རྒྱ་ནག་གཞུང་གིས་བོད་ནང་སྤེལ་བཞིན་པའི་མི་རིགས་རྩ་མེད་ཀྱི་སྲིད་བྱུས་རྣམས་འཕྲལ་དུ་མཚམས་འཇོག་དགོས་པའི་དགོས་འདུན་འོག བོད་ཀྱི་གཞོན་ནུ་ལྷན་ཚོགས་ནས་རྒྱ་ནག་གཞུང་ཚབ་ཀྱི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ།

ཕྱི་ལོ་ ༢༠༢༤ ཟླ་ ༡༠ པའི་ཚེས་ ༡ ནི་རྒྱ་ནག་གི་རྒྱལ་སྟོན་ཐེངས་ ༧༥ པ་དེ་ཆགས་ཀྱི་ཡོད་པ་དང་བསྟུན། བོད་ཀྱི་གཞོན་ནུ་ལྷན་ཚོགས་ངོས་ནས་རྒྱ་གར་རྒྱལ་ས་ལྡི་ལིར་རྟེན་གཞི་བྱེད་པའི་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ཞིག་སྤེལ་སོང་བ་དང་། ཐེངས་འདའི་ངོ་རྒོལ་ལས་འགུལ་གྱི་འབོད་སྒྲ་གཙོ་བོ་ནི་ཇི་སྲིད་བར་དུ་བོད་ཀྱི་བདེན་མཐའ་མ་སེལ་བར་དུ་དེ་སྲིད་ཀྱིས་བོད་ཀྱི་གཞོན་ནུ་ལྷན་ཚོགས་གཙོས་པའི་གཞིས་བྱེས་གཉིས་ཀྱི་མང་ཚོགས་ནས་མུ་མཐུད་བོད་དོན་ལས་འགུལ་སྤེལ་རྒྱུ་དང་། རྒྱ་ནག་གཞུང་གིས་མི་རིགས་རྩ་མེད་བཟོ་བའི་སྲིད་བྱུས་འཕྲལ་དུ་མཚམས་འཇོག་དགོས་པ་ཡིན་ཞེས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། མ་ཟད་དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་ཀྱིས། རྒྱ་ནག་གཞུང་གིས་བོད་ནང་དུ་སྤེལ་བཞིན་པའི་དྲག་པོའི་སྲིད་བྱུས་ལ་ངོ་རྒོལ་དང་། ལྷག་པར་དུ་རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་ལ་གནོན་ཤུགས་སྤྲོད་དགོས་པ་དང་བོད་དོན་ལ་རྒྱབ་སྐྱོར་གྱིས་བོད་དང་རྒྱ་ནག་གཞུང་གིས་སྤེལ་བཞིན་པའི་མི་རིགས་རྩ་མེད་ཀྱི་སྲིད་བྱུས་རྣམས་མཚམས་འཇོག་དགོས་པ་རེད་ཅེས་འགྲེལ་བརྗོད་གནང་གི་འདུག

ཐེངས་འདིའི་རྒྱ་ནག་གཞུང་ཚབ་ཀྱི་མདུན་དུ་ངོ་རྒོལ་གྱི་ལས་འགུལ་དེའི་ཐོག་ཁྱོན་མི་གྲངས་ ༥༤ ནས་མཉམ་བཞུགས་གནང་ཡོད་པ་དང་། ལས་འགུལ་བ་ཕལ་ཆེ་བ་ནི་ཉེ་ལམ་ཟླ་ ༩ པའི་ཚེས་ ༢༤ ནས་ ༣༠ བར་བོད་ཀྱི་གཞོན་ནུ་ལྷན་ཚོགས་ངོས་ནས་བདེ་སྐྱིད་གླིང་ནས་རྒྱ་གར་རྒྱལ་ས་ལྡི་ལི་བར་སྤྱི་ལེ་ ༤༠༠ ཡི་བོད་དོན་དྲིལ་བསྒྲགས་ཀྱི་རྐར་འཁོར་སྐོར་སྐྱོད་ཀྱི་ལས་འགུལ་དེར་མཉམ་བཞུགས་གནང་མཁན་རྣམས་ཡིན་པ་རེད་འདུག

ཡང་ལས་འགུལ་ཐོག་མཉམ་བཞུགས་གནང་མཁན་བསྟན་འཛིན་ཟླ་གསལ་ལགས་ཀྱིས། རྒྱ་ནག་གཞུང་གིས་བོད་ནང་གི་བོད་ཕྲུག་རྣམས་གཏན་འཇགས་སློབ་གྲྭར་བཏང་བ་སོགས་མི་རིགས་རྩ་མེད་ཀྱི་སྲིད་བྱུས་རབ་དང་རིམ་པ་སྤེལ་བཞིན་ཡོད་པ་དེའི་ཐོག་རྒྱ་གར་གཞུང་ནས་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་ཡིན་ཞེས་གསུང་གི་འདུག

གཞན་ཡང་རྒྱ་ནག་གི་རྒྱལ་སྟོན་དུས་ཆེན་དང་བསྟུན། རྒྱ་གར་བོད་རང་བཙན་སློབ་ཕྲུག་ཚོགས་པའི་ངོས་ནས་གསར་འགོད་བསྒྲགས་གཏམ་ཞིག་སྤེལ་ཡོད་པ་དེའི་ནང་། རྒྱ་ནག་གཞུང་གིས་བོད་ནང་སྤེལ་བཞིན་པའི་ཛ་དྲག་གི་གནས་སྟངས་ཐེར་འདོན་དང་སྦྲགས། ང་ཚོས་བོད་མི་རྣམས་ལ་ཆོག་མཆན་སྤྲོད་པའི་རང་དབང་དགོས་པ་ལས་གཞན། བོད་ནང་རྒྱ་ནག་གཞུང་གིས་འཛུགས་སྐྲུན་རྒྱ་ཆེའི་ལས་གཞི་སྤེལ་བཞིན་པ་དེ་དག་ལ་རྒྱལ་སྤྱིའི་ཐོག་ནས་བཀག་སྡོམ་བྱེད་དགོས་པའི་འབོད་སྐུལ་ཞུ་རྒྱུ་དང་། བོད་དང་ཤར་ཏུར་ཀིསི་ཐན། ཧོང་ཀོང་སོགས་དང་ལྷག་པར། ཨ་ཉག་སེང་སྒྲ་ལྟ་བུ་བོད་ཀྱི་ཆབ་སྲིད་བཙོན་པ་རྣམས་ལ་རང་དབང་དགོས་པའི་དགོས་འདུན་བཏོན་ཡོད་པ་རེད་ལ། རྒྱ་གར་བོད་རང་བཙན་སློབ་ཕྲུག་ཚོགས་པའི་ངོས་ནས་རྒྱ་གར་རྒྱལ་ས་ལྡི་ལིའི་ Vishwavidyalaya མེ་འཁོར་འབབ་ཚུགས་སུ། དཔར་རིས་འགྲེམས་སྟོན་གྱི་ལམ་ནས་རྒྱ་ནག་གཞུང་གིས་བོད་ནང་སྤེལ་བཞིན་པའི་སྲིད་བྱུས་དང་འབྲེལ་གོ་རྟོགས་སྤེལ་ཡོད་པ་རེད།

རྩ་བའི་ཐེངས་འདིའི་རྒྱ་ནག་གི་རྒྱལ་སྟོན་གྱི་ཉིན་མོ་དང་བསྟུན་ཡོ་རོབ་དང་ཧྥ་རན་སི། ཉི་ཧོང་དང་དབྱིན་ཡུལ། སོགས་འཛམ་གླིང་ས་ཕྱོགས་གང་ས་ནས་བོད་མི་དང་བོད་དོན་རྒྱབ་སྐྱོར་བ་རྣམས་ནས་རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་བཞིན་ཡོད་པ་རེད།

གསར་འགོད་པ། བསྟན་འཛིན་ཐར་འདོད།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།