དུས་ཚོད་ནང་དེ་བས་དམ་བསྒྲགས་ཆེ་རུ་བཏང་ཡོད་ཅིང༌། དེར་བརྟེན་རྒྱ་ནག་ནང་དུ་མུ་མཐུད་གསར་འགོད་རང་དབང་ཐོག་ལ་དམ་བསྒྲགས་བྱེད་པ་དེ་ཡིས་གསར་འགོད་པ་ཚོར་རྒྱ་ནག་གཞུང་འབྲེལ་གྱིས་གསར་འགྱུར་ག་རེ་བཏང་བ་དེའི་ལམ་སྟོན་ཁོ་ནའི་འོག་འགྲོ་རྒྱུ་ལས་རང་དབང་གི་གསར་འགྱུར་གཏོང་རྒྱུར་ཉེན་ཁ་བཟོ་གི་ཡོད་པ་མ་ཟད། གསར་འགོད་པར་ཆབ་སྲིད་ཀྱི་མིང་དོགས་སྣ་ཚོགས་བྱས་ཏེ། གཞུང་གི་སྲིད་དབང་མགོ་རྟིང་སློག་མཁན་དང༌། གཞུང་གི་གསང་བའི་གནས་ཚུལ་རྐུ་འཁྱེར་བྱེད་མཁན་གྱི་ནག་ཉེས་བཙུགས་ཏེ། བཙོན་མཇུག་གི་ཉེས་ཆད་བཏང་བའི་ནང་དུ། གསར་འགོད་པ་ཆི་ཀྲོང་ཧུའེ་ ཡིས་རྒྱ་ནག་གི་ཤར་ཕྱོགས་ཧྲན་ཏོང་ཞིང་ཆེན་གྱི་ས་གནས་གཞུང་གིས་ལྐོག་ཟ་རུལ་སུང་བྱེད་པའི་བྱ་སྤྱོད་ཐེར་འདོན་བྱས་པར་བརྟེན་ནས་༢༠༠༨ ལོར་མི་ལོ་བཞི་ཡི་བཙོན་འཇུག་ཉེས་ཆད་བཏང་ཡོད་ཀྱང་སླར་ཡང་ཁོང་གི་བཙོན་འཇུག་ཉེས་ཆད་ལོ་བརྒྱད་བར་འཕན་སྣོན་བྱས་ཡོད་པའི་སྐོར་བཀོད་ཡོད་པ་རེད།།