ཡུ་གུར་གྱི་དོན་དུ་ཨའོསི་ཊརེ་ལི་ཡའི་ཚོགས་པ་ཡོངས་ཀྱི་གྲོས་ཚོགས་ཚོགས་པ་ཞིག་བཙུགས་པ།

ཕྱི་ཟླ་ ༢ ཚེས་ ༡༡ ཉིན་ཨའོསི་ཊརེ་ལི་ཡའི་གྲོས་ཚོགས་འཐུས་མི་རྣམས་ཀྱིས་གྲོས་ཚོགས་ཚོགས་པ་ཞིག་གཏན་ལ་ཕབ་ཡོད་ཅིང་། གྲོས་ཚོགས་འཐུས་མི་ཚོས་དེ་ནི་ཡུ་གུར་མི་རིགས་ཚོར་རྒྱ་ནག་གཞུང་གིས་ཁོང་ཚོའི་ས་གནས་ཀྱི་སྤྱི་ཚོགས་ནང་ཐོབ་ཐང་གི་འབད་བརྩོན་དང་།  དེ་བཞིན་ཁོང་ཚོའི་ཕ་ཡུལ་རྒྱ་ནག་གི་ནུབ་ཕྱོགས་ཤིང་ཅང་ས་ཁུལ་དུ་ཁོང་ཚོར་གདོང་ལེན་བྱེད་བཞིན་པའི་མནར་གཅོད་སྐོར་སེམས་ཚབས་ཡོད་པའི་གནས་ཚུལ་གླེང་སའི་སྡིངས་ཆ་ཞིག་འབུལ་རྒྱུ་ཡིན་ཞེས་གསལ་སྟོན་གནང་འདུག 

རེས་གཟའ་མིག་དམར་ཉིན་ཨའོསི་ཊརེ་ལི་ཡའི་རྒྱལ་ས་ Canberra མངའ་སྡེའི་གྲོས་ཚོགས་ཀྱི་ཚོགས་ཁང་དུ་ཡུ་གུར་མི་རིགས་ཚོར་སྡུག་སྦྱོང་གཏོང་བའི་གྲོས་ཚོགས་ཀྱི་སྡེ་ཁག་གསར་འཛུགས་ཀྱི་མཛད་སྒོ་དང་གྲོས་བསྡུར་གྱི་བྱེད་སྒོ་ཞིག་གི་ཐོག་ལ་གྲོས་ཚོགས་ཀྱི་འཐུས་མི་ཚོས་ཨའོསི་ཊརེ་ལི་ཡའི་ཚོགས་པ་ཡོངས་ཀྱི་གྲོས་ཚོགས་ཚོགས་པ་ཡུ་གུར་གྱི་དོན་དུ་ Australian All-Party Parliamentary Group for Uyghurs (AAPPGU) ཟེར་བ་གཞུང་འབྲེལ་གྱིས་བཙུགས་གནང་ཡོད་པ་རེད།  མཛད་སྒོ་དེ་ནི་གྲོས་ཚོགས་འཐུས་མི་Tony Zappia དང་Andrew Wallace དང་།  མཉམ་སྦྲེལ་ཚོགས་གཙོ་དང་ཨའོསི་ཊརེ་ལི་ཡའི་ཡུ་གུར་བུད་མེད་མཐུན་ཚོགས་བཅས་མཉམ་རུབ་ཀྱིས་གཙོ་སྐྱོང་གནང་བ་ཞིག་ཡིན་པ་རེད་བཞག  འདུ་འཛོམས་དེའི་ཐོག་གྲོས་ཚོགས་འཐུས་མི་Zappia ཡིས་གོང་ཞུས་AAPPGU ཟེར་བའི་ཚོགས་པ་དེ་བཙུགས་པ་ནི་འཛམ་གླིང་ཡུ་གུར་སྤྱི་ཚོགས་ལ་གོམ་པ་གལ་ཆེན་ཞིག་ཡིན་པ་གསལ་སྟོན་གནང་བ་དང་། ཡང་ཁོང་གིས་ཚོགས་པ་དེས་ཨའོསི་ཊརེ་ལི་ཡའི་ནང་གི་ཡུ་གུར་མི་མང་དང།  དེ་བཞིན་རང་ཡུལ་དུ་ཡོད་པའི་ཡུ་གུར་མི་རྣམས་ཀྱི་སྐད་གསང་སྒྲོག་ཐུབ་པ་བཟོ་རྒྱུ་ཡིན་ཞེས་གསལ་སྟོན་གནང་འདུག

ཡང་Zappia ཡིས་དེ་ནི་རྒྱ་ནག་གིས་ཤིང་ཅང་ཞེས་འབོད་པའི་ཡུ་གུར་རང་སྐྱོང་ལྗོངས་སམ་ཡང་ནས་XUAR ལ་བརྩི་ཡི་ཡོད་ཅེས་དང་། ཡང་ཁོང་གིས་གྲོས་ཚོགས་ཚོགས་པ་གསར་པ་དེས་ཨའོསི་ཊརེ་ལི་ཡའི་གྲོས་ཚོགས་ཀྱི་འཐུས་མི་ཚོས་ཡུ་གུར་གྱི་གནད་དོན་ལེགས་པར་རྟོགས་པར་ཕན་ཐོགས་ཆེན་པོ་ཡོང་རྒྱུ་ཡིན་པ་ནན་བརྗོད་གནང་ཡོད་ལུགས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གི་ཡུ་གུར་སྡེ་ཚན་ནས་གནས་ཚུལ་སྤེལ་འདུག།

གསར་འགོད་པ། དབྱངས་སྒྲོལ།

རྩོམ་སྒྲིག་པ། བསྟན་འཛིན་བདེ་སྐྱིད།

དྲྭ་ཐོག་སྤེལ་མཁན། པ་སངས་དོན་ལྡན།