རྒྱ་ནག་གི་མི་འབོར་མར་ཆག་པ་སོགས་ལ་གདོང་ལེན་ཆེད་རྒན་ཡོལ་གྱི་ལོ་ཚད་སྤར་འཆར་འདུག

དེ་ཡང་འདི་ཚེས་༡༣་རེས་གཟའ་པ་སངས་ཉིན་རྒྱ་ནག་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཚོགས་ཀྱི་གྲོས་ཚོགས་སུ་རྒྱ་ནག་གཞུང་གིས་རིམ་བཞིན་ཁྲིམས་ནང་གཏན་འཁེལ་བྱས་ཡོད་པའི་རྒན་ཡོལ་གྱི་ལོ་ཚད་ཇེ་མཐོར་གཏོང་རྒྱུ་ཡིན་པ་བསྒྲགས་འདུ་ལ། དེ་ནི་ཉེ་བའི་ལོ་ཤས་ནང་རྒྱ་ནག་གི་མི་འབོར་མར་ཆག་བཞིན་པ་དང་ལོ་ན་བགྲེས་པོའི་གྲངས་འབོར་མང་དུ་འགྲོ་བཞིན་བའི་ཉེན་ཚབས་ལ་གདོང་ལེན་དགོས་བའི་ཁ་ཚ་དགོས་གཏུགས་ཀྱི་གནད་དོན་ཞིག་ཆགས་ཡོད་པ་རེད།
རྒྱ་ནག་གི་གཏན་འབེབས་ལྟར་ན། ༢༠༢༥་ལོའི་ཟླ་༡པོའི་ཚེས༡་ཉིན་ནས་དུས་ཡུན་ལོ༡༥བར་དུ། སྐྱེས་པ་ལས་བཟོ་པའི་ཁྲིམས་བཀོད་གཏན་འབེབས་བྱས་པའི་རྒན་ཡོལ་ལས་འཁྱུར་ངལ་གསོའི་ལོ་ཚད་དེ་སྔར་གྱི་ལོ༦༠ནས་ལོ༦༣བར་སྤར་རྒྱུ་དང་། བུད་མེད་ལས་བཟོ་པའི་ཁྲིམས་བཀོད་གཏན་འབེབས་བྱས་པའི་རྒན་ཡོལ་ལས་འཁྱུར་ངལ་གསོའི་ལོ་ཚད་དེ་སྔར་གྱི་ལོ༥༠དང་ལོ༥༥ནས་སོ་སོ་ལོ་༥༥དང་ལོ༥༨བར་སྤར་རྒྱུ་ཡིན་འདུག
ཧྥ་རན་སིའི་གསར་སྤེལ་ཁང་གིས་གནས་ཚུལ་སྤེལ་བ་ལྟར་ན། མ་འོངས་པའི་ལོ་ངོ་བཅུ་ཕྲག་ནང་རྒྱ་ནག་གི་མི་འབོར་དུང་ཕྱུར་ཁ་ཤས་ལོ་ན་བགྲེས་པོ་ཆགས་རྒྱུ་ཡིན་པ་དང་། ཡིན་ནའང་རྒྱ་ནག་གི་མི་འབོར་སྐྱེ་འཕེལ་གྱི་གྲངས་ཀ་མུ་མཐུད་དུ་ཉུང་དུ་འགྲོ་བཞིན་པ་རེད།
ཕྱི་ལོ་༢༠༢༢དང་༢༣ལོར་རྒྱ་ནག་ནང་བསྟུད་མར་ལོ་གཉིས་ལ་མི་འབོར་མར་ཆག་ཡོད་པ་དང་། དེའི་ཐད་ཀྱི་སྲིད་ཇུས་གཏན་འབེབས་བྱེད་མཁན་ཚོས་གལ་ཏེ་གང་མགྱོགས་ཐབས་ཇུས་མ་འཐེན་པ་ཡིན་ན། དཔལ་འབྱོར་དང་སྨན་བཅོས་ལུས་ཁམས་བདེ་སྲུང་། སྤྱི་ཚོགས་ཕན་བདེ་མ་ལག་ཐད་ཤུགས་རྐྱེན་ཐེབས་རྒྱུའི་ཉེན་བརྡ་བཏང་ཡོད་པ་རེད།
རྒྱ་ནག་གཞུང་གིས་འདས་པའི་ལོ་མང་རིང་རྒན་ཡོལ་གྱི་ལོ་ཚད་ཡར་སྤར་ཡོད་ནའང་འཛམ་གླིང་གི་རྒྱལ་ཁབ་ཁག་གི་ཁྲོད་རྒན་ཡོལ་གྱི་ལོ་ཚད་དམའ་ཤོས་གྲས་ཡིན་འདུག
ཡང་གཏན་འབེབས་གསར་བ་དེའི་ནང་ལས་ཁུངས་དང་གན་རྒྱ་འཇོག་མཁན་ནས་གྲོས་མོལ་བྱས་ནས་རྒན་ཡོལ་དུས་ཡུན་གཏན་འབེབས་ལས་མང་དུ་བཏང་ཆོག་པའང་བརྗོད་འདུག
རྒྱ་ནག་གཞུང་འབྲེལ་གསར་འགྱུར་ནང་གོང་ཞུས་གཏན་འབེབས་དེ་ནི་རྒྱ་ནག་ནང་གི་མི་འབོར་གྱི་ཆ་སྙོམས་ཚེ་ཚད་དང་མི་འབོར་གྱི་གྲུབ་ཆ། སློབ་གསོའི་ཤེས་ཚད། ངལ་རྩོལ་ནུས་ཤུགས་སོགས་ཁྱོན་ཡོངས་ལ་བརྟག་དཔྱད་བྱས་ནས་རྒན་ཡོལ་ལོ་ཚད་སྤར་བ་ཡིན་པ་བརྗོད་འདུག

གསར་འགོད་པ། ལྕགས་མོ་འཚོ།
རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།